No Keesuwal Amaana waɗiraa
37
1 Wooɗi, Besaliilu waɗiri Keesuwal Amaana e leɗɗe ngawdi. Njuuteefi maggal wo piyanɗe ɗiɗi e feccere, njaajeefi maggal wo fiyande wootere e feccere, tooweefi maggal du wo fiyande wootere e feccere. 2 O mooyti nder maggal e yaasin maggal fuu kaŋŋe dimo. O fiiltini seraaji maggal koɗol kaŋŋe. 3 Ndeen o siiwi kaŋŋe o waɗi jawe nay, o takki ɗe to koyɗe maggal, ɗiɗi sera o, ɗiɗi sera ooto. 4 O waɗi cabbi leɗɗe ngawdi, o mooytiri ɗi kaŋŋe. 5 Ndeen o sorni ɗi nder jawe gonɗe e seraaji keesuwal ngaal heɓa ingal ƴeptiree.6 O adi kaŋŋe dimo o waɗiri ommboode Keesuwal ngaal. Njuuteefi ommboode ndeen waɗi piyanɗe ɗiɗi e feccere, njaajeefi mayre du fiyande wootere e feccere. 7-8 Ndeen o siiwi kaŋŋe, o tappi, o waɗi keruba'en ɗiɗo dow ommboode ndeen, gooto sera o, gooto du sera ooto, iɓe ceŋii e ommboode ndeen. 9 Iɓe peerti bippeele maɓɓe dow maggal, geese maɓɓe du ina kuccondiri, ina ndaara ngal.
No taabawal buuru cakkaaɗo waɗirtee
10 Wooɗi, o waɗiri taabawal e leɗɗe ngawdi. Njuuteefi maggal waɗi piyanɗe ɗiɗi, njaajeefi maggal du fiyande wootere, de tooweefi maggal kaa fiyande wootere e feccere. 11 O mooytiri ngal kaŋŋe dimo, o fiiltini seraaji maggal kaŋŋe dimo? 12 Ndeen o hommbi ngal. Njaajeefi kommbol ngool waɗi njaajeefi junngo. Ndeen o fiiltini seraaji maggol kangol du koɗol kaŋŋe. 13 O siiwi kaŋŋe, o waɗi jawe nay, o seŋi ɗe to coɓɓuli maggal, koyngal fuu wooto. 14 Jawe ɗeen ina ɗakkonduri e koɗol piiltiingol seraaji maggal ngool, faa njogoo cabbi ƴeptirɗi maggal ɗiin. 15 O waɗiri cabbi ɗiin leɗɗe ngawdi, o mooytiri ɗi kaŋŋe. Wo kanji ngal ƴeptirtee. 16 De o waɗi du gollirɗe dow maggal, ɗuum woni kaake nyaamruɗe e taasahoy e jarduɗe e jollooji cabijam sadaka. Ɗuum fuu o waɗiri ɗum e kaŋŋe dimo.
No joƴƴinirde fitillaaji waɗiraa
17 O siiwi kaŋŋe dimo, o tappi, o waɗi joƴƴinirde fitillaaji. O waɗani nde darorde e calɗi e gattirɗi nebbam nannduɗi e pinndi e bilite jogiiɗe ndi. Ɗum fuu o seŋi ɗum e joƴƴinirde fitillaaji ndeen, ɗum laatii huunde wootere. 18 O waɗani ɗum calɗi jeegom e salndu hakkundeeru nduun, tati sera fuu. 19 O waɗani calɗi jeegom ɗiin gattirɗi nebbam e pinndi aman e bilite mayri, salndu fuu gattirɗi tati. 20 Ndeen o waɗani salndu hakkundeeru nduun gattirɗi nebbam nay e pinndi aman e bilite mayri. 21 O waɗi wilitere pinndi to calɗi ɗiɗi arandeeji ɗiin kawri e salndu hakkundeeru nduun, o waɗi wilitere pinndi to calɗi ɗiɗi ɗiɗaɓi ɗiin du, o waɗi katin wilitere pinndi to calɗi ɗiɗi cakitiiɗi ɗiin. 22 Bilite ɗeen e calɗi ɗiin e joƴƴinirde fitillaaji ndeen fuu laatii huunde wootere, sabo wo tamre kaŋŋe dimo wootere siiwaa, de ɗum waɗaa.
23 O waɗiri fitillaaji jeɗɗi ɗiin, e nyifirkoy ɓoggi majji e keeɗoy ɓottirkoy ndoondi majji kooy fuu kaŋŋe dimo.
24 Joƴƴinirde ndeen e kujje mayre ɗeen fuu kawri e talanti kaŋŋe gooto (ɗum wo kilooji 34).
No urirde waɗiraa
25 Ndeen o waɗi wulirde ure. O waɗiri nde leɗɗe ngawdi. Njuuteefi mayre wo fiyande wootere, njaajeefi mayre du noon. Tooweefi mayre wo piyanɗe ɗiɗi. O waɗi alhaali luwe to sera coɓɓuli mayre. Iɗe ceŋii e mayre. 26 O mooytiri nde kaŋŋe dimo nde fuu faa e luwe ɗeen. O fiiltini koɗol kaŋŋe dow mayre. 27 Ndeen o waɗi jawe kaŋŋe ɗiɗi ley koɗol ngool, to gereeji mayre kuccundurɗi ɗiɗi faa njogoo cabbi ƴeptirɗi urirde ɗiin. 28 O waɗiri cabbi ɗiin leɗɗe ngawdi, o mooytiri ɗi kaŋŋe.
No nebbam seningol e uurdi wuleteendi ngaɗirtee
29 Katin o waɗi nebbam seningol, e ure buleteeɗe laaɓuɗe, hono no gaɗoowo uurdi waɗirta noon.