No Yoosuwa neliri horooɓe ɗiɗo Yeriko
2
1 Nde yimɓe Israa'iila ngonnoo Sittim ndeen, Yoosuwa ɓii Nuun neli horooɓe ɗiɗo, wi'i ɗum'en:— Njehee, ndaarowee leydi ndiin e ngalluure Yeriko ndeen.
Ɓe njehi. Nde ɓe njottinoo ngalluure Yeriko fu, ɓe njehi, ɓe naati ley suudu debbo woykuruujo, bi'eteeɗo Rahabu. Ɓe mbaali ɗoon. 2 Kaananke Yeriko humpitaa wi'aa:
— Ley jemma o worɓe Israa'iila'en ngari faa kora leydi ndi.
3 Ndelle kaananke oon neli yimɓe to Rahabu, njaha mbi'a ɗum:
— Wurtin worɓe warɓe, naatuɓe suudu maa ɓeen, sabo ɓe ngarii faa ɓe kora leydi ndi fuu.
4 Ammaa Rahabu adi worɓe ɗiɗo ɓeen, suuɗi ɗum'en. O wi'i nulaaɓe kaananke ɓeen:
Si goonga, worɓe gomma ngariino to am, ammaa mi anndaa faro toy ɓe ƴuuri. 5 Nde naange ɓadinoo hiirude, gilla dammbugal huɓeere ndeen ommbaaka, ɓe ndilli. Mi anndaa faro toy ɓe ndilliri. Taaynee ɓe law, ndeen on kewtan ɓe.
6 Ammaa tawi imo suuɗi ɓeen dow suudu makko ley ƴombe ɗe o dekunoo dow mayru. 7 Nulaaɓe kaananke ɓeen mburtii huɓeere ndeen, taayni ɓe. Nde njaltunoo fu, dammbuɗe huɓeere ndeen ommbaa. Ɓe pilii Israa'iilankooɓe ɗiɗo ɓeen dow laawol njahoowol Urdun faa ɓe njottii hunnduko gooruwol ngool.
— Miɗo anndi Joomiraaɗo wattii leydi ndi e juuɗe mooɗon. Kulol mawngol nanngi min saabe mooɗon. Hakkillooji yimɓe fuu ɓantake nder leydi ndi saabe mooɗon. 10 Min nanii no Joomiraaɗo yoorniri diyeele maayo Maaliya yeeso mooɗon nde mburtinoɗon Misira. Min nani du ko ngaɗuɗon laamiiɓe Amorinkooɓe ɗiɗo wonɓe lettugal Urdun ɓeen, no kalkirɗon Sihon e Ogga. 11 Nde min nannoo ɗum fu, nesiiji amin taƴi, kulol mawngol nanngi min saabe mooɗon. Laamɗo Joomiraaɗo mon, kam woni Laamɗo dow kammu e dow leydi ɗo fuu. 12 Ammaa joonin kunanee kam e innde Joomiraaɗo. Yalla hono no ngaɗirammi on moƴƴere ni, onon du on ngaɗanan kam miin e yimɓe am iri moƴƴere ndeen. Kokkee kam maande hoolniinde holloore on 13 accan baaba am e inna am e sakiraaɓe am worɓe e rewɓe e sakiraaɓe muɓɓen fuu mbuura, ndannon yonkiiji amin e maayde. 14 Worɓe ɓeen mbi'i mo:
— Yonkiiji amin laatoo loomtuɗi yonkiiji mooɗon, ammaa taa haaltan fay gooto haala amin kaan. Nyannde Joomiraaɗo hokki min leydi ndi fu, min ngaɗante ko wooɗi, min kiɓɓinan ko min aadanii ma ɗuum.
15 Suudu Rahabu wo dow kokuwol huɓeere ndeen nyiɓaa. Saabe majjum o heɓi o jippiniri worɓe ɗiɗo ɓeen ɓoggol faro wudde kokuwol ngool. 16 O wi'i ɓe:
— Ndewee dow baamle heɓa taa filotooɓe on ɓeen kawra e mooɗon. Cuuɗee toon balɗe tati faa nde ɓe ngarti, de njokkon laawol mooɗon.
17 Ɓe mbi'i mo:
— Min ngaɗan ko min kunanii ma ɗuum fuu. 18 Aan du, inan ko ngaɗataa. Nde min naatoyta e leydi mon ndi fu, kaɓɓaa ɓoggol boɗewol faro wudde nde njippinirɗaa min ndeen. Adaa baaba maa e inna maa e sakiraaɓe maa e yimɓe saare baaba maa fuu, ngaddaa nder suudu maa. 19 Si goɗɗo maɓɓe wurtake ley suudu maa, bonanda maayde muuɗum heddoto dow hoore muuɗum, minen kaa min keddoto min laaɓuɓe e majjum. Ammaa neɗɗo fuu tawaaɗo ley suudu maa, si junngo goɗɗo meemii ɗum, ndeen kaa bonanda majjum waran dow ko'e amin. 20 Si a ɓangini haala amin ka to woɓɓe, ndeen kaa min ngaldaa e hunayeere nde min kunanii ma ndeen katin.
21 Rahabu wi'i:
- Wooɗi, ɗum laatoroo hono no mbiiruɗon noon.
Ndeen o jippini ɓe, ɓe ndilli. Wakkati oon o haɓɓi ɓoggol boɗewol ngool to wudde suudu makko.
22 Horooɓe ɓeen njehi dow baamle, ngaɗi toon balɗe tati faa nulaaɓe kaananke taaynunooɓe ɓe ɓeen njeccii Yeriko. Ɓeen tefi ɓe nokku fuu de njiitaay. 23 Horooɓe ɗiɗo ɓeen njippii baamle, peƴƴiti maayo, ngarti to Yoosuwa ɓii Nuun. Ɓe kumpiti ɗum ko hewtii ɓe fuu. 24 Ɓe mbi'i mo:
— Joomiraaɗo watti leydi ndiin fuu e juuɗe men. Yimɓe wonɓe toon fuu kulii en sanne faa iɓe mbemmbaa.