No lenyol Efrayim e Manasa keɓiri ndongu muɓɓen
16
1 Keerol ndongu ɓiɓɓe Yuusufi nder leydi ndiin fuɗɗi gilla gooruwol Urdun ɗakkol Yeriko, lettugal diyeele Yeriko, ngol rewi ley ladde yoornde, ngol ƴeeŋiri dow baamle Baytila. 2 To Baytila ngol dilliri Luus, ngol ƴuuri to Atarot, leydi Arkinkeeɓe. 3 Caggal majjum ngol jipporii gorgal leydi Yafeleti'en, faa leydi Baytihurun-Ley e Gejer, ngol haaɗi to maayo Manngo. 4 Ɗum laatii ndongu lenyol Manasa e Efrayim, ɓiɓɓe Yuusufi ɓeen.No lenyol Efrayim heɓiri ndongu muuɗum
5 Inan ko laatii ndongu lenyol Efrayim e cuuɗi muuɗum. Keerol maɓɓe fuɗɗiri lettugal gilla Atarot-Addar faa yottii Baytihurun-Dow. Ndeen ngol rewi gorgal, ngol ƴuuri soɓɓiire Mikmetat. 6 Gere lettugal Mikmetat toon, ngol oonyorii Taanat-Silo, ngol ƴuuri caggal huɓeere ndeen, ngol rewi lettugal Yanoha. 7 To Yanoha ngol jipporii Atarot e Naarat, ngol yottii Yeriko, ngol haaɗi to gooruwol Urdun. 8 Faro gere gorgal, keerol ngool ƴuuri to Tapuha, ngol rewi Kana, ngol haaɗi to maayo Manngo. Ɗum woni ndongu lenyol Efrayim e ƴuwdi muuɗum. 9 Katin du ina woodi kuɓeeje goɗɗe e gure muɓɓen ɗe lenyol Manasa roni. 10 Ammaa ɓe ndiiwaay Kanaaninkooɓe jooɗiiɓe ley Gejer. Saabe majjum, Kanaaninkooɓe ɓeen keddii hakkunde yimɓe Efrayim faa warde hannden. Ammaa Efrayimankooɓe ngaɗi ɓe maccuɓe muɓɓen, iɓe ngollana ɗum'en golleeji tiiɗuɗi.