No lenyol Simeyon heɓiri ndongu muuɗum
19
1 Cumnal ɗiɗaɓal ɓangini ndongu lenyol Simeyon e cuuɗi muuɗum. Ɓe keɓi ndongu maɓɓe ley ngeɗuuji lenyol Yahuuda. Inan kuɓeeje laatiiɗe ɗe ɓe ndoni: 2 Beersaba e Sema e Molada, 3 e Hasar-Su'al e Baala e Esem, 4 e Eltolat e Betula e Horma, 5 e Sikilak e Bayti-Markabot e Hasar-Susa, 6 e Bayti-Lebayot e Sarukeena. Ɗe fuu wo ɗe kuɓeeje sappo e tati e gure majje.7 Katin du ɓe keɓi En-Rimmon e Takan e Eter e Asan, kuɓeeje nay e gure majje. 8 Ɓe njeyti gure piiliiɗe kuɓeeje ɗeen fuu faa yottaade Ba'alat-Beer, ɗum woni Rama, wuro wonngo horɗoore. Ndelle, ɗum fuu laatii ndongu lenyol Simeyon e cuuɗi mum. 9 Ɓe itti ndongu yimɓe Simeyon nder ngeɗu yimɓe Yahuuda, sabo ndongu yimɓe Yahuuda ina ɗuuɗunoo sanne, faa ɓuri ko ɓe kaajanoo. Ɗum waɗi de yimɓe Simeyon keɓi ndongu muɓɓen hakkunde leydi ndi yimɓe Yahuuda ndoni.
No lenyol Jabulon heɓiri ndongu muuɗum
10 Cumnal tataɓal ɓangini ndongu lenyol Jabulon e cuuɗi muuɗum. Keerol ndongu maɓɓe yaari faa Sariida. 11 Ngol rewi gorgal, ngol ƴuuri Marala, ngol hewti Dabbeset faa ngol yottii naɗɗol ngonngol lettugal Yokne'am. 12 To Sariida, ngol oonyorii lettugal, ɗakkol Kislot-Taboora, ndeen ngol ƴuuri Daberat, ngol ƴeeŋiri Yafiya. 13 Toon ngol ndilliri lettugal, ngol ƴuuri Gat-Hefer e Et-Kasiina e faa Rimmona. Ndeen ngol oonyorii faro Neya. 14 Caggal ɗuum ngol fiilorii soɓɓiire Hannaton, ngol haaɗi nder naɗɗol Yifta-El. 15 Katin du ina woodi Kattat e Nahalal e Simeyon e Yirala e Baytilaama. Ɗe fuu wo ɗe kuɓeeje sappo e ɗiɗi e gure majje. 16 Kuɓeeje ɗeen e gure majje fuu laatii ndongu lenyol Jabulon e cuuɗi muuɗum.
No lenyol Isakar heɓiri ndongu muuɗum
17 Cumnal nayaɓal ɓangini ndongu lenyol Isakar e cuuɗi muuɗuum. 18 Kuɓeeje maɓɓe ɗeen ngoni: Yisreyel e Kesulot e Sunem, 19 e Hafarayim e Siiyon e Anakarat, 20 e gure inndirteeɗe Daberat e Kisiyon e Ebes, 21 e Remet e En-Gannim e En-Hadda e Bayti-Pasesi. 22 Keerol leydi maɓɓe ƴuuri ley Taboora e Sakasuuma e Bayti-Semes, ngol haaɗi to gooruwol Urdun. Limgal kuɓeeje ɗeen wo sappo e jeegom e gure majje. 23 Kuɓeeje ɗeen e gure majje fuu laatii ndongu lenyol Isakar e cuuɗi muuɗum.
No lenyol Aser heɓiri ndongu muuɗum
24 Cumnal joyaɓal ɓangini ndongu lenyol Aser e cuuɗi mum. 25 Inan kuɓeeje gonɗe e leydi maɓɓe: Helkat e Hali e Beten e Akisaf, 26 e Alammelek e Amat e Miseyal. Faro gorgal, keerol maɓɓe ngool ƴuuri dow waamnde Karmel, ngol jokki ɗakkol Sihor-Libinat. 27 Caggal ɗuum, ngol oonyorii lettugal faro Bayti-Daagon, ngol yottii Jabulon ley naɗɗol Yifta-El, soɓɓiire Bayti-Emek e Ne'iyel. Ndeen ngol ƴuuri soɓɓiire Kabul, 28 ngol rewi Ebron e Rehoob e Hammon e Kana, faa ngol yottii Sidon, huɓeere mawnde. 29 Ɗoon ngol oonyorii faro Rama, ngol rewi huɓeere Tirus semmbiɗinde. Caggal ɗuum, ngol fiilorii Hosa, ngol haaɗi to maayo Manngo ɗakkol Mahaleeba e Akisib, 30 e Akko e Afek e Rehoob. Ɗe fuu wo ɗe kuɓeeje noogay e ɗiɗi e gure majje. 31 Kuɓeeje ɗeen e gure majje fuu laatii ndongu lenyol Aser e cuuɗi muuɗum.
No lenyol Naftali heɓiri ndongu muuɗum
32 Cumnal jeegaɓal ɓangini ndongu lenyol Naftali e cuuɗi muuɗum. 33 Keerol maɓɓe fuɗɗiri gilla Helef, to lekki mawki ngonki Saananim, ngol rewi Adami-Nekeb e Yabneyel e Lakum, ngol haaɗi to gooruwol Urdun. 34 Ndeen keerol maɓɓe ngool oonyorii gorgal, ƴuuri Asnot-Taboora, ngol yottii Hukok. Ngol ƴuuri horɗoore Jabulon, e Aser faro lettugal. Caggal ɗuum ngol yottii Yahuuda to gooruwol Urdun. 35 Kuɓeeje maɓɓe cemmbiɗinɗe ngoni: Sidim e Seer e Hammat e Rakkat e Kineret, 36 e Adama e Rama e Hasor, 37 e Kedes e Edirey e En-Hasoor, 38 e Yiron e Migdal-El e Horem e Bayti-Anat e Bayti-Semes. Ɗe fuu wo ɗe kuɓeeje sappo e jeenay, kanje e gure majje. 39 Kanjum woni ndongu lenyol Naftali e cuuɗi muuɗum, kuɓeeje ɗeen e gure majje fuu.
No lenyol Dan heɓiri ndongu muuɗum
40 Cumnal jeɗɗaɓal ɓangini ndongu lenyol Dan e cuuɗi muuɗum. 41 Inan ko laatii ndongu maɓɓe nder leydi ndiin: Sora e Estayol e Ir-Semes, 42 e Saalabbin e Ayalon e Yitila, 43 e Elon e Timna e Ekoron, 44 e Elteke e Gibbeton e Ba'alat, 45 e Yehut e Bene-Barak e Gat-Rimmon, 46 e Diyeele Yarkon e Rakkon e leydi ngonndi yeeso Jaffa. 47 Ammaa yimɓe Dan tawi na tiiɗani ɗum'en jeytude leydi muɓɓen. Ɗum saabii de ɓe njehi, ɓe koni huɓeere Lesem. Ɓe njaalii nde, ɓe mbardi yimɓe wonɓe ɓeen fuu kaafaahi, ɓe njooɗii nder mayre. Innde Dan kam woni innde maamiiɓe. 48 Kuɓeeje ɗeen e gure majje laatii ndongu lenyol Dan e cuuɗi mum.
No Yoosuwa heɓiri ndongu muuɗum
49 Nde yimɓe Israa'iila timminoo feccude leydi ndiin e darnude keeri mayri fu, ɓe kokki Yoosuwa ɓii Nuun ndongu muuɗum nder leydi ndiin hakkunde maɓɓe. 50 Ɓe kokki mo huɓeere nde o ŋaarinoo fodde yamiroore Joomiraaɗo. Kam woni huɓeere Timnat-Serak wonnde dow waamnde Efrayim. O nyiɓtii huɓeere ndeen, o jooɗii ɗoon.
51 Almaami bi'eteeɗo Eliyasar e Yoosuwa ɓii Nuun e mawɓe lenyi Israa'iila'en, kamɓe ngoni senndirɓe leydi ndiin e cumnal. Ɓe ngaɗi ɗum fuu yeeso Joomiraaɗo, to dammbugal hukum hawrugol e Joomiraaɗo gonɗo wuro Silo. Noon ɓe tilorii e senndude leydi ndiin.