<<    <     Yoosuwa     18     >    >> 
No lenyi keddiiɗi ɗiin keɓiri ndongu muɓɓen e cumnal
18
1 Nde yimɓe Israa'iila njaalinoo leydi ndiin fuu ndeen, ɓe fuu ɓe kawriti ley Silo. Ɓe ndarni ɗoon hukum Joomiraaɗo. 2 Wooɗi, ina woodunoo lenyi jeɗɗi hakkunde lenyi Israa'iila ɗi keɓaay ndongu muɓɓen nder leydi ndiin tafon. 3 Yoosuwa wi'i yimɓe Israa'iila:
Faa ndeye de ummoɗon, njahon, ndawranon leydi ndi Joomiraaɗo Laamɗo maamiraaɓe mooɗon hokki on? 4 Cuɓee worɓe tato nder lenyol fuu. Mi nelan ɓe, ɓe njaha ɓe kora leydi ndiin fuu, ɓe mbinnda faa laaɓa no ndi worri, ndeen ɓe ngarta to am, ɓe kolla no ndi feccirte. 5 Ɓe cennda ndi pecce jeɗɗi. Yahuuda kaa heddoo nder leydi muuɗum to horɗoore. Ɓiɓɓe Yuusufi du keddoo nder leydi muɓɓen to soɓɓiire. 6 Wooɗi mbinndon leydi ndiin, ngaɗon ndi pecce jeɗɗi. Caggal ɗuum ngaddanon kam ɗum. Mi waɗanan on cumnal yeeso Laamɗo Joomiraaɗo men, faa holla lenyol fuu ndongu muuɗum. 7 Lewinkooɓe kaa keɓataa ndongu nder leydi ndiin hakkunde mooɗon, sabo laataade almaami'en gollanooɓe Joomiraaɗo woni ndongu muɓɓen. Gad e Ruben e feccere lenyol Manasa kaa keɓiino ndongu muɓɓen lettugal Urdun. Wo Muusaa maccuɗo Joomiraaɗo, kam yeɗi ɓe.
8 Nde worɓe suɓaaɓe ɓeen umminoo faa njaha ndeen, Yoosuwa yamiri ɓe, wi'i:
— Njehee, ndaarowee leydi ndiin fuu, de mbinndon ndi, caggal ɗuum ngarton to am. Miin du ley Silo ɗo, mi ŋaariranto on Joomiraaɗo e cumnal.
9 Ɓe njehi, ɓe njiiltowii nder leydi ndiin fuu, ɓe mbinndi nder dewtere ɓe kolli no ɓe cenndiri ndi pecce jeɗɗi. Ɓe mbinndi inɗe kuɓeeje mayri fuu. Ndeen ɓe ngarti to Yoosuwa, to hoɗorde maɓɓe ley Silo. 10 Wo ɗoon Yoosuwa waɗani ɓe cumnal yeeso Joomiraaɗo. Noon o yeɗiri lenyi Israa'iila keddiiɗi ɗiin ngeɗuuji muɓɓen, lenyol fuu e nokkuure muuɗum.
No lenyol Benyamin heɓiri ndongu muuɗum
11 Arande fu wo lenyol Benyamin artii heɓirde ndongu muuɗum e cumnal, fodde cuuɗi muuɗum. Ɓe keɓi ngeɗuuji maɓɓe nder leydi ndiin hakkunde yimɓe Yahuuda e yimɓe Yuusufi. 12 Keerol maɓɓe faro soɓɓiire fuɗɗiri gilla ɗo gooruwol Urdun. Ngol ƴeeŋiri soɓɓiire jipporde waamnde Yeriko, ngol ƴuuri leydi ngonndi dow baamle faro gorgal, faa ngol yottii ladde Bet-Awen. 13 Ndeen ngol dilliri horɗoore waamnde Luus, (Luus e Baytila fuu wo gootum.) Keerol ngol jipporii Atarot-Addar dow waamnde wonnde horɗoore Baytihurun-Ley. 14 To gorgal waamnde ndeen, ngol oonyorii faro horɗoore, ngol yottii Kiriyat-Ba'al (kam woni Kiriyat-Ye'arim), huɓeere nde lenyol Yahuuda jeyi. Ɗum woni keerol maɓɓe kettungol gorgal. 15 Faro horɗoore, keerol ngol fuɗɗiri sera Kiriyat-Ye'arim. Ngol rewi gorgal, ngol yottii ilduɗe Neftowa. 16 Ndeen ngol jipporii ley waamnde huccitinde e naɗɗol Ɓii-Hinnom, soɓɓiire naɗɗol Refayim'en. Ngol fiilii naɗɗol Ɓii-Hinnom faro horɗoore jipporde waamnde Yebusinkooɓe, ngol jipporii En-Rogel. 17 Caggal ɗuum, ngol soƴƴorii soɓɓiire, ngol rewi En-Semesi, e Gelilot, yeeso ƴeeŋirde Adumiima. Ngol jipporii tefaare Bohan ɓii Ruben. 18 Ngol ƴuuri soɓɓiire waamnde Bayti-Araba, ngol jipporii nder ladde yoornde. 19 Keerol maɓɓe ngool rewi soɓɓiire waamnde Bayti-Hogila. Ngol haaɗi to gooruwol Urdun ilirtaa nder maayo Lamɗam toon, soɓɓiire maayo ngoon. Ɗum woni keerol maɓɓe faro horɗoore. 20 Gooruwol Urdun woni keerol maɓɓe faro lettugal. Ɗuum laatii ndongu lenyol Benyamin.
21 Kuɓeeje lenyol Benyamin e cuuɗi mum ngoni: Yeriko e Bayti-Hogila e Emek-Kesis, 22 e Bayti-Araaba e Semarayim e Baytila, 23 e Awim e Para e Ofra, 24 e Kefar-Amoni e Ofni e Geba. Limgal kuɓeeje ɗeen fuu wo sappo e ɗiɗi e gure majje. 25 Katin du ɓe keɓi Gibiyon e Rama e Biirot, 26 e Mispa e Kefiira e Mosa, 27 e Rekem e Yirpeyel e Tarala, 28 e Seela e Elef e Yebusi (kam woni Urusaliima) e Gibiyat e Kiriyat-Ye'arim, ɗeen du kuɓeeje sappo e nay e gure majje. Ɗum laatii ndongu lenyol Benyamin e cuuɗi muuɗum.