No Joomiraaɗo feliri yimɓe muuɗum
2
1 Joonin, maleyka Joomiraaɗo ummii gilla Gilgal yehi Bokim. O wi'i Israa'iilankooɓe:— Wo miin wurtini on leydi Misira, waddi on nder leydi ndi kunaniimi maamiraaɓe mooɗon mi hokkan ɗum'en. Katin du, wo miin wi'unoo mi halkataa amaana mo ngaddumi e mooɗon oon faa abada. 2 Onon du, mi yamirii on taa ngaɗidee amaana e yimɓe jooɗiiɓe ley leydi ndiin, de cankiton du kirsirɗe ɗe ɓe nyiɓani tooruuji maɓɓe ɗeen. Ammaa on ngaɗaay ko mbi'umi on. Ko saabii ngaɗɗon nii? 3 Wooɗi, joonin inan ko mbi'ammi on: Mi riiwataa yimɓe ɓeen yeeso mooɗon katin. Ɓe takkoto on, ɓe laatanoo on torrooɓe. Tooruuji maɓɓe du laatanto on tuugol (bedorgal) faa ɓe nannga on.
4 Nde maleyka Joomiraaɗo haaldunoo e yimɓe Israa'iila haalaaji ɗiin fuu, jamaa oon fuu woyi bojji cattuɗi. 5 Ɗuum waɗi de nokkuure ndeen inndiraa Bokim (ɗum na fiirta «bojji»), de ɓe ngaɗani Joomiraaɗo sadaka kirsamaaji ɗoon.
6 Caggal ɗuum, Yoosuwa waynii yimɓe ɓeen. Mono fuu hooti to leydi ndi roni.
Maayde Yoosuwa
7 Israa'iilankooɓe ɗowtanii Joomiraaɗo ley nguurndam Yoosuwa fuu. Ɓe ɗowtanii mo du haaddi nguurndam mawɓe heddiiɓe, yi'unooɓe golleeji mawɗi ɗi Joomiraaɗo waɗani Israa'iila ɗiin fuu.
8 Yoosuwa ɓii Nuuna maccuɗo Joomiraaɗo maayi tawi in woodi duuɓi 110. 9 Ɓe uwi ɗum nder leydi laatiindi ndongu muuɗum, ley Timnat-Heres nder baamle Efrayim, soɓɓiire waamnde Ga'as.
No Israa'iilankooɓe celiri ɗowtanaade Joomiraaɗo
10 Wooɗi, yimɓe jamaanu Yoosuwa ɓeen du fuu maayi, kawritowi e maamiraaɓe muɓɓen. Caggal maɓɓe, jamaanu goɗɗo ummii, ɓe anndaa Joomiraaɗo. Ɓe nji'aay du golleeji ɗi o waɗani Israa'iila'en. 11 Ndeen, ɓe ngaɗi ko boni yeeso Joomiraaɗo, ɓe ɗowtanii allaaji bi'eteeɗi Ba'al. 12 Ɓe njoppi Joomiraaɗo, Laamɗo maamiraaɓe maɓɓe, burtinɗo ɓe e leydi Misira oon. Ɓe ɗowtanii allaaji goɗɗi ɗi lenyi piiliiɗi ɓe. Ɓe cujidani ɗi, ɓe ɓernini Joomiraaɗo. 13 Si goonga ɓe njoppi Joomiraaɗo, ɓe ɗowtani Ba'al e Astoreti'en.
14 Saabe majjum, tikkere Joomiraaɗo huɓɓi ɓe. Ndeen o watti ɓe e juuɗe wayɓe maɓɓe, lenyi janani teetooji ɓe jawdi maɓɓe. O watti ɓe e juuɗe wayɓe maɓɓe fiiliiɓe ɓe. Ɓe ngalaa katin semmbe daraade yeeso wayɓe maɓɓe. 15 Nde ɓe mburtii faa ɓe kaɓowee fu, Joomiraaɗo ina habda e maɓɓe, ina waɗa ɓe kalkee hono no hunoraninoo ɓe noon. Ɓe njari boneeji faa faltii.
16 Caggal ɗuum, Joomiraaɗo hokki ɓe ardiiɓe, ndanni ɓe e juuɗe bonɓe teetooɓe ɓe. 17 Ammaa e ɗuum fuu, Israa'iilankooɓe kettindaaki ko ardiiɓe ɓeen mbi'i ɗum'en. Ɓe ndewi allaaji goɗɗi, ɓe tuunini ko'e maɓɓe e majji, ɓe cujidani ɗi. Ɓe njoppi laawol maamiraaɓe maɓɓe law, jokkunooɓe jamirooje Joomiraaɗo. Ɓe ngaɗaay hono no ɓeen ngaɗunoo noon. 18 Nde Joomiraaɗo nani uumaali maɓɓe ley torraaji yimɓe ɓillooɓe ɓe fu, yurmoto ɓe. Ndeen o hokka ɓe ardiiɗo, o wonndu e makko du. Joomiraaɗo ina danna ɓe e juuɗe wayɓe maɓɓe haddi balɗe ardiiɗo oon fuu. 19 Ammaa nde ardiiɗo oon maayi fu, ɓe coƴƴoto e waɗude hakkeeji ɓurɗi ɗi maamiraaɓe maɓɓe ngaɗunoo arande ɗiin. Iɓe ndewa allaaji goɗɗi, iɓe ɗowtanoo ɗi, iɓe cujidana ɗi. Ɓe njoorni ɓerɗe maɓɓe, ɓe catti e waɗude golleeji bonnɗi.
20 Tikkere Joomiraaɗo huɓɓi ɓe, de wi'i:
— Saabe yimɓe ɓeen kalkii amaana mo ngaddunoomi e maamiraaɓe muɓɓen, saabe ɓe ɗowtanaaki jamirooje am, 21 miin du, mi riiwataa fay lenyol gootol yeeso maɓɓe hakkunde lenyi ɗi Yoosuwa yoppi caggal maayde muuɗum ɗiin. 22 E lenyi ɗiin ndaartindortoomi ɓe faa mi ndaara yalla ɓe njokkan jamirooje am hono no maamiraaɓe maɓɓe njokkirnoo, naa ɓe njokkataa ɗe.
23 Saabe majjum Joomiraaɗo yoppi lenyi ɗiin. O riiwaay ɗi law, o wattaay ɗi e junngo Yoosuwa.