Waaju Yoosuwa
23
1 Joonin waɗii duuɓi keewɗi caggal ko Joomiraaɗo hokki Israa'iila'en powtiri dow wayɓe muɓɓen fuu. Yoosuwa du naywii sanne. 2 Saabe majjum Yoosuwa noddi yimɓe Israa'iila fuu, mawɓe e hooreeɓe e sarotooɓe e ardiiɓe golleeji feere, wi'i ɗum'en:— Inan, joonin mi naywii sanne. 3 Onon e ko'e mooɗon on nji'ii huunde fuu ko Laamɗo Joomiraaɗo mon waɗi yimɓe leyɗe ɗeen fuu saabe mooɗon. Laamɗo Joomiraaɗo kam e hoore muuɗum honani on ɓe. 4 Miccitee no kokkirmi on ndawranon yimɓe leydi ndiin e cumnal fodde lenyi mooɗon. Mi hokkii on du lenyi leyɗe keddiiɗe ɗe teetaaka tafon ɗeen, e lenyi leyɗe ɗe kalkumi fuu, gilla gooruwol Urdun faa yottii maayo Manngo faro gorgal. 5 Laamɗo Joomiraaɗo mon riiwan lenyi ɗiin fuu yeeso mooɗon. O ndonan leydi maɓɓe hono no Laamɗo Joomiraaɗo mon aadoraninoo on. 6 Taa celee hakkilande e gollude ko winndaa nder dewtere Tawreeta Muusaa fuu, taa celiree nano naa nyaamo. 7 Taa kawtee e lenyi keddiiɗi hakkunde mon ɗiin. Taa inndee inɗe allaaji maɓɓe, taa kunoree inɗe majji du, taa teddinee ɗi, taa cujidanee ɗi. 8 Ammaa kawtee e Laamɗo Joomiraaɗo mon hono no njokkirɗon mo faa warde hannden ni. 9 Joomiraaɗo riiwii leyɗe mawɗe e cemmbiɗinɗe yeeso mooɗon. Walaa baawɗo daraade yeeso mon faa warde hannden. 10 Neɗɗo mooɗon gooto tan ina waawi riiwude wayɓe ujunere, sabo Laamɗo Joomiraaɗo mon ina honida e mooɗon, hono no o aadoraninoo on noon. 11 Saabe majjum kakkilee, njiɗee Laamɗo Joomiraaɗo mon. 12 Sabo si on celii rewude mo, de naatondirɗon e lenyi keddiiɗi hakkunde mooɗon, ɓaŋondirɗon e maɓɓe, 13 ndeen kaa, anndee e goonga, Laamɗo Joomiraaɗo mon selan riiwude lenyi ɗiin yeeso mooɗon. Ɓe laatanto on hono tuugol, hono looci dow ɓaawe mon, hono gi'e nder gite mon, faa ɗo kalkuɗon nder leydi lobbiri ndi Laamɗo Joomiraaɗo mon hokki on ndiin.
14 Miin kaa, wakkati dillugol am ley adunaaru ɗo ɓadake hono no neɗɗo fuu dillirta ley mayru ni. Gooto mooɗon fuu ina anndi e ɓernde muuɗum e yonki mum no Laamɗo Joomiraaɗo mon tabintiniri haalaaji ɗi wi'unoo on fuu. O tabintini haalaaji makko lobbi fuu, walaa fay ngoota ka o tabintinaay. 15 Goonga, haalaaji lobbi ɗi o haalunoo haala muɓɓen ɗiin fuu tabitii. Noon du tikkere makko nde o haalunoo haala muuɗum ndeen tabitirta faa o halka on e leydi lobbiri ndi o hokki on ndiin. 16 Si on luttii amaana mo Laamɗo Joomiraaɗo mon yamiri on oon, si on ɗowtanake allaaji goɗɗi, si on cujidanii ɗi fu, tikkere Joomiraaɗo saaman dow mooɗon, on kalkan law nder leydi lobbiri ndi o hokki on ndiin.