No lenyol Manasa heɓiri ndongu muuɗum
17
1 Lenyol Manasa, afo Yuusufi hokkaa leydi ngonndi lettugal Urdun laatoo ndongu muuɗum. Makir, afo Manasa, baaba Galaad, kam heɓi leydi Galaad e Baasan sabo wo sordasiijo mawɗo, baawɗo konu sanne. 2 Ɓiɓɓe Manasa heddiiɓe keɓi ndongu muɓɓen faro lettugal Urdun. Ɗum woni cuuɗi Abiyejer e Helek e Asriyel e Sikem e Hefer e Semida. Ɓe fuu wo ɓe ƴuwdi Manasa ɓii Yuusufi. 3 Ammaa Selofehat ɓii Hefer taan Galaad ɓii Makir taan Manasa oon heɓaay ɓiɓɓe worɓe, sanaa ɓiɓɓe rewɓe tan. Inan inɗe maɓɓe: Mahala e No'a e Hogila e Milka e Tirsa. 4 Ɓiɓɓe makko rewɓe ɓeen ngari yeeso Eliyasar almaami oon, e yeeso Yoosuwa ɓii Nuun e yeeso mawɓe fuu, mbi'i ɗum'en:— Joomiraaɗo yamiriino Muusaa hokka min ndongu ley leydi ndi hakkunde sakiraaɓe amin worɓe.
Ndeen ɓe kokkaa ndongu nder leydi ndiin hakkunde sakiraaɓe maɓɓe worɓe hono no Joomiraaɗo yamirnoo. 5 Hono nii lenyol Manasa ɓeydiranaa ngeɗuuji sappo dow Galaad e Baasan caggal Urdun. 6 Ɓiɓɓe Manasa rewɓe ɓeen du keɓi ndongu muɓɓen nder leydi ndiin hono no sakiraaɓe muɓɓen worɓe noon. Ammaa ɓiɓɓe Manasa heddiiɓe kokkaa leydi Galaad.
7 Keerol leydi ɓiɓɓe Manasa ƴuurii gilla Aser faa Mikmetat, lettugal Sikem. Ndeen ngol jipporii horɗoore to yimɓe En-Tapuha. 8 Manasa hokkaa leydi Tapuha, ammaa sera huɓeere to keerol Manasa laatii ndongu ɓiɓɓe Efrayim. 9 Ndeen keerol maɓɓe ngool takkii gooruwol Kana. Ammaa kuɓeeje gonɗe horɗoore gooruwol ngool ina laatii ndongu Efrayim fay ko ɗe ngoni hakkunde kuɓeeje Manasa ɗuum. Keerol maɓɓe ngool ƴuuri soɓɓiire gooruwol, ngol haaɗi to hunnduko maayo Manngo. 10 Leydi ngonndi horɗoore gooruwol ngool ina laatii leydi Efrayim, soɓɓiire maggol du wo leydi Manasa. Maayo Manngo laatanii lenyi ɗiɗi ɗiin keerol. Keerol maɓɓe ngool ina meemira leydi Aser faro soɓɓiire leydi Isakar du faro lettugal. 11 Ley ndongu Isakar e Aser, Manasa heɓi kuɓeeje laatiiɗe ndongu muuɗum. Kanje ngoni Bayti-Seyan e Yible'am e gure majje, noon du Dor e En-Dor e Ta'anak e Megiddo e gure majje. Kuɓeeje ɗeen kawriti, ngaɗi nokkuuje tati. 12 Ammaa yimɓe Manasa mbaawaay riiwude jooɗiiɓe nder kuɓeeje ɗeen. Kanaaninkooɓe ciini heddaade ley kuɓeeje ɗeen. 13 Nde Israa'iilankooɓe keɓunoo semmbe fu, ngaɗi Kanaaninkooɓe ɓeen maccuɓe muɓɓen, ammaa ɓe mbaawaay riiwude ɓeen.
No ɓiɓɓe Yuusufi ŋaarorii ɓeydaneede ndongu
14 Caggal ɗuum yimɓe lenyol Yuusufi ngari mbi'i Yoosuwa:
— Ɗume saabii de kokkuɗaa min ngeɗu ngootu tan nder leydi ndiin? Sabo hannden Joomiraaɗo barkinɗinii min, waɗii min lenyol ɗuuɗungol sanne.
15 Yoosuwa wi'i ɓe:
— Si wo on lenyol ɗuuɗungol sanne fu, njehee nder ladde, ley leydi Perisinkooɓe e Refayim, moƴƴinanon ko'e mon gese toon. Sabo on mbi'ii baamle Efrayim keƴataa on.
16 Ɓe njaabii mo, ɓe mbi'i:
— Leydi ngonndi dow waamde ndiin heƴataa min. Kanaaninkooɓe jooɗiiɓe nder njaayriiji ɓeen du ina njogii torkooji pucci njamndi, kamɓe e jooɗiiɓe Bayti-Seyan e gure muuɗum e wonɓe nder naɗɗol Yisreyel fuu.
17 Yoosuwa wi'i yimɓe lenyi Yuusufi, ɗiin ngoni yimɓe lenyol Efrayim e lenyol Manasa: