Alluuje kaaƴe ɗiɗaɓe
34
1 Joomiraaɗo wi'i Muusaa:— Sehu alluuje kaaƴe ɗiɗi hono ɗe kelunoɗaa ɗeen faa mi winnda dow majje jamirooje ɗe mbinndunoomi arande ɗeen. 2 Sanaa cegiloɗaa ndawaa subaka law, ƴeeŋaa waamnde Sinayi, ngaraa ndaroɗaa yeeso am dow mayre toon. 3 Taa goɗɗo jokke, taa goɗɗo yi'ee du dow waamnde ndeen, katin du taa fay baali naa be'i naa na'i tawee na ndura ɗakkol mayre.
4 Muusaa sehi alluuje kaaƴe ɗiɗi hono arane ɗeen. O dawidi e majje, imo tiigii ɗe e juuɗe makko, o ƴeeŋi waamnde Sinayi ndeen hono no Joomiraaɗo yamiri mo noon. 5 Ndeen Joomiraaɗo jippodii e ruulde, darii ɗakkol makko, inndi innde muuɗum, wi'i «Joomiraaɗo.» 6 Joomiraaɗo ƴaɓɓii yeeso Muusaa wi'i:
— Miin woni Joomiraaɗo, Laamɗo Joomiraaɗo mo yurmeende e moƴƴere, jom munyal, keewɗo hinney, jom hoolnaare nde timmataa, 7 kolloowo hinney muuɗum koolniiɗo faa yottoo e taaniraaɓe ɗuuɗuɓe sanne, jaafotooɗo hakke e luttal e boofi. De wo mi kiititooɗo gooduɗo hakke fuu. Wo mi kiitotooɗo ɓiɓɓe saabe hakke baabiraaɓe muɓɓen faa yottoo e taaniraaɓe e taaniraaɓe taaniraaɓe.
— Yaa Joomiraaɗo, si mi heɓii moƴƴere maaɗa, miɗo ŋaare, njaada e amin. Goonga ni, yimɓe ɓe wo yoorɓe ko'e, sattuɓe. Yaafana min lutti amin e hakke amin, de ngaɗitoɗaa min jeyal maaɗa.
10 Joomiraaɗo wi'i mo:
— Ndaar, mi waɗidan e maaɗa amaana. Mi waɗan yeeso yimɓe maaɗa ko haayɗinii ko waɗaynoo abada e adunaaru, ko waɗayno yeeso lenyol fay gootol du. Lenyi ɗi ngonɗaa hakkunde muɓɓen ɗiin nji'an baawɗe Joomiraaɗo, ɓe nji'an ko ngaɗananmaami ɗuum no hulɓinorii. 11 Hakkil e ko njamiranmaami hannden ɗuum. Ndaar, mi riiwante Amorinkooɓe e Kanaaninkooɓe e Hitiyankooɓe e Perisinkooɓe e Hiwinkooɓe e Yebusinkooɓe. 12 Hakkil taa jaɓu ngaɗidon amaana jooɗodal e potal aan e jooɗiiɓe ley leydi ndi njahoton ndiin, sabo ɗum tuufinan on, de kalkon. 13 Ndelle sanaa puson kirsirɗe maɓɓe e kaaƴe maɓɓe deweteeɗe, coppon leɗɗe maɓɓe ɗe ɓe ngaɗiri alla maɓɓe bi'eteeɗo Aseraa. 14 Taa cujidanon alla'en feere sabo innde Joomiraaɗo woni «kiroowo». Joomiraaɗo wo Laamɗo kiroowo.
15 Hakkil taa waɗu amaana jooɗodal e potal aan e jooɗiiɓe ley leydi ndiin sabo nyannde ɓe ngaɗanta allaaji maɓɓe iidi lallere e sakkande ɗi fu, ɓe mbaantete, ndeen a nyaaman du ko ɓe cakki ɗuum. 16 Ndeen a ɓaŋanan du ɓiɓɓe maaɗa worɓe, ɓiɓɓe maɓɓe rewɓe, de ekitina ɓiɓɓe maaɗa lallere sabo ɓe ngattan ɗum'en e waɗude iidi sakkande allaaji maɓɓe.
17 Taa waɗan hoore maaɗa allaaji ciiwiraaɗi njamndi.
18 Ngaɗon iidi buuru mo wattaaka rabilla. Nyaamron buuru oon balɗe jeɗɗi hono no njamirmi on noon. Ndeenon iidi ndiin nder lewru Abiibu, sabo e mayru mburtiɗon e leydi Misira.
19 Ɓiɗɗo afo fuu, wo miin jeyi. Hono noon ɗum laatortoo e afo na'i e dammuuli mooɗon fuu. 20 Afo araawa fuu, a rimɗiniran ɗum jawgel naa damngel. Si a rimɗinaay nga fu, sanaa kelaa daande magga. Ɓiɗɗo maaɗa afo fuu, a rimɗinan ɗum. Walaa garoowo yeeso am junngo ɓolo.
21 Balɗe jeegom ngollirton, ammaa nyalaande jeɗɗaɓerde ndeen, tilay powton e gollal fuu. Si wo demal, si wo taƴugol, sanaa powton.
22 Ngaɗon iidi ley jeɗɗiije ɗe taƴoton alkamaari artundi ɓenndi ndiin. Ngaɗon du iidi ngondi si on timminii tayri. 23 Ley hitaande fuu worɓe mooɗon fuu ngara yeeso Laamɗo Joomiraaɗo Israa'iila nde tati. 24 Mi riiwan lenyi gonɗi yeeso mooɗon, katin du mi yaajinan leydi mooɗon. Wooɗi du, wakkati njahoton faa ngaɗon du'aare yeeso Laamɗo Joomiraaɗo nde tati ley hitaande fuu, fay gooto muuyataa teetude leydi mooɗon. 25 Nde kirsanton kam kirsamaaji fu, taa kawrinee ɗi e ko woodi rabilla. Katin du, taa accon ko sakkaa saabe iidi faltagol ɗuum heddoo faa waalta. 26 Ngaddaa ko ɓuri wooɗude ley ko arti ɓenndude nder ngesa maaɗa to suudu Laamɗo Joomiraaɗo maaɗa. Taa njongee teewu ɓinngel mbeewa nder ɓiraaɗam inniigel.
27 Joomiraaɗo wi'i Muusaa:
— Winndu haalaaji ɗi, sabo wo e majji ngaɗammi amaana hakkunde am e maaɗa e Israa'iila.
28 Muusaa ina wondi e Joomiraaɗo jemma e nyalooma faa waɗi balɗe 40. O nyaamaay, o yaraay fey. O winndi haalaaji amaana ɗiin dow alluuje, ɗiin ngoni jamirooje sappo ɗeen.
29 Wooɗi, nde Muusaa jippinoo waamnde Sinayi ina jogii alluuje jamirooje sappo ɗeen fu, yeeso muuɗum ina ɗelka sabo o haaldii e Joomiraaɗo, ammaa o faamaayno ɗelkugol yeeso makko ngool. 30 Nde Haaruuna e Israa'iila'en njiinoo yeeso Muusaa ina ɗelka fu, ɓe kuli ɓattaade ɗum. 31 Ndeen o noddi ɓe, de Haaruuna e mawɓe ardiiɓe lenyol ɓeen coƴƴii to makko. O haaldi e maɓɓe. 32 Caggal ɗuum yimɓe Israa'iila fuu ngari to makko. O haalani ɗum'en jamirooje ɗe Joomiraaɗo hokki mo dow waamnde Sinayi ɗeen. 33 Nde Muusaa timminnoo haaldude e maɓɓe fu, suddi yeeso muuɗum suddaare. 34 Ammaa nde o naatoyta ley hukum Joomiraaɗo faa o haalda e muuɗum fu, o ittan suddaare ndeen faa nde o wurtii. Si o wurtake fu, o haalanan Israa'iila'en ko o yamiraa ɗuum. 35 Israa'iila'en na ndaara yeeso makko ina nji'a no ngo ɗelkirta. Ndeen o suddira ngo suddaare katin, faa nde o naatoyta o haalda e Joomiraaɗo ndeen.