No Muusaa e yimɓe Israa'iila ndilliri waamnde Sinayi
33
1 Joomiraaɗo wi'i Muusaa:— Dillu ɗo, aan e yimɓe ɓe mburtinoyɗaa leydi Misira ɓeen. Njehee leydi ndi kunaniimi maamiraaɓe mooɗon Ibrahiima e Isiyaaku e Yaakuuba, mbiimi: «Mi hokkan ɓiɓɓe mooɗon leydi ndiin.» 2 Mi nulan maleyka ardoo on, mi riiwan Kanaaninkooɓe e Amorinkooɓe e Hitiyankooɓe e Perisinkooɓe e Hiwinkooɓe e Yebusinkooɓe. 3 Njehee leydi to kosam e njuumndi ilata. Ammaa miin mi yaadataa e mooɗon, sakko mi halka on, sabo wo on yoorɓe ko'e, sattuɓe.
4 Nde yimɓe ɓeen nannoo haalaaji tiiɗuɗi ɗiin fu, ɓe mboyi. Wooɗi fay gooto maɓɓe wattaay jawe naa kolte nyaaƴirɗe.
5 Joomiraaɗo wi'i Muusaa:
— Wi'u Israa'iila'en: «Onon wo on yoorɓe ko'e, sattuɓe. Ndaar, si mi yaadii e mooɗon fay wawtu seeɗa, mi halkan on. Ittee jawe mooɗon e kolte mon nyaaƴirɗe, de mi ndaara ko ngaɗanammi on.»
6 Saabe majjum, nde Israa'iila'en ndillannoo to waamnde Horeb ndeen, itti jawe e kolte nyaaƴirɗe ɗeen.
Hukum hawrugol Joomiraaɗo
7 Wooɗi, Muusaa na woowunoo darnude hukum yaasin hoɗorde, to toowti e mayre. O darni toon hukum oon, de o inndiri ɗum hukum hawrugol Joomiraaɗo. Neɗɗo fuu jiɗuɗo haaldude e Joomiraaɗo, sanaa yalta hoɗorde de yaha toon. 8 Nde Muusaa yahata to hukum toon fu, mono fuu wurtoto yaasin hukum muuɗum, daroo to dammbugal faa nde o naatii ley hukum hawrugol Joomiraaɗo oon. 9 Nde Muusaa naatata hukum oon fu, ruulde jippoto, daroo to dammbugal toon, de Joomiraaɗo haalda e muuɗum. 10 Nde yimɓe ɓeen nji'i ruulde ndeen na darii to dammbugal hukum oon fu, ɓe ndaroto to dammbuɗe hukumuuji maɓɓe, de ɓe kippoo toon, ɓe cujidana Joomiraaɗo. 11 Ndeen Joomiraaɗo haaldan e Muusaa hunnduko e hunnduko, hono no neɗɗo haaldirta e yigoo muuɗum noon, de Muusaa soƴƴoo to hoɗorde, ammaa o yoppan Yoosuwa ɓii Nuun ballo makko oon ley toon.
Ŋaarnde Muusaa to Joomiraaɗo
12 Muusaa wi'i Joomiraaɗo:
— A wi'ii kam: «arda yimɓe ɓe, ammaa a wi'aay kam moy woni mo njaadammi.» A wi'ii kam: «miɗo anndiri ma e innde maaɗa, a heɓii du moƴƴere to am.» 13 Ndelle miɗo ŋaare, si mi heɓii moƴƴere to maaɗa fu, hollam laawol maaɗa heɓa mi annde, de mi ɓeyda heɓude moƴƴere maaɗa. Wooɗi miccoɗaa wo aan jeyi lenyol ngool.
14 Ndeen Joomiraaɗo wi'i:
— Mi yaadan e maaɗa, mi hokkete du powtiri.
15 Muusaa wi'i:
— Si aan e hoore maa a yaadataa e amin fu, taa dillin min e nokku o. 16 Si a yaadaay e amin noy faamirtee a ndaardii min moƴƴere maa, miin e yimɓe maaɗa. Sanaa njaadaa e amin. Sabo wo ɗuum senndata min e lenyi adunaaru keddiiɗi ɗiin.
17 Ndeen Joomiraaɗo wi'i Muusaa:
— Mi waɗan ko mbiiɗaa ɗuum ngam a heɓii moƴƴere to am, miɗo anndiri ma e innde maaɗa du.
18 Ndeen Muusaa wi'i:
— Miɗo ŋaare, hollam teddeengal maaɗa.
19 Joomiraaɗo wi'i Muusaa:
— Mi waɗan moƴƴuki am fuu ƴaɓɓoo yeeso maaɗa, ndeen mi inndan innde am wi'eteende «Joomiraaɗoa» faa nanaa. Wooɗi mi hollan hinney am mo njiɗumi, mi hollan yurmeende am du mo njurmiimi. 20 Ammaa a yi'ataa yeeso am, sabo walaa ji'oowo yeeso am de wuura. 21 Inan njaayri dow tefaare to ndarotoɗaa ɗakkol am ɗo. 22 Nde teddeengal am ƴaɓɓotoo ndeen, mi suuɗete ley ceekol tefaare, de mi suddire junngo am faa nde ƴaɓɓiimi. 23 Ndeen mi itta ngo, de nji'iraa kam gaɗa sabo walaa ji'oowo yeeso am.