Haala kuɓeeje moolorɗe
(Limgal 35:6-34; Fillitagol 4:41-43, 19:1-13)
20
1 Caggal ɗuum, Joomiraaɗo wi'i Yoosuwa:2 — Haalan yimɓe Israa'iila, mbi'a ɗum'en: «Cuɓanee ko'e mooɗon kuɓeeje moolorɗe. No kaalirannoomi on e hunnduko Muusaa. 3 Si won gaɗɗo war-hoore hakkunde mooɗon tawi hensaaki maa tawi muuyaay fu, joomum ina waawi doggirde huɓeere wootere nder kuɓeeje ɗeen. Nde laatanto joomum ɗo moolotoo heɓa taa jeyɗo yomnitaade ƴiiƴam oon hewtoo mo. 4 Gaɗɗo war-hoore oon sanaa doggira huɓeere wootere nder kuɓeeje ɗeen. O daroo to dammbugal mayre, o fillanoo mawɓe huɓeere ndeen ko hewtii mo. Kamɓe du ɓe njaɓɓoo mo hakkunde maɓɓe nder huɓeere ndeen, ɓe kokka mo nokkuure ɗo o jooɗoo. 5 Si jomnititooɗo oon taaynii mo fu, taa ɓe ngatta mo e junngo muuɗum. Sabo wanaa muuyɗe makko o wardi neɗɗo oon, nganyaandi du walaano hakkunde maɓɓe. 6 O jooɗoo ley huɓeere ndeen faa nyannde o darnaa yeeso sariya kawrital yimɓe, faa nde almaami mawɗo tawaaɗo ina golla wakkati mo o warunoo neɗɗo oon maaya. Caggal ɗuum, imo waawi soƴƴaade suudu makko, to huɓeere nde o doggunoo ndeen.»
7 Ɓe cuɓii Kedes nder leydi Galili dow waamnde Naftali, e Sikem nder baamle Efrayim, e Kiriyat-Arba (kam woni Heberon) nder baamle Yahuuda. 8 Caggal Urdun du, faro lettugal Yeriko, ɓe cuɓii Beser huɓeere lenyol Ruben, e Ramot nder leydi Galaad ley ndongu lenyol Gad, e Golan nder leydi Baasan ley ndongu Manasa. 9 Kanje ngoni kuɓeeje cuɓaaɗe faa laatanoo yimɓe Israa'iila e weerɓe jooɗiiɓe hakkunde muɓɓen fuu kuɓeeje moolorɗe. Neɗɗo fuu gaɗɗo war-hoore tawi hensaaki, sanaa doggira toon, taa jeyɗo yomnitaade oon wara ɗum gilla daraaki yeeso sariya kawrital yimɓe.