Lenyi gonɗi caggal Urdun
22
1 Caggal majjum Yoosuwa hawrunduri yimɓe lenyi Ruben e Gad e feccere lenyol Manasa. 2 O wi'i ɗum'en:— On ngaɗii ko Muusaa maccuɗo Joomiraaɗo yamiri on ɗuum fuu. Wooɗi du, on ɗowtanake ko njamirmi on ɗuum fuu. 3 Gilla duuɓi keewɗi faa warde hannden, on enndaay yoppude Israa'iilankooɓe sakiraaɓe mooɗon. On tinnake e jokkude jamirooje Laamɗo Joomiraaɗo mooɗon. 4 Joonin du, Joomiraaɗo hokkii sakiraaɓe mon ɓeen jam, hono no aadiraninoo ɓe. Ndelle, coƴƴee, njehee ley cuuɗi mon nder leydi laatiindi ndongu mon ndi Muusaa maccuɗo Joomiraaɗo hokki on caggal Urdun. 5 Ammaa kakkilee wooɗa, njokkon Tawreeta mo Muusaa maccuɗo Joomiraaɗo hokki on oon faa laaɓa. Njiɗee Laamɗo Joomiraaɗo mooɗon, njokkee laabi makko fuu, ɗowtanee jamirooje makko, tiigonduree e makko, ngollanee mo e ɓerɗe mooɗon fuu e yonkiiji mon fuu.
6 Caggal ɗuum, Yoosuwa barkini ɓe, waynii ɓe, de ɓe kooti to hukumuuji maɓɓe.
7 Wooɗi, Muusaa hokkiino feccere lenyol Manasa ndongu muɓɓen nder leydi Baasan. Ammaa feccere wonnde ndeen, wo Yoosuwa kam hokki ɗum'en leydi ngonndi gorgal Urdun, ɗakkol sakiraaɓe maɓɓe. Yoosuwa waynii ɓe, barkini ɓe, 8 wi'i:
— Kootee to cuuɗi mooɗon, adee jawdi ɗuuɗundi, ndiin woni dammucce keewɗe, e cardi e kaŋŋe e njamndi mboɗeeri e ɓaleeri e kaddule ɗuuɗuɗe sanne. Cenndee jawdi keewndi ndi keɓɗon to wayɓe mon ndiin hakkunde sakiraaɓe mon.
9 Hono nii yimɓe lenyi Ruben e Gad e feccere lenyol Manasa kootiri to cuuɗi muɓɓen. Ɓe ndilli, ɓe njoppi yimɓe Israa'iila heddiiɓe ɓeen ley Silo nder leydi Kanaana. Ɓe ndilliri leydi Galaad, ndi Joomiraaɗo yamirnoo e hunnduko Muusaa ɓe keɓan ndiin.
Haala hirsirde nyiɓaande caggal Urdun
10 Nde yimɓe lenyi Ruben e Gad e feccere lenyol Manasa njottinoo Gelilot caggal Urdun nder leydi Kanaana fu, nyiɓi toon hirsirde mawnde sanne ɗakkol gooruwol ngool. 11 Yimɓe Israa'iila heddiiɓe ɓeen kumpitaa, mbi'aa:
— Inan, yimɓe lenyol Ruben e Gad e feccere lenyol Manasa wootere nyiɓii hirsirde dow keerol Kanaana ley Gelilot, hunnduko Urdun, ɗakkol meeɗen.
12 Nde yimɓe Israa'iila nannoo ɗum fu, jamaa muɓɓen fuu kawriti Silo faa kona ɓe.
13 Yimɓe Israa'iila neli Pinehas ɓii Eliyasar, almaami oon to yimɓe lenyol Ruben e Gad e feccere lenyol Manasa nder leydi Galaad. 14 O yaadi e mawɓe sappo, fodde limgal lenyi Israa'iila ngonɗi gorgal Urdun, gooto maɓɓe fuu wo mawɗo dow suudu muuɗum nder Israa'iila. 15 Ɓe ngari to yimɓe lenyol Ruben e Gad e feccere lenyol Manasa nder leydi Galaad, ɓe mbi'i ɗum'en:
16 — Inan ko kawrital yimɓe Joomiraaɗo fuu wi'i: «Ɗume woni jamba mo ngaɗuɗon yeeso Joomiraaɗo Laamɗo Israa'iila o? Ko nyibanɗon ko'e mooɗon hirsirde ɗuum, on luttii Joomiraado hannden. On muurtanii mo. 17 Miccitee hakke meeɗen ley Peyor. Saabe hakke oon Joomiraaɗo hiitakeno en, waddiino torra mawɗo dow meeɗen. Faa warde hannden en laaɓidaay e bone majjum. Yalla hakke oon heƴaayno naa? 18 Yalla hannden du on celan jokkude Joomiraaɗo naa? Si on muurtanii mo hannden, jaango o waddan tikkere makko dow yimɓe Israa'iila fuu. 19 Ammaa si leydi mooɗon ndiin wanaa laaɓundi yeeso Joomiraaɗo fu, ngaree to leydi ndi Joomiraaɗo dawrani, ɗo jooɗorgal muuɗum ceniingal woni. Si oɗon njiɗi, ngaree koɗee hakkunde amin. Ammaa taa muurtanee Joomiraaɗo e nyiɓugol hirsirde feereere ɗakkol hirsirde Laamɗo Joomiraaɗo men. Taa muurtanee min minen du. 20 Miccitee no Akan ɓii Jera luttiri yamiroore dow kujje kalketeeɗe yeeso Joomiraaɗo. Saabe hakke makko oon tikkere Joomiraaɗo wari dow yimɓe Israa'iila fuu. Akan halkaaka kam tan saabe hakke oon.»
21 Ndeen yimɓe lenyol Ruben e Gad e feccere lenyol Manasa mbi'i mawɓe lenyi Israa'iila keddiiɗi ɗiin:
22 — Laamɗo Joomiraaɗo woni mawɗo! Ayyo! Laamɗo Joomiraaɗo woni mawɗo! Kanko anndi ko saabii de min ngaɗi ɗum. Israa'iila fuu faama ɗum ɗo! Si wo muurtere maa hakke min ngaɗi yeeso Joomiraaɗo fu, ndeen kaa taa accon min keddodoo e yonki hannden! 23 Si wo min nyiɓan ko'e amin hirsirde faa min njoppa teddinde Joomiraaɗo, min ngaɗa kirsamaaji buleteeɗi maa dokke gabbe gawri maa kirsamaaji jeɗeteeɗi dow mayre fu, Joomiraaɗo e hoorem hiitoo min! 24 Ammaa wanaa noon. Si goonga, min kulii taa ɓiɓɓe mooɗon mbi'a ɓiɓɓe amin nyannde jaango: «Ɗume hawti on e Joomiraaɗo, Laamɗo Israa'iila? 25 Joomiraaɗo waɗi gooruwol Urdun ngool keerol hakkunde amin e mooɗon. Onon yimɓe Ruben e Gad, walaa ko hawti on e Joomiraaɗo.» Ndeen kaa ɓiɓɓe mooɗon kaɗan ɓiɓɓe amin ɗowtanaade Joomiraaɗo. 26 Saabe majjum min mbi'itii: «Sey nyiɓen hirsirde, nde nyiɓanaaka kirsamaaji buleteeɗi maa kirsamaaji cakketeeɗi.» 27 Ammaa nde laatoo seedee hakkunde meeɗen e hakkunde lenyi men garooji caggal meeɗen. Nde seedanoo min minen du wo min teddinooɓe Joomiraaɗo e kirsamaaji amin buleteeɗi e kirsamaaji amin jeɗeteeɗi to suudu makko seniindu. Taa ɓiɓɓe mooɗon mbi'a ɓiɓɓe amin nyannde jaango: Walaa ko hawti on e Joomiraaɗo. 28 Min mbi'ii: Si ɗuum waɗii fu, ɓiɓɓe amin ina mbaawi wi'ude: Ndaaree, maamiraaɓe amin ngaɗiino hirsirde huccitinnde e hirsirde Joomiraaɗo. Hirsirde ndeen wanaa saabe sadakaaji buleteeɗi maa sadakaaji kirseteeɗi, ammaa faa nde laatoo seedee hakkunde meeɗen. 29 Abada min muurtanta Joomiraaɗo. Min celataa jokkude mo, min nyiɓataa hirsirde faa min kokka sadakaaji buleteeɗi e sadakaaji gabbe gawri maa kirsamaaji. Min ngaɗataa hirsirde wonde faa nde lutta hirsirde Laamɗo Joomiraaɗo men, dariinde yeeso jooɗorgal muuɗum ndeen.
30 Nde Pinehas almaami oon e ardiiɓe jamaa Israa'iila'en e hooreeɓe lenyi Israa'iila nannoo ko yimɓe lenyol Ruben e Gad e feccere lenyol Manasa mbi'i ɗuum fu, ɗum weli ɗum'en sanne. 31 Pinehas ɓii almaami Eliyasar, wi'i ɓe:
— Hannden, miɗen anndi Joomiraaɗo na wondi e meeɗen. Wooɗi onon du on njambaaki mo. Ndelle, on kisinii yimɓe Israa'iila e junngo makko.
32 Ndeen Pinehas ɓii almaami Eliyasar e mawɓe Israa'iila'en ndilli to yimɓe Ruben e Gad ley leydi Galaad, kooti leydi Kanaana to yimɓe Israa'iila heddiiɓe ɓeen. Ɓe pillanii ɗum'en haala kaan fuu. 33 Kabaaru oon weli yimɓe Israa'iila, ɓe njetti Laamɗo. Ɓe celi haalde haala honude yimɓe Ruben e Gad, e halkude leydi muɓɓen.
34 Yimɓe Ruben e Gad mbi'i:
— Hirsirde ndeen wo seedee hakkunde meeɗen en fuu Joomiraaɗo woni Laamɗo.
Saabe majjum ɓe inndiri nde «Seedee».