No Lewinkooɓe keɓiri kuɓeeje muɓɓen
(1 Kabaaruuji 6:39-66)
21
1 Mawɓe lenyol Lewinkooɓe ngari to almaami Eliyasar e to Yoosuwa ɓii Nuun e to mawɓe lenyi Israa'iila'en. 2 Ɓe ngari ɓe kaaldi e maɓɓe ley Silo nder leydi Kanaana, ɓe mbi'i:— Joomiraaɗo yamiriino e hunnduko Muusaa, min kokkee kuɓeeje ɗo min njooɗotoo e to daabaaji amin ndurata.
3 Ndelle saabe yamiroore Joomiraaɗo ndeen, yimɓe Israa'iila kooƴi kuɓeeje gonɗe nder ndongu muɓɓen, kokki ɗe Lewinkooɓe.
4 Cumnal aranal ɓangini ndongu Kohatinkooɓe nder lenyol Lewi. Suudu almaami Haaruuna heɓi kuɓeeje sappo e tati ley lenyi Yahuuda e Simeyon e Benyamin. 5 Kohatinkooɓe heddiiɓe du keɓi kuɓeeje sappo ley lenyi Efrayim e Dan e feccere lenyol Manasa.
6 Suudu Gerson heɓi kuɓeeje sappo e tati ley lenyi Isakar e Aser e Naftali e feccere lenyol Manasa nder leydi Baasan.
7 Yimɓe suudu Merari du keɓi kuɓeeje sappo e ɗiɗi ley lenyi Ruben e Gad e Jabulon.
8 Hono nii yimɓe Israa'iila kokkiri Lewinkooɓe kuɓeeje ɗeen e nokkuuje ɗo daabaaji muɓɓen ndurata. Ɓe kokkiri ɓeen kuɓeeje ɗeen e cumnal, hono no Joomiraaɗo yamirnoo ɓe e hunnduko Muusaa noon.
9 Inan inɗe kuɓeeje ɗe yimɓe lenyi Yahuuda e Simeyon kokki 10 suudu Haaruuna, lenyol Kohat ɓii Lewi. E cumnal aranal ɓe keɓiri kuɓeeje ɗeen. 11 Ɓe keɓi huɓeere Arba, (Arba wo innde baaba Anak) inndirteende Heberon, nder baamle Yahuuda, kayre e durduɗe piiliiɗe nde. 12 Ammaa gese gonɗe ley huɓeere ndeen e gure mayre, ɓe kokkiino ɗum Kaalibu ɓii Yefunne, ɗum laatii ndongu muuɗum. 13 Wooɗi ɓe kokki ɓiɓɓe Haaruuna du Heberon laatanoo ɗum'en huɓeere moolorde. Ɓe kokki ɗum'en durduɗe mayre du fuu. Ɓe keɓi Libina e durduɗe muuɗum, 14 e Yattir e Estemowa 15 e Holon e Debir 16 e Asan e Yuta e Bayti-Semes, kuɓeeje ɗeen e durduɗe muɓɓen. Ɗe fuu wo ɗe kuɓeeje jeenay ittaaɗe ley lenyi Yahuuda e Simeyon. 17 Ley lenyol Benyamin ɓe keɓi kuɓeeje nay. Ɗeen ngoni Gibiyon e Geba 18 e Anatot e Almon, kanje e durduɗe majje. 19 Almaami'en jeyaaɓe e suudu Haaruuna keɓi kuɓeeje sappo e tati e durduɗe muɓɓen.
20 Ɓiɓɓe Kohat ɓii Lewi, heddiiɓe du keɓiri kuɓeeje muɓɓen nder leydi Efrayim e cumnal. 21 Ɓe keɓi kuɓeeje nay e durduɗe muɓɓen. Ɗeen ngoni Sikem nder baamle Efrayim (Sikem wo huɓeere moolorde), e Gejer 22 e Kibisayim e Baytihurun. 23 Ley leydi Dan ɓe keɓi kuɓeeje nay: Elteke e Gibbeton 24 e Ayalon e Gat-Rimmon, kuɓeeje ɗeen e durduɗe muɓɓen. 25 Nder leydi ndiin, feccere lenyol Manasa heɓi kuɓeeje ɗiɗi. Ɗeen ngoni Ta'anak e Yible'am, kanje e durduɗe majje. 26 Ɓiɓɓe Kohat heddiiɓe ɓeen keɓi kuɓeeje sappo e durduɗe majje.
27 Ɓiɓɓe Gerson ɓii Lewi keɓi kuɓeeje ɗiɗi nder ngeɗuuji ɗi feccere lenyol Manasa jeyi. Kanje ngoni Golan nder leydi Baasan, (Golan du wo huɓeere moolorde), e Beyestera, kanje e durduɗe majje. 28 Ley leydi Isakar ɓe keɓi kuɓeeje nay, ɗeen ngoni: Kisiyon e Daberat 29 e Yarmut e En-Gannim, kanje e durduɗe majje. 30 Ley leydi Aser ɓe keɓi kuɓeeje nay: Miseyal e Abdon 31 e Helkat e Rehoob, kanje e durduɗe majje. 32 Ley leydi Naftali ɓe keɓi kuɓeeje tati. Kanje ngoni Kedes nder Galili, (Kedes wo huɓeere moolorde), e Hammot-Door e Kartan, kanje e durduɗe majje. 33 Ɓiɓɓe Gerson ɓeen keɓi kuɓeeje sappo e tati e durduɗe muɓɓen.
34 Ɓiɓɓe Merari heddiiɓe nder lenyol Lewi, keɓi kuɓeeje nay nder leydi Jabulon. Ɗeen ngoni Yokne'am e Karta 35 e Rimmona e Nahalal, kanje e durduɗe majje. 36 Ley leydi Ruben caggal gooruwol Urdun ɓe keɓi kuɓeeje nay. Kanje ngoni: Beser yeeso Yeriko, (Beser wo huɓeere moolorde), e Yahas 37 e Kedemot e Mefa'at, kanje e durduɗe majje. 38 Nder leydi Gad du ɓe keɓi kuɓeeje nay. Ɗeen ngoni Ramot nder Galaad e Mahanayim 39 e Hesbon e Yajer, kanje e durduɗe majje. 40 Ɓiɓɓe Merari, keɓiri kuɓeeje sappo e ɗiɗi e cumnal.
41 Limgal kuɓeeje ɗe Lewinkooɓe keɓi ley ngeɗuuji yimɓe Israa'iila wo capanɗe nay e jeetati e durduɗe majje. 42 Huɓeere fuu ina woodi durduɗe piiliinde ɗum. Noon ɗum laatorii e kuɓeeje ɗeen fuu.
No Israa'iilankooɓe njeytiri leydi ndiin fuu
43 Hono nii Joomiraaɗo hokkiri Israa'iila'en leydi ndi hunaninoo maamiraaɓe muɓɓen hokkan ɗum'en ndiin fuu. Ɓe njeyti ndi, ɓe njooɗii nder mayri. 44 Joomiraaɗo hokki ɓe jam nokku fuu nder leydi ndiin, hono no o hunoraninoo maamiraaɓe maɓɓe noon. Walaa fay gooto nder wayɓe maɓɓe baawɗo daraade yeeso maɓɓe, sabo Joomiraaɗo wattii wayɓe maɓɓe ɓeen fuu nder juuɗe maɓɓe. 45 Ley haalaaji lobbi ɗi Joomiraaɗo wi'unoo yimɓe Israa'iila ɗiin, walaa fay ngoota ka tabitaay.