3
1 Inan lenyi ɗi Joomiraaɗo yoppi faa ndaartindoroo Israa'iilankooɓe ɓe kaɓaayno e Kanaaninkooɓe abada.2 O waɗii ɗum faa jamaanu oon ekitoo wolde, sabo ɓe anndaano wolde tafon.3 Lenyi accaaɗi ɗiin wo laamiiɓe Filistiyankooɓe njoyo, wooɗi du Kanaaniyankooɓe fuu, e Sidoninkooɓe, e Hiwiyankooɓe jooɗiiɓe dow baamle Liban, gilla waamnde Ba'al-Hermon faa yottoo ngalluure Hamat.4 Ɓe accaama faa Israa'iila ndaartindoree ɓe, heɓa ndaaree yalla ɓe ɗowtanto ko Joomiraaɗo wi'i maamiraaɓe maɓɓe e hunnduko Muusaa, naa ɓe ɗowtantaako ɗum.
5 Ndeen Israa'iilankooɓe njooɗii hakkunde Kanaaninkooɓe e Hitiyankooɓe e Amorinkooɓe e Perisiyankooɓe e Hiwiyankooɓe e Yebusiyankooɓe. 6 Ɓe ɓaŋi ɓiɓɓe muɓɓen rewɓe, ɓe kokki ɗum'en ɓiɓɓe maɓɓe rewɓe, ɓaŋi. Ɓe cujidani du allaaji lenyi ɗiin.
Otoniila ardiiɗo
7 Wooɗi, Israa'iilankooɓe ngaɗi ko boni yeeso Joomiraaɗo. Ɓe njeggiti Laamɗo Joomiraaɗo maɓɓe, ɓe cujidani tooruuji bi'eteeɗi Ba'al e tooruuji dewi bi'eteeɗi Asterat. 8 Saabe majjum tikkere Joomiraaɗo huɓɓi yimɓe Israa'iila, faa watti ɓe e junngo kaananke soɓɓiire mo Mesopotaamiya, bi'eteeɗo Kuusan-Risatayim. Oon jaalii ɓe. Ɓe ngollani ɗum faa waɗi duuɓi jeetati. 9 Ammaa nde Israa'iilankooɓe mbullinoo Joomiraaɗo ndeen, o hokki ɓe ardiiɗo. Oon woni Otoniila ɓii Keenas, minyo Kaalibu. 10 Ruuhu Joomiraaɗo jippii dow makko, o laatii ardiiɗo Israa'iila. Caggal ɗuum, o yehi o honi Kuusan-Risatayim, kaananke Mesopotaamiya. Joomiraaɗo watti kaananke oon e junngo makko. O heɓi jaalagol dow muuɗum. 11 Noon leydi ndiin heɓiri jam faa waɗi duuɓi 40. Ndeen Otoniila ɓii Kenas oon maayi.
Ehut ardiiɗo
12 Ɓiɓɓe Israa'iila puɗɗiti waɗude ko boni yeeso Joomiraaɗo. Nde ɓe ngaɗunoo ko boni yeeso makko ndeen, o waɗi kaananke Mo'ab, bi'eteeɗo Egelon jaalii ɓe. 13 Egelon hawrunduri Amoninkooɓe e Amelek'en, ɓe njehi ɓe koni Israa'iila, ɓe teeti ngalluure Gelleeje. 14 Israa'iilankooɓe ngollani Egelon faa waɗi duuɓi sappo e jeetati.
15 Ndeen Israa'iilankooɓe mbullii Joomiraaɗo hisina ɗum'en, de o hokki ɓe ardiiɗo. Oon woni Ehut ɓii Gera jeyaaɗo e lenyol Benyamin. Wo o nannandeejo. Israa'iilankooɓe kokki mo, o yaara lampo ngo ɓe mboowi yoɓude kaananke Mo'ab ngoon.
16 Wooɗi, Ehut adi kaafaahi njuutuki ngaɗoohi fiyande. O haɓɓi ki e wuttudu makko gere nyaamo ley saaya. 17 Ndeen o yehi, o hokki Egelon neldal ngaal. Tawii Egelon wo neɗɗo payɗo sanne. 18 Nde Ehut yottinnoo neldal ngaal fu, soƴƴodii e yaadiraaɓe muuɗum joginooɓe ngal ɓeen.
19 Ammaa nde ɓe njottinoo to tooruuji cehaaɗi gonɗi ley Gilgal ndeen, kanko kaa o soƴƴii to kaananke Mo'ab oon, o wi'i ɗum:
— Aan kaananke, miɗo woodani ma kabaaru tedduɗo sanne.
Kaananke oon wi'i maccuɓe muuɗum:
— Ndeƴƴinee!
Ndeen ɓe fuu, ɓe mburtii, ɓe njoppi ɓeen. 20 Ehut yottii kaananke oon tawi imo jooɗii ley suudu makko feewundu, nyiɓaandu dow suudu makko laamordu nduun.
Ehut wari to makko, wi'i mo:
— Miɗo woodani ma kabaaru ƴuuruɗo to Laamɗo.
Ndeen kaananke oon ummii dow jooɗorgal muuɗum. 21 Ehut foorti junngo muuɗum nano, soorti kaafaahi ngonnooki e wuttudu mum gere nyaamo kiin, de yuwi ki e reedu makko. 22 Kaafaahi kiin e cenngal muuɗum fuu naati, de ɓellere uddi ki, sabo o soortaay ki ley reedu oon. Ndeen coowri wurtii e reedu oon.
23 Caggal ɗuum, Ehut wurtorii to danki suudu nduun, ommbi dammbuɗe mayru, de sokii ɗe. 24 Wakkati Ehut dillunoo ndeen, maccuɓe kaananke oon ngari nji'i dammbuɗe suudu nduun ina cokii. Ɓe miilii wo ley bawlirɗe gonɗe nder suudu ɗeen o naati faa o waɗa haaju makko. 25 Ɓe keɗii ɗoon faa ɓe ndonki, ammaa o omtanaay ɓe dammbuɗe ɗeen. Nde ɓe njiinoo ɓooyi o omtaay ɗe fu, ɓe kooƴowi cokitirɗe, ɓe omti ɗe. Ɓe nji'ii joomiiɓe ina waali e leydi wo maayɗo.
26 Wooɗi, wakkati ɓe neeɓunoo e heɗaade ndeen Ehut heɓi daɗi. O ƴuuri hakkunde tooruuji cehaaɗi ɗiin, o faltii. O yottii Seyira. 27 Nde o yottinoo ɗoon fu, o fuufi luwal konu dow baamle leydi Efrayimankooɓe. Wakkati oon Israa'iilankooɓe mburtii njippodii e makko dow baamle ɗeen, imo ardii ɓe.
28 O wi'i ɓe:
— Njokkee kam, sabo Joomiraaɗo wattii Mo'abinkooɓe, wayɓe meeɗen ɓeen e juuɗe men.
Ndeen ɓe njokki mo, ɓe njehi ɓe teeti peƴƴitirɗe Urdun yaade leydi Mo'ab. Ɓe paddii ɗe taa fay gooto feƴƴita. 29 Nyannde muuɗum, ɓe mbari Mo'abinkooɓe waɗooɓe hono yimɓe 10 000. Ɓe fuu wo ɓe worɓe semmbinɗinɓe, waawuɓe konu. Walaa fuu kisuɗo e maɓɓe. 30 Nyalaande majjum, Israa'iilankooɓe mari Mo'abinkooɓe. Ndeen leydi ndiin heɓi jam faa waɗi duuɓi 80.
Samgar ardiiɗo
31 Caggal Ehut, Samgar ɓii Anat laatii ardiiɗo. Kanko wariri Filistiyankooɓe 600 e sawru soggirdu ga'i woodundu kural. Kanko du o hisini Israa'iila'en.