Waɗugol ngaari kaŋŋe
32
1 Wooɗi, nde yimɓe ɓeen njiinoo Muusaa neeɓi dow waamnde wartaay fu, ɓe kawriti to Haaruuna, ɓe piilii ɗum, ɓe mbi'i:— War, waɗan min alla'en ardotooɓe min sabo Muusaa burtinɗo min e leydi Misira oon, min anndaa ko hewtii ɗum.
2 Ndeen Haaruuna wi'i ɓe:
— Ittee, kootone kaŋŋe gonɗe e noppi rewɓe mon e ɓiɓɓe mooɗon worɓe e rewɓe ngaddanon kam.
3 Ndeen ɓe fuu ɓe itti kootone ɗeen, ɓe ngaddi to makko. 4 O jaɓi ɗe, o siiwi, o tafi tooru dow alhaali ngaari. Ndeen ɓe mbi'i:
— Ndaar alla maaɗa Israa'iila, burtinoyɗo en e leydi Misira!
5 Nde Haaruuna nannoo ɗum fu, darni kaaƴe, waɗi sakkirde yeeso mayri. O wi'i:
— Jaango en ngaɗan iidi teddinen Joomiraaɗo.
6 Ɓe ummii gilla subaka, ɓe cakki kirsamaaji buleteeɗi. Katin ɓe ngaɗi kirsamaaji jeɗeteeɗi. Ndeen ɓe njooɗi ɓe nyaami, ɓe njari, de ɓe ummii ɓe ngaɗi fijo. 7 Joomiraaɗo wi'i Muusaa:
— Yawɗa jippa, sabo yimɓe ɓe mburtinoyɗaa e leydi Misira ɓeen kalkii ko'e muɓɓen. 8 Ɓe njoppii laawol am law, ɓe njokkaay ko njamirmi ɓe. Ɓe ngaɗanii ko'e maɓɓe tooru dow alhaali ngaari, iɓe kippoo yeeso mayri, iɓe cakkana ndi, iɓe mbi'a: «Ndaar alla maaɗa Israa'iila, burtinɗo ma e leydi Misira!»
9 Joomiraaɗo wi'i Muusaa: Mi yi'i yimɓe ɓe. Si goonga wo ɓe sattuɓe, yoorɓe ko'e. 10 Wooɗi, joonin kaa accam sabo mi tikkanii ɓe, tikkere am wulan ɓe hono yiite, de mi halka ɓe. Ammaa aan, mi waɗan laatoɗaa lenyol ɗuuɗungol.
11 Muusaa ŋaarii Laamɗo Joomiraaɗo muuɗum, wi'i:
— Yaa Joomiraaɗo, saabe ɗume tikkere maaɗa mawni dow yimɓe maaɗa ɓe mburtinoyɗaa ley leydi Misira e semmbe maa e manngu maa? 12 Ko saabii aɗa waɗa faa Misirankooɓe keɓa mbi'a a wurtinno ɓe dow anniya bonɗo faa mbaraa ɓe nder baamle, kalkaa ɓe e adunaaru? Sawra Joomiraaɗo, waylu anniya maaɗa dow tikkere maa, taa halku yimɓe maaɗa! 13 Siwtor amaana mo ngaɗanɗaa maccuɓe maaɗa Ibrahiima e Isiyaaku e Israa'iila bi'etenooɗo Yaakuuba, kamɓe kunaniɗaa e innde maaɗa mbiiɗaa a waɗan lenyol maɓɓe ɗuuɗa hono koode. Mbiiɗaa katin a hokkan lenyol maɓɓe leydi ndi, faa ndi laatoo ndongu maɓɓe faa abada.
14 Ndeen Joomiraaɗo wayliti anniya muuɗum, halkaay yimɓe ɓeen katin.
15 Muusaa jippii waamnde ndeen, ina jogii alluuje ɗiɗi, jamirooje Joomiraaɗo ina mbinndaa to gereeji majje gaɗa e yeeso fuu. 16 Laamɗo e hoore muuɗum sehi alluuje ɗeen, de winndi binndi ngonɗi dow majje ɗiin.
17 Nde Muusaa e Yoosuwa ngartannoo ndeen, Yoosuwa nani no yimɓe ilinirta. Ndeen o wi'i Muusaa:
— Ɗum wo olko konu ley hoɗorde.
18 Muusaa jaabii mo, wi'i:
— Ɗum wanaa jimi jaalagol naa du bullaali jaaleede. Ko nanammi ɗuum wo jimi weltaare tan.
19 Nde Muusaa ɓattitinoo hoɗorde ndeen fu, yi'i ngaari ndiin, nani iɓe njima, iɓe mbama. O tikki sanne, faɗɗi o fusi alluuje ɗe o tiiginoo ɗeen e leydi dow waamnde ndeen. 20 O adi ngaari ndi yimɓe ɓeen ngaɗi ndiin, o wuli ndi, o niisi ndi, de o sankiti conndi mayri nder ndiyam, o waɗi Israa'iila'en ɓeen njari ɗam. 21 O wi'i Haaruuna:
— Ɗume yimɓe ɓe ngaɗi ma de ngaddanɗaa ɓe hakke o?
22 Haaruuna jaabii, wi'i:
— Laamɗo reene, taa tikkanam sabo aan e hoore maaɗa aɗa anndi no yimɓe ɓe njiɗiri waɗude ko boni. 23 Ɓe mbi'u kam: «Waɗam min allaaji ardotooɗi min, sabo Muusaa burtinoyɗo min e leydi Misira oon min anndaa ko hewtii ɗum.» 24 Ndeen mbiimi ɓe, ɓe itta kootone maɓɓe kaŋŋe ɓe ngadda. Nde ɓe ittunoo ɗe ɓe ngaddi fu, miin du paɗɗumi ɗe nder yiite, wakkati oon ngaari ndi wurtii ley magge!
25 Muusaa tawi yimɓe ɓeen laalake, sabo Haaruuna accii iɓe ngaɗa ko ɓe njiɗi faa wayɓe maɓɓe keɓa no njaltinortoo ɓe. 26 Ndelle o darii to dammbugal hoɗorde, o ƴepti daande, o wi'i:
— Jokkuɗo Joomiraaɗo fuu, wara to am ɗo!
— Ndaar ko Laamɗo Joomiraaɗo Israa'iila wi'i: «Neɗɗo fuu ada kaafaahi muuɗum tigoo, de puɗɗiron e dammbugal ngaal faa yaade ngaal to, mbaron banndiraaɓe mooɗon e yigiraaɓe mooɗon e wondiiɓe mooɗon.»
28 — Lewinkooɓe ɓeen ngaɗi hono no o yamiri noon. Nyalaande ndeen worɓe 3 000 mbaraa. 29 Muusaa wi'i Lewinkooɓe ɓeen:
— Hannden on kalfinii ko'e mooɗon e gollande Joomiraaɗo, on mbarii ɓiɓɓe mooɗon e banndiraaɓe mon. Saabe majjum hannden on keɓii barke.
30 Wooɗi, jaangoore majjum, Muusaa wi'i yimɓe ɓeen fuu:
— On ngaɗii hakke mawɗo, ammaa mi soƴƴoto dow waamnde toon, mi ŋaaroo Joomiraaɗo. Ina hasii o jaɓan, o itta hakke mooɗon.
31 Muusaa soƴƴii to Joomiraaɗo, wi'i ɗum:
— Wayyoo! Yimɓe ɓe ngaɗii hakke mawɗo. Ɓe ngaɗanii ko'e maɓɓe allaaji kaŋŋe. 32 Ammaa joonin, sawra, yaafa hakke maɓɓe. Si wanaa noon fu, miɗo ŋaare, ittaa innde am ley dewtere maaɗa nde mbinnduɗaa ndeen.
33 Ammaa Joomiraaɗo wi'i Muusaa:
— Wo gaɗuɗo hakke tan ittanmi innde muuɗum ley dewtere am. 34 Wooɗi, joonin yahu arda yimɓe ɓeen yaade nokkuure nde kaalannomaami haala mum ndeen. Ndaar, malayka am ardete. E noon fuu, si nyalaande jukkude ɓe warii fu, sikke walaa mi jukkoto ɓe saabe hakke maɓɓe.
35 Joomiraaɗo fiiri yimɓe ɓeen nyawu ndaaɓoowu saabe ngaari ndi ɓe ngaɗi Haaruuna waɗani ɓe ndiin.