Dewtere Ardiiɓe
Wi'eteende Sarotooɓe
No Yahuudiyankooɓe e Simeyonkooɓe koniri Kanaaninkooɓe wonɓe horɗoore
1
1 Wooɗi, caggal maayde Yoosuwa Israa'iilankooɓe ƴami Joomiraaɗo, mbi'i:— Hakkunde amin, lenyol ngole artotoo yaha, hona Kanaaninkooɓe?
2 Joomiraaɗo jaabii ɓe, wi'i:
— Lenyol Yahuuda artoo yaha. Inan mi wattii leydi ndiin e juuɗe maɓɓe.
3 Ndeen Yahuudiyankooɓe mbi'i sakiraaɓe muɓɓen yimɓe Simeyon:
— Ngaree mballee min faa konen Kanaaninkooɓe, de teeten leydi ndi min kokkaa ndiin. Caggal ɗuum, minen du, min njaadan e mooɗon, min mballon teeton leydi mooɗon.
Noon yimɓe Simeyon njaadiri e sakiraaɓe muɓɓen, yimɓe Yahuuda.
4 Nde Yahuudiyankooɓe puɗɗuno wolde ndeen fu, Joomiraaɗo watti Kanaaninkooɓe e Perisinkooɓe nder juuɗe maɓɓe. Ɓe kalki worɓe 10 000 nder ngalluure Beejek.
5 Ɓe tawi du Adoni-Beejek toon, ɓe koni ɗum. Ɓe njaali du Kanaaninkooɓe e Perisinkooɓe jooɗinooɓe toon ɓeen. 6 Adoni-Beejek doggi, de ɓe ndiiwi ɗum, ɓe nanngi. Ɓe taƴi kolli juuɗem gori e kolli koyɗem gori fuu.
7 Ndeen Adoni-Beejek wi'i:
— Si goonga, ina woodunoo kaanankooɓe 70 ɓe taƴumi kolli juuɗe muɓɓen gori e kolli koyɗe muɓɓen gori fuu. Sanaa ɓe cuɓanoo ko'e maɓɓe ko ɓe nyaama ley taabawal am to nyaamammi. Laamɗo yomnitake kam ko ngaɗunoomi ɓe ɗuum fuu.
Ɓe njaari mo Urusaliima, o maayi toon.
8 Yahuudiyankooɓe koni Urusaliima, njaalii huɓeere ndeen. Ɓe mbardi yimɓe mayre fuu kaafaaje, de ɓe mbuli nde. 9 Caggal majjum, ɓe njehi, ɓe konoyi Kanaaninkooɓe jooɗiiɓe dow baamle e nder njaayri e ɗakkol maayo fuu. 10 Ɓe njehi to ngalluure Heberon (innde mayre arande wo Arba). Ɓe koni Kanaaninkooɓe jooɗiiɓe toon. Ɓe mbari Sesayankooɓe e Akimankooɓe e Talmiyankooɓe. 11 Ɓe ndilli ɗoon, ɓe njehi, ɓe koni yimɓe ngalluure Debir. Innde mayre arande wo Sefer Kiriyat-Sefer (ɗum na fiirta «Ngalluure Dewtere»).
12 Kaalibu wi'i:
— Neɗɗo fuu konuɗo ngalluure Kiriyat de jaalii nde fu, mi hokkan ɗum ɓiyam debbo, ɓaŋa.
Surbaajo oon ina wi'ee Akiisa. 13 Otoniila ɓii minyo Kaalibu bi'eteeɗo Keenas, jaalii nde. Ndeen Kaalibu hokki mo Akiisa ɓiyum debbo oon, o ɓaŋi.
14 Caggal ɓangal maɓɓe, Akiisa ɓilli Otoniila faa ŋaaroo bammum ngesa. Ndeen Akiisa waɗɗii araawa, yehi to bammum, jippii araawa ngaan. Baabiiko ƴami mo:
— Ɗume kaajaɗaa?
15 O jaabii, o wi'i:
— Baaba, mi warii faa mi ŋaaree ngaɗanaa kam moƴƴere. A hokkorii kam horɗoore to leydi njoorndi. Joonin miɗo ŋaare, kokkoraa kam du ilduɗe ndiyam du.
Saabe majjum Kaalibu hokki mo ilduɗe gonɗe dow baamle e gonɗe ley naɗɗi fuu.
16 Lenyol Keniyankooɓe esiraaɓe Muusaa du mburtodii e Yahuudiyankooɓe gilla ngalluure wi'eteende ngalluure Gelleeje faa yaade njaayri Yahuuda, horɗoore ngalluure Arat. Ɓe ngaɗi toon joonnde maɓɓe hakkunde Amelek'en.
17 Caggal ɗuum, Yahuudiyankooɓe njaadi e Simeyoninkooɓe, sakiraaɓe muɓɓen ɓeen. Ɓe koni Kanaaninkooɓe wonɓe ley ngalluure Sefat. Ɓe kalki ngalluure ndeen. Ɓe inndiri nde Horma (ɗum na fiirta «Halkere»). 18 Katin du, Yahuudiyankooɓe njehi njeyti galluuje Gaaja e Askelon e Ekeron e gure piiliiɗe ɗoon fuu.
No Israa'iilankooɓe ndonkiri riiwude Kanaaninkooɓe
19 Joomiraaɗo ina wondi e yimɓe Yahuuda. Ɓe ndiiwi jooɗiiɓe dow baamle ɓeen, ammaa yimɓe jooɗiiɓe nder naɗɗi, jogiiɓe torkooji pucci ngaɗiraaɗi njamndi ɓeen kaa, ɓe ndonki riiwude ɗum'en.
20 Kaalibu hokkaa Heberon hono no Muusaa wiirunoo. O riiwi lenyi ɓiɓɓe Anak tati gonnooɗi toon ɗiin.
21 Benyaminkooɓe du mbaawaay riiwude Yebusinkooɓe jooɗiiɓe ley Urusaliima. Yebusinkooɓe ɓeen keddodii e maɓɓe ley Urusaliima faa warde hannden.
22 Ɓiɓɓe Yuusufi du njehi konoyi Baytila. Joomiraaɗo ina wondi e muɓɓen. 23 Ɓe neli woɓɓe korowa ngalluure Baytila. (Arande innde ngalluure ndeen wo Lus.)
24 Nde horooɓe ɓeen ngonnoo ina ndaara ngalluure ndeen, nji'i gorko gomma ina wurtoo ley mayre. Ɓe mbi'i ɗum:
— Hey! Hollu min no min naatirta ley ngalluure nde. Ndeen min ngaɗante mbooɗirka.
25 Oon holli ɓe, de ɓe naati ley mayre. Ɓe mbardi yimɓe huɓeere ndeen fuu kaafaaje. Ammaa gorko oon e suudu muuɗum fuu, ɓe acci ɗum'en ndilli e jam. 26 Ndeen gorko oon dilliri leydi Hitiyankooɓe. O nyiɓi toon ngalluure, o inndiri nde Lus. Noon ngalluure ndeen inndirtee faa warde hannden.
27 Yimɓe Manasa du ndiiwaay jooɗiiɓe ley ngalluure Bayti-Se'an e Ta'anak e Dor e Yibileyam e Megiddo e gure piiliiɗe galluuje ɗeen fuu, sabo Kanaaninkooɓe ɓeen ciini jooɗaade e leydi ndiin. 28 Nde Israa'iilankooɓe keɓunoo semmbe ndeen, ngaɗi ɓe maccuɓe muɓɓen, ammaa ndiiwaay ɓe.
29 Efrayimiyankooɓe du ndiiwaay Kanaaninkooɓe jooɗiiɓe ley ngalluure Gejer. Kanaaninkooɓe ɓeen keddii hakkunde maɓɓe ley Gejer ɗoon.
30 Yimɓe Jabulon du mbaawaay riiwude jooɗiiɓe ley ngalluure Kitiron e ngalluure Nahalol. Kanaaninkooɓe ɓeen njooɗii hakkunde maɓɓe, laatii maccuɓe maɓɓe.
31 Yimɓe Aser du ndiiwaay jooɗiiɓe ley ngalluure Akko e Sidon e Aalap e Ak Isip e Helba e Afik e Rehoob. 32 Ɓe njooɗodii e Kanaaninkooɓe wonɓe ley leydi ndiin, sabo ɓe ndiiwaay ɗum'en.
33 Yimɓe Naftali du mbaawaay riiwude yimɓe wonɓe ley ngalluure Bayti-Semes e ngalluure Bayti-Anat. Wakkati oon, ɓe njooɗodii e Kanaaninkooɓe ɓeen, ammaa ɓe ngaɗi ɗum'en maccuɓe maɓɓe.
34 Amorinkooɓe ndiiwi ɓiɓɓe Dan faa e leyɗe gonɗe dow baamle. Caggal ɗuum, ɓe njaɓaay ɓeen njippii nder njaayri katin. 35 Ɓeen keddii dow waamnde Heres e ngalluure Ayalon e ngalluure Sayalbiima. Ammaa caggal ɗuum, ɓiɓɓe Yuusufi ndawrani ɓe, ngaɗi ɓe maccuɓe muɓɓen. 36 Keerol leydi Amorinkooɓe wo gilla ƴeeŋirde Jahe faa yaade yeeso Sela.