No sakkirde waɗiraa
38
1 Besaliilu oon waɗi sakkirde kirsamaaji buleteeɗi. O waɗiri nde e leɗɗe ngawdi. Njuuteefi mayre e njaajeefi mayre fuu wo piyanɗe joy joy, de tooweefi mayre wo piyanɗe tati. 2 O waɗi alhaali luwe nay, o seŋi e mayre, soɓɓunde fuu luwal gootal. O mooytiri nde njamndi mboɗeeri. 3 Katin du o waɗi gollirɗe mayre fuu, ɗuum woni taasaaje e ɓottirɗe e taasahoy mbiccirkoy ƴiiƴam e cette ɗe calɗi e keeɗe to docce mbuletee. Gollirɗe ɗeen fuu, ngaɗiraa njamndi mboɗeeri. 4 O sanyi njamndi mboɗeeri nanndundi e nanngirdi liƴƴi, o fiili sakkirde ndeen, to kommbol mayre toon, gilla ley faa e hakkunde mayre. 5 Ndeen o siiwi njamndi mboɗeeri, o waɗi jawe nay to coɓɓuli jamɗe canyaaɗe ɗeen faa ɗe njogoo cabbi ɗiin. 6 O waɗiri cabbi ɗiin e leɗɗe ngawdi, o mooyti ɗi njamndi mboɗeeri. 7 Ndeen o watti ɗi nder jawe gonɗe to seraaji sakkirde ɗeen faa nde ƴeptiree.O waɗi sakkirde ndeen du wo nde ɓolde hono luuro nii. O waɗiri nde leɗɗe keefaaɗe.
No heeɗo waɗiraa
8 O jaɓi danndorɗe gaɗiraaɗe njamndi mboɗeeri to rewɓe gollooɓe ley dammbugal hukum hawrugol Joomiraaɗo, o siiwi, o waɗi heeɗo e joƴƴinirde maggo.
No kokuwol taliyaare waɗiraa.
9 O huuriri taliyaare ndeen gude canyiraaɗe leppi ɗaatuɗi. Njuuteefi gude ɗeen wo piyanɗe 100 gere horɗoore taliyaare ndeen. 10 Ɗe tiigoraa bimmbeeje 20. Bimmbeeje ɗeen ngaɗanaa koyɗe njamndi mboɗeeri 20. Ko gude ɗeen tiigortee e ko ɗe kaɓɓirtee ɗuum wo cardi. 11 To gere soɓɓiire taliyaare ndeen du, njuuteefi gude ɗeen wo piyanɗe 100, e bimmbeeje 20 e jamɗe majje 20 gaɗiraaɗe njamndi mboɗeeri. Ko ɗe tiigortee e ko ɗe kaɓɓirtee wo cardi. 12 Gere gorgal taliyaare ndeen du, njuuteefi gude ɗeen wo piyanɗe 50, e bimmbeeje sappo e joƴƴinirɗe majje sappo. Ko ɗe tiigortee e ko ɗe kaɓɓirtee wo cardi. 13 Gere lettugal taliyaare ndeen, njuuteefi gude ɗeen wo piyanɗe 50. 14 Wooɗi du, gude ngattaa sera dammbugal taliyaare go'aɓo. Njuuteefi majje wo piyanɗe sappo e joy, bimmbeeje majje tati e joƴƴinirɗe majje tati. Ɗe tiigoraa bimmbeeje tati tati e jamɗe muɓɓen tonteteeɗe e leydi tati tati. 15 Wo noon du waɗiraa to sera dammbugal ɗiɗaɓo oon, njuuteefi majje wo piyanɗe sappo e joy, bimmbeeje majje tati e joƴƴinirɗe majje tati. Ɗe tiigoraa bimmbeeje tati tati e jamɗe muɓɓen tonteteeɗe e leydi tati tati. 16 Gude piiliiɗe kokuwol ɗeen fuu canyiraa leppi ɗaatuɗi. 17 Joƴƴinirɗe bimmbeeje ɗeen wo njamndi mboɗeeri. Tiigorkoy kooy e kaɓɓirkoy kooy du wo cardi. Ndeen ko'e bimmbeeje ɗeen fuu mooytiraa cardi, katin ɗe fuu ɗe kaɓɓiraa cardi. 18 Wudere uddirde dammbugal taliyaare ndeen du, sanyiraa gaaraaji bulabulaaji e bojjitooji e boɗeeji coy e leppi ɗaatuɗi, ɗum fuu ɗum golliraa nyeenyal. Njuuteefi mayre wo piyanɗe 20, njaajeefi mayre wo piyanɗe joy, hono gude kokuwol ɗeen. 19 Inde woodi bimmbeeje nay e joƴƴinirɗe njamndi mboɗeeri nay. Tiigorkoy majje e kaɓɓirkoy majje wo cardi, de ko'e bimmbeeje ɗeen mooytaa cardi. 20 Jamɗe tiigorɗe hukum oon e kokuwol ngool fuu, wo njamndi mboɗeeri ngaɗiraa.
Jamɗe golliraaɗe hukum ceniiɗo
21 Inan jamɗe golliraaɗe nyimngo hukum ceniiɗo mo amaana oon. Muusaa wi'i jamɗe ɗeen limee. Itamar ɓii Haaruuna, almaami mo lenyol Lewinkooɓe, ardii limngal majje. 22 Besaliilu ɓii Ur, taan Hur, mo lenyol Yahuuda, kam tafi huunde fuu ko Joomiraaɗo yamirnoo Muusaa. 23 Oholiyap ɓii Ahisamak mo lenyol Dan du walli mo. Wo baawɗo sehude iri huunde fuu e nyootude leppi bulabulaaji e bojjitooji e boɗeeji coy e leppi ɗaatuɗi.
24 Kaŋŋe mo yimɓe kokkiri yardaamuye faa golliree ley suudu seniindu oon waɗii talantiiji 29 e sekeliiji 730 (ɗum wo kilooji 995) fodde etirgal suudu seniindu.
25 Cardi njaɓaandi to yimɓe ɓeen ndiin waɗii talantiiji 100 e sekeliiji 1 775 fodde etirgal suudu seniindu (ɗum wo kilooji 3 420). 26 Worɓe waɗuɓe duuɓi 20 e ko ɓuri noon limaa. Limaaɗo fuu hokki feccere sekel (ɗum wo feccere mbuuɗu cardi) fodde etirgal suudu seniindu. Limaaɓe ɓeen ngaɗi yimɓe 603 550.
27 Wooɗi, talantiiji cardi 100 ɗiin (ɗum wo kilooji 3 400) ngaɗiraa koyɗe 100 saabe darorɗe hukum ceniiɗo oon e lefol cenndungol nokkuure ɓurnde senaade ndeen. Koyngal fuu waɗiraa talanti gooto (kilooji 34). 28 Ndeen sekeliiji cardi 1 775 ɗiin du (kilooji 20) ngolliraa tiigorkoy bimmbeeje ɗeen e mooytugol ko'e majje e waɗugol kaɓɓirkoy majje.
29 Wooɗi du, jamɗe boɗeeje ɗe lenyol ngool waddi ɗeen ngaɗi talantiiji 70 e sekeliiji 2 400 (ɗum wo kilooji 2 407). 30 E majje jamɗe dammbugal hukum hawrugol Joomiraaɗo oon ngaɗiraa, kam e sakkirde nde njamndi mboɗeeri, e njamndi mayre canyiraandi hono nanngirɗum liƴƴi, e gollirɗe mayre fuu. 31 Wooɗi du wo e majje koyɗe kokuwol taliyaare ɗeen e koyɗe dammbugal maggol ngaɗiraa, kam e tontirɗe hukum oon e tontirɗe kokuwol taliyaare ndeen.