36
1 Besaliilu e Oholiyap e neɗɗo fuu baawɗo gollal, mo Joomiraaɗo hokki hakkillo gollude ley suudu seniindu nduun fu, sey golla ko Joomiraaɗo yamiri ɗuum fuu.2 Muusaa noddi Besaliilu e Oholiyap e neɗɗo fuu baawɗo gollal mo Joomiraaɗo hokki hakkillo waɗude iri gollal ngaal, gooduɗo yardaamuye gollude fuu. 3 Ɓe njaɓi to Muusaa dokke ɗe yimɓe Israa'iila ngaddi ɗeen fuu saabe nyiɓugol nokkuure seniinde ndeen. Yimɓe ɓeen keddii na ngadda dokke, faa ɓuri ko gollal Joomiraaɗo ngaal haani gollireede.
4 Ndeen waawuɓe gollal, waɗooɓe nokkuure seniinde ɓeen ndarni golleeji ɗiin, 5 ngari to Muusaa, mbi'i ɗum:
— Lenyol ngool ɓeydii waddude dokke faa ɓuri ko gollal ngal Joomiraaɗo yamiri waɗee ngaal haani gollireede.
6 Muusaa hokki yamiroore faa yimɓe hoɗorde ndeen fuu mbi'ee: «Taa fay gooto wadda dokkal saabe nyiɓugol nokkuure seniinde ndeen katin.» Yimɓe hoɗorde ɓeen fuu kumpitaa yamiroore ndeen.
Noon yimɓe ɓeen acciri waddude dokke, 7 sabo ko ɓe ngaddunoo ɗuum heƴii ko waɗiree gollal ngaal fuu faa heddii.
No nokkuure seniinde waɗiraa
8 Wooɗi, waawuɓe gollal ngaal ngaɗiri hukum oon e gude mawɗe sappo. Gude ɗeen ngaɗiraa leppi ɗaatuɗi, e gaaraaji bulabulaaji e bojjitooji e boɗeeji coy. Ndeen alhaali malayka'en wi'eteeɓe keruba'en sanyaa dow majje, ɗum fuu ɗum golliraa nyeenyal. 9 Njuuteefi wudere fuu wo piyanɗe 28, de njaajeefi mum wo piyanɗe nay. Guɗe ɗeen fuu ina poti. 10 Joy majje kawrondiraa nyootaa, laatii wootere, de joy keddiiɗe ɗeen du ngaɗiraa noon. 11 Ɓe adi lefoy bulabulawoy 50, ɓe ngaɗi kaɓɓirkoy, ɓe nyooti koy sera wudere arandeere ndeen. Ɓe ngaɗiri noon e wudere sakitiinde ndeen du. 12 Ɓe ngaɗi lefoy 50 nyootaakoy ley wudere arandeere ndeen kuccunduri e lefoy 50 ngonkoy e wudere heddiinde ndeen. 13 Ɓe ngaɗi tiigorkoy kaŋŋe 50, de ɓe kaɓɓonduri gude ɗeen ɗo lefoy kooy kuccunduri ɗoon, faa hukum oon laatoo suudu wooturu.
14 Katin ɓe adi leeɓi be'i, ɓe ngaɗi gude sappo e go'o faa hukum oon huuree. 15 Njuuteefi wudere fuu wo piyanɗe 30, njaajeefi muuɗum du piyanɗe nay. Ɗe fuu ɗe potu. 16 Ɓe kawrondiri joy majje ley sera arano, ɓe nyooti. Hono noon du ɓe kawrondiri jeegom ley sera ɗiɗaɓo oon, ɓe nyooti. 17 Ndeen ɓe ngaɗi kaɓɓirkoy 50 to wudere sakitiinde ley gude joy arane ɗeen, wooɗi ɓe ngaɗi du kaɓɓirkoy 50 to wudere sakitiinde ley gude joy keddiiɗe ɗeen du. 18 Ɓe ngaɗi tiigorkoy njamndi mboɗeeri 50 faa ɓe kawrondira gude ɗeen, faa tiigondira e hukum oon, ɗum fuu ɗum laatoo suudu wooturu. 19 Ɓe ngaɗi ko huurirtee. Ɓe ngaɗiri ɗum guri jawɗi bojjinaaɗi, wooɗi ɓe keɓi du guri ɗaatuɗi moƴƴinaaɗi, ɓe ndeki dow wudere arandeere ndeen.
20 Ɓe keɓi leɗɗe ngawdi darnirɗe hukum oon. 21 Tooweefi leggal fuu waɗi piyanɗe sappo, njaajeefi mum du, fiyande wootere e feccere. 22 Ɓe ngaɗani leggal fuu koyɗe ɗiɗi ɗakkondirɗe. Ɓe ngaɗiri noon e darorɗe ɗeen fuu. 23 Ɓe ndarni leɗɗe 20 faro gere ɗakkol horɗoore hukum oon. 24 Ndeen, ɓe ngaɗi darorɗe cardi 40 tonteteeɗe e leydi, heɓa koyɗe leɗɗe ɗeen tiggee e majje, to leggal fuu ɗiɗi ɗiɗi faa koyɗe ɗiɗi ɗeen fuu keɓa to ndaroo. 25 Noon du ɓe ngaɗiri ley gere soɓɓiire suudu nduun. Ɓe ngaɗi leɗɗe 20, 26 e cardiiji 40, faa koyɗe leɗɗe ɗeen fuu tontee dow cardiiji ɗiɗi ɗiɗi. 27 Ɓe ngaɗi darorɗe jeegom gere gorgal hukum oon du. 28 Ɓe ndarni ɗiɗi faro coɓɓuli mayru gorgaaji. 29 Ɓe kawrondiri leɗɗe ɗiɗi ɗeen gilla ley coɓɓuli ɗiɗi ɗiin faa yottii dow majji. Noon ɓe ngaɗiri to coɓɓuli ɗiin fuu. 30 Ɓe keɓi darorɗe jeetati e cardiiji majje 16 tonteteeɗi e leydi, ɓe ndarni cardiiji ɗiɗi ɗiɗi nder majje.
31 Katin du ɓe keɓi leɗɗe ngawdi juutuɗe paleteeɗe dow leɗɗe tontaaɗe ɗeen: joy gere soɓɓiire, 32 joy gere horɗoore hukum oon, wooɗi joy gaɗa makko du, ɗuum woni gere gorgal. 33 Ɓe pali leggal hakkundeyal ngaal hakkunde leɗɗe ɗeen, gilla soɓɓundu ndu ɗo faa yaade ndu to. 34 Ɓe mooytiri leɗɗe tontaaɗe ɗeen e pale ɗeen fuu kaŋŋe, ɓe ngaɗani tontaaɗe ɗeen jawe kaŋŋe to pale ɗeen palii toon.
35 Ɓe canyi lefol ngol gaaraaji bulabulaaji e bojjitooji e boɗeeji coy e nde leppi ɗaatuɗi. Ndeen baawɗo gollal nyeenyal waɗi alhaali keruba'en dow maggol. 36 Ɓe keɓani ngol leɗɗe ngawdi nay darnirɗe, ɓe ngaɗi bimmbeeje. Ɓe mooyti ɗe kaŋŋe, ɓe ngaɗani ɗe tiigorkoy kaŋŋe. Ɓe ciiwi cardi, ɓe ngaɗi jamɗe nay tonteteeɗe e leydi, heɓa bimmbeeje ɗeen ndarnee nder majje.
37 Ɓe ngaɗani dammbugal hukum oon wudere uddirde sanyiraande gaaraaji jillaaɗi, bulabulaaji e bojjitooji e boɗeeji coy e leppi ɗaatuɗi, ɗum fuu ɗum golliraa nyeenyal. 38 Ɓe ngaɗani nde bimmbeeje joy, ɓe mooyti ko'e majje kaŋŋe. Ɓe ngaɗi du jogorɗe majje e kaɓɓirɗe majje, ɓe mooytiri ɗe kaŋŋe. Ndeen ɓe keɓi njamndi mboɗeeri, ɓe ngaɗi jamɗe joy to bimmbeeje ɗeen ndarnetee.