No Israa'iila'en cuɓorii jokkude Joomiraaɗo
24
1 Yoosuwa hawrunduri lenyi Israa'iila fuu ley Sikem. O noddi mawɓe e hooreeɓe e sarotooɓe e ardiiɓe golleeji feereeji Israa'iila fuu. Ɓe fuu ɓe ngari, ɓe ndarii yeeso Laamɗo. 2 Yoosuwa wi'i jamaa oon fuu:— Inan ko Joomiraaɗo, Laamɗo Israa'iila wi'i: «Arande maamiraaɓe mon njooɗakeno caggal maayo Efaratis. Ɓe cujidaniino allaaji feere. Gooto maɓɓe wo Tera, baaba Ibrahiima e Nakor. 3 Ndeen ittumi maamii on Ibrahiima caggal maayo toon, njaarumi ɗum faa yiiloo ley leydi Kanaana fuu. Mi hokkii mo lenyol ɗuuɗungol. Mi hokkii mo Isiyaaka. 4 Isiyaaka du, mi hokkii ɗum Yaakuuba e Isuwa. Mi hokkii Isuwa leydi ngonndi dow baamle Seyir (to Edom) faa ndi laatoo ndongu muuɗum. Ammaa Yaakuuba e ɓiɓɓe mum njipporii leydi Misira. 5 Caggal ɗuum nelumi Muusaa e Haaruuna, kiitoriimi Misirankooɓe masiibaaji mawɗi ɗi ngaɗumi hakkunde muɓɓen. Ndeen mburtimmi on. 6 Nde mburtinnoomi baabiraaɓe mooɗon Misira fu, Misirankooɓe taayniri ɓe torkooji pucci faa yottaade maayo Maaliya. 7 Ndeen ɓe ƴeewnii kam mi walla ɓe. Ngaɗumi nimre hakkunde maɓɓe e Misirankooɓe. Mi waɗii ndiyam maayo suddii Misirankooɓe, ɗam moɗi ɓe. Onon e ko'e mon on nji'ii ko ngollumi Misirankooɓe.
«Caggal ɗuum on mbuurii nder ladde yoornde faa waɗi duuɓi keewɗi. 8 Ndeen njaarumi on nder leydi Amorinkooɓe, jooɗinooɓe lettugal Urdun ɓeen. Ɓe kaɓi e mooɗon, de ngattumi ɓe e juuɗe mon. Mi halkii ɓe yeeso mooɗon, on ndonii leydi maɓɓe. 9 Nde Balak ɓii Sippor, kaananke Mo'ab umminoo faa haɓa e mooɗon fu, nelani Balaama ɓii Be'or noddowee wara, huɗa on. 10 Ammaa mi salake hettindanaade Balaama. Mi waɗii o barkini on. Hono nii kisinirmi on e junngo Balak. 11 Caggal majjum, eggirɗon gooruwol Urdun, ngarɗon Yeriko. Yimɓe jooɗinooɓe toon ɓeen kaɓdi e mooɗon, kamɓe e Amorinkooɓe e Perisinkooɓe e Kanaaninkooɓe e Hitiyankooɓe e Girgasinkooɓe e Hiwinkooɓe e Yebusinkooɓe. Ɓeen fuu mi watti ɗum'en e juuɗe mon. 12 Mi waɗii kulol manngol nyanngungol hono jabbatti ni ardoo on, faa riiwa laamiiɓe Amorinkooɓe ɗiɗo ɓeen. Wanaa e kaafaaje mon naa e ɓaaruuji mon ndiiwirɗon ɓe. 13 Mi hokkii on leydi ndi on tampanaay. Mi hokkii on du kuɓeeje ɗe on nyiɓaay, ɗe njooɗiɗon e muɓɓen joonin ɗeen. On nyaami ɓiɓɓe gese cabiije e jaytunje, ɗe on aawaay.»
14 Ndeen Yoosuwa ɓeydi, wi'i:
— Joonin kaa, kulee Joomiraaɗo, ngolliranee mo ngoongalaaku e ɓernde wootere. Ittee allaaji ɗi maamiraaɓe mooɗon ɗowtantonoo caggal maayo Efaratis e ley Misira ɗiin. Ɗowtanee Joomiraaɗo tan. 15 Si ɗowtanaade Joomiraaɗo fotanaay on, ndelle hannden cuɓee mo ɗowtantoɗon, yalla allaaji ɗi maamiraaɓe mon ɗowtantonoo caggal maayo Efaratis ɗiin naa wo allaaji Amorinkooɓe ɓe njooɗiɗon ley leydi muɓɓen ɓeen ɗowtantoɗon. Ammaa miin e suudu am kaa, min ɗowtanto Joomiraaɗo.
16 Jamaa oon fuu jaabii, wi'i:
— Aa'a, jam! Abada min njoppataa Joomiraaɗo faa min ɗowtanoo allaaji goɗɗi. 17 Wo Laamɗo Joomiraaɗo meeɗen, kam wurtini en, enen e maamiraaɓe meeɗen nder maccungaaku ley leydi Misira. Kanko waɗi kaayeefiiji mawɗi e gite amin. Kanko reeni min nokku fuu to min njehi e hakkunde lenyi ɗi min ndewi ley leyɗe muɓɓen. 18 Joomiraaɗo kam riiwi lenyi ɗiin fuu, riiwi du Amorinkooɓe jooɗinooɓe ley leydi ndiin. Saabe majjum minen du min ɗowtanto Joomiraaɗo, sabo kanko woni Laamɗo amin.
19 Yoosuwa wi'i yimɓe ɓeen:
— On mbaawataa ɗowtanaade Joomiraaɗo, sabo wo o Laamɗo Ceniiɗo, wo o Laamɗo kiroowo. O jaɓataa hawteede e allaaji feere. O munyataa muurtereeji mooɗon e hakkeeji mooɗon. 20 Si on njoppi Joomiraaɗo, de teddinɗon allaaji goɗɗi fu, o honan on, o hiitoto on du. O halkan on, fay si imo waɗana on ko wooɗi joonin.
21 Yimɓe ɓeen njaabii mo, mbi'i:
— A'aa! Wo Joomiraaɗo tan min ndewata.
22 Yoosuwa wi'i ɓe:
— Wo onon ceedanto ko'e mon, on cuɓake ɗowtanaade Joomiraaɗo tan.
Ɓe njaabii:
— Ayyo!
23 Yoosuwa wi'i ɓe:
— Si wo noon fu, ittee allaaji janani gonɗi hakkunde mooɗon ɗiin. Ngartiree ɓerɗe mon to Joomiraaɗo, Laamɗo Israa'iila.
24 Ndeen yimɓe ɓeen mbi'i Yoosuwa:
— Min ɗowtanto Laamɗo Joomiraaɗo amin, min njokkan ko o wi'i.
25 Nyalaande majjum Yoosuwa waɗi yimɓe ɓeen ngaɗi amaana hakkunde muɓɓen e Joomiraaɗo. O hokki ɗum'en jamirooje e sariyaaji ley Sikem. 26 O winndi haalaaji ɗiin fuu nder dewtere Tawreeta Laamɗo. Ndeen o hooƴi hayre mawnde, o darni nde ley lekki mawki ngonki ɗakkol suudu Joomiraaɗo seniindu. 27 Yoosuwa wi'i yimɓe ɓeen fuu:
— Inan! Hayre nde laatanto en seedee, sabo nde nanii haalaaji ɗi Joomiraaɗo wi'i en fuu. Nde laatanto on seedee, taa mbonnon ko aadinannoɗon Laamɗo mon.
28 Caggal ɗuum, Yoosuwa waynii yimɓe ɓeen, mono fuu hooti to leydi ndi roni.
Maayde Yoosuwa
29 Caggal majjum, Yoosuwa ɓii Nuun, maccuɗo Joomiraaɗo maayi ina woodi duuɓi 110. 30 Ɓe uwi ɗum to leydi ndi roni ley Timnat-Serak nder baamle Efrayim, faro soɓɓiire waamnde Ga'as.
31 Israa'iila'en ɗowtanii Joomiraaɗo ley nguurndam Yoosuwa fuu. Ɓe ɗowtanii mo du haaddi nguurndam mawɓe heddiiɓe, yi'unooɓe golleeji mawɗi ɗi Joomiraaɗo waɗani Israa'iila ɗiin fuu.
32 Israa'iila uwi ƴi'e Yuusufi ɗe ɓe adunoo Misira. Ɓe uwi ɗe ley Sikem nder ngesa nga Yaakuuba soodunoo to ɓiɓɓe Hamor, baaba Sikem, ɓuuɗi cardi hemre. Ɗum laatii ndongu lenyol Manasa e Efrayim, ɓiɓɓe Yuusufi ɓeen.
33 Eliyasar ɓii Haaruuna du maayi. Ɓe uwi ɗum ley Gibiya, huɓeere nde ɓiyiiko Pinehas hokkanoo dow waamnde Efrayim.