Jamirooje dow nyalaande fowteteende
35
1 Wooɗi, Muusaa hawrini yimɓe Israa'iila fuu, wi'i ɓe: «Ndaaree ko Joomiraaɗo yamiri ngaɗon: 2 Nyalaaɗe jeegom ngollirton golleeji mooɗon, ammaa nyannde jeɗɗaɓerde ndeen wo nyalaande fowteteende seniinde saabe Joomiraaɗo. Sanaa powton e gollal fuu. Golluɗo nyannde ndeen fuu, wo bareteeɗo. 3 On kuɓɓataa yiite ley gure mooɗon nyalaande fowteteende ndeen.»Dokke gaddeteeɗe saabe suudu seniindu
4 Muusaa wi'i kawrital yimɓe Israa'iila ngaal:
— Ndaaree ko Joomiraaɗo yamiri: 5 Ittanon Joomiraaɗo dokke ley ko ngooduɗon ɗuum. Neɗɗo jiɗuɗo waɗande Joomiraaɗo dokkal fuu, wadda kaŋŋe e cardi e njamndi mboɗeeri e 6 gaaraaji bulabulaaji e bojjitooji e boɗeeji coy e leppi ɗaatuɗi, e leeɓi be'i, 7 e guri jawɗi bojjinaaɗi e guri ɗaatuɗi moƴƴinaaɗi, e leɗɗe ngawdi, 8 e nebbam fitillaaji e ure nebbam seningol e ure buleteeɗe, 9 e kaaƴe dime bi'eteeɗe onikis e kaaƴe dime feere feere takketeeɗe dow saaya ndeketeeka dow, e basel ngel almaami haɓɓata dow ɓernde mum. 10 Waawuɓe gollal e mooɗon fuu, ngara ngaɗana Joomiraaɗo ko yamiri ɗuum. 11 Ɓe ngaɗana mo nokkuure seniinde e hukum mayre e kuurgal mayre, e tiigorkoy mayre e leɗɗe darnirɗe e leɗɗe pale e bimmbeeje e koyɗe jogiiɗe nde. 12 Katin e Keesuwal Amaana e cabbi maggal e ommboode maggal (to hakke mooytetee) e lefol cuddungol ngal to Joomiraaɗo hawretee 13 e taabawal e cabbi maggal e gollirɗe maggal e buuru deseteeɗo yeeso Joomiraaɗo 14 e joƴƴinirde fitillaaji e fitillaaji e gollirɗe majji e nebbam majji 15 e wulirde ure e cabbi mayre e nebbam seningol e ure buleteeɗe e wudere uddirde dammbugal naarrugal hukum oon 16 e sakkirde kirsamaaji buleteeɗi e njamndi mboɗeeri canyaandi hono nanngirɗum liƴƴi e cabbi mayre e gollirtirɗe mayre fuu e heeɗo e joƴƴinirde maggo 17 e gude piiliiɗe taliyaare ndeen e bimmbeeje ɗeen e koyɗe jogiiɗe ɗe e wudere uddirde narrugal taliyaare ndeen 18 e tontirɗe hukum oon e tontirɗe taliyaare muuɗum e ɓoggi majje 19 e kolte gaɗiraaɗe nyeenyal ɓorneteeɗe to nokkuure seniinde ndeen. Ɗeen ngoni kolte ceniiɗe ɗe Haaruuna almaami oon e ɓiɓɓe muuɗum ɓornotoo faa ngaɗa gollal almaamaaku.
20 Nde Muusaa timminoo haala kaan ndeen, Israa'iila'en ɓeen fuu ndilli. 21 Neɗɗo gooduɗo yardaamuye fuu waddi dokkal muuɗum to Joomiraaɗo saabe gollal hukum hawrugol Joomiraaɗo, e kujje gollirteeɗe e canyirɗe kolte ceniiɗe. 22 Rewɓe e worɓe fuu ngari. Neɗɗo gooduɗo yardaamuye fuu waddi jawe e koɗi e kootone kolli e kootone noppi. Ɓe fuu ɓe ngaddi kaŋŋe maɓɓe, ɓe ngaɗani Joomiraaɗo dokke. 23 Neɗɗo gooduɗo gaaraaji bulabulaaji e bojjitooji e boɗeeji coy e leppi ɗaatuɗi e leppi ngaɗiraaɗi leeɓi be'i e guri jawɗi e guri ɗaatuɗi fuu waddi ɗum. 24 Neɗɗo gooduɗo cardi e njamndi mboɗeeri faa waɗa dokkal fuu waddi ɗum to Joomiraaɗo. Gooduɗo leɗɗe ngawdi du waddi ɗe saabe gollal ngaal. 25 Debbo baawuɗo gollal mottugol gaaraaji fuu, motti gaaraaji bulabulaaji e bojjitooji e boɗeeji coy e gaaraaji leppi ɗaatuɗi de waddi ɗi. 26 Rewɓe wooduɓe yardaamuye e baawɗe mottude leeɓi be'i du motti. 27 Mawɓe ardiiɓe lenyol du ngaddi kaaƴe dime bi'eteeɗe onikis e kaaƴe goɗɗe gatteteeɗe dow saaya ɓorneteeka dow e basel kaɓɓeteengel dow ɓernde ngeel. 28 Katin du ɓe gaddi conndi uurndi e nebbam fitillaaji e nebbam seningol e ure buleteeɗe. 29 Yimɓe Israa'iila rewɓe e worɓe fuu ngaddi dokke ɗeen e ɓernde wootere saabe gollal Joomiraaɗo. Nii ɗe laatorii dokke yardaamuye saabe gollal Joomiraaɗo hono no Joomiraaɗo yamiri ɓe e hunnduko Muusaa noon.
Suɓagol Besaliilu e Oholiyab
30 Muusaa wi'i Israa'iila'en: Ndaaree, Joomiraaɗo suɓake Besaliilu ɓii Uri, taan Hur, mo lenyol Yahuuda. 31 Joomiraaɗo hebbinii mo Ruuhu muuɗum, o heɓii hakkillo e paamal e anndal e caral waɗude golleeji feere feere. 32 O heɓi hakkillo waɗirde kujje lobbe e kaŋŋe e cardi e njamndi mboɗeeri. 33 Katin du imo waawi sehude kaaƴe dime e waɗude ko tiigotoo ɗe. Imo waawi du sehude leɗɗe e waɗude iri gollal fuu. 34 Katin Joomiraaɗo hokkii mo, kanko e Oholiyap ɓii Ahisamak mo lenyol Dan dabare ekitinde yimɓe. 35 O hokkii ɓe hakkillo waɗude gollal nyo'ugol gaaraaji bulabulaaji e bojjitooji e boɗeeji coy e leppi ɗaatuɗi. O hokkii ɓe du dabare sehude e nyo'ude e waɗude gollal wahilɓe.