No lenyol Yahuuda heɓiri ndongu muuɗum
15
1 Inan ndongu lenyol Yahuuda fodde e cuuɗi muuɗum. Ɓe keɓi leydi gilla ɗakkol Edom faa to toowtii e ladde Sin faro horɗoore. 2 Keerol maɓɓe faro horɗoorewol ngool fuɗɗi gilla sera maayo Lamɗam, to ngo hucciti e horɗoore toon. 3 Caggal ɗuum keerol maɓɓe ngool ƴuuri horɗoore faro Ƴeeŋirde Jahe, ngol rewi ladde Sin. Ndeen ngol seliri horɗoore Kades-Barneya faa ngol yottii Heseron. Caggal ɗuum ngol rewi Addar, ngol ooncorii Karka. 4 Toon ngol ƴuuri faro Asimon, ngol hawroyi e maayo Misira, ngol darii yeeso maayo Manngo. Ɗum woni keerol maɓɓe faro horɗoore.5 Keerol maɓɓe faro lettugal fuɗɗi gilla maayo Lamɗam faa yottowii to gooruwol Urdun hawrata e maggo.
Keerol maɓɓe faro soɓɓiire du fuɗɗi to maayo Lamɗam hawri e gooruwol Urdun toon. 6 Caggal ɗuum, keerol ngol rewi Bayti-Hogila, ngol ƴuuri soɓɓiire Bayti-Araaba, faa ngol yottii tefaare Bohan ɓii Ruben. 7 Ngol ƴeeŋiri faro Debir ley naɗɗol Akor, ndeen ngol rewi faro soɓɓiire, yaade Gilgal, huɓeere huccitinde e ƴeeŋirde waamnde Adumiima, horɗoore gooruwol. Ndeen ngol ƴuuri faro diyeele An-Semesi, ngol rewi faro diyeele Rogel. 8 Keerol ngool ƴeeŋiri naɗɗol Ɓii-Hinnom faro horɗoore jipporde huɓeere Yebusinkooɓe, kam woni Urusaliima. Ngol ƴeeŋiri katin waamnde huccitinde e naɗɗol Ɓii-Hinnom faro gorgal e soɓɓiire naɗɗol Refayim. 9 Dow waamnde ndeen, keerol ngool oonyorii faro diyeele Nefituya, ngol yottii gure gonɗe ɗakkol Eferon. Ndeen ngol jipporii faro Baala, (kam woni Kiriyat-Ye'arim). 10 Toon ngol rewi gorgal baamle Edom, ngol jokki soɓɓiire jipporde waamnde Ye'arim, (ɗum woni to wuro Kesalon). Ngol jipporii faro Bayti-Semes, ngol rewi Timna. 11 Caggal ɗuum, keerol ngool rewi soɓɓiire waamnde Ekoron, ngol oonyorii faro Sikeruuna, ngol seliri waamnde Baala, ngol ƴuuri Yabinayel. Ngol haaɗi to maayo Manngo. 12 Maayo ngoon woni keerol maɓɓe faro gorgal.
Ɗum woni keerol leydi lenyol Yahuuda e yimɓe muuɗum.
No Kaalibu jaalorii Heberon e Debir
13 Hono no Joomiraaɗo yamirnoo Yoosuwa, noon Kaalibu ɓii Yefunne heɓiri ndongu hakkunde ɓiɓɓe Yahuuda. O heɓi Heberon, huɓeere Arba, innde maama Anak. 14 Kaalibu riiwi toon ɓiɓɓe Anak tato: Sesay e Akiman e Talmay. 15 Caggal ɗuum, o waɗoyi konu e yimɓe Debir. (Arande innde huɓeere ndeen wo Kiriyat-Sefer.) 16 Kaalibu wi'i:
— Jaaliiɗo Kiriyat-Sefer fu, mi hokkan ɗum ɓiyam debbo, Akiisa.
17 Otiniyel ɓii sakiike Kaalibu bi'eteeɗo Keenas jaalii wuro ngoon. Saabe majjum Kaalibu hokki mo Akiisa. 18 Nyannde ɓangal maɓɓe Akiisa tinndini mo o ŋaaroo Kaalibu, baaba muuɗum, ngesa. Nde Akiisa jippinoo dow araawa mum fu, Kaalibu ƴami ɗum:
— Ɗume kaajaɗaa?
19 O jaabii, o wi'i:
— Miɗo ŋaare, ngaɗanaa kam moƴƴere nde ŋaarotomaami ndeen. A hokkii kam leydi njoorndi ngonndi horɗoore. Hokkaram ilduɗe ndiyam du.
Saabe majjum Kaalibu hokki mo ilduɗe ndiyam gonɗe dow waamnde e ilduɗe ndiyam gonɗe ley mayre.
Kuɓeeje laatiiɗe ndongu Yahuuda
20 Inan ko laatii ndongu lenyol Yahuuda e cuuɗi muuɗum nder leydi ndiin. 21 Kuɓeeje maɓɓe keettuɗe horɗoore faro keerol leydi Edom, ɗeen ngoni: Kafsiilu e Eder e Yagur, 22 e Kiina e Dimona e Adada, 23 e Kedes e Hasor-Yitnan, 24 e Sifa e Telem e Be'alot, 25 e Hasor-Hadatta e Keriyot-Hesruunu (kam woni Hasor), 26 e Amam e Sema e Molada, 27 e Hasar-Gadda e Hesmuunu e Bayti-Palet, 28 e Hasar-Su'al e Beersaba e gure mum, 29 e Baala e Iyim e Esem, 30 e Eltolat e Kesil e Horma, 31 e Sikilak e Madamanna e Sansanna, 32 e Lebayot e Silkim e En-Rimmon. Kuɓeeje ɗeen fuu wo noogay e jeenay e gure majje.
33 Kuɓeeje maɓɓe gonɗe nder naɗɗol ɗeen ngoni: Estayol e Sora e Asna, 34 e Sanoyak e En-Gannim e Tapuha e Enam, 35 e Yarmut e Adulam e Soko e Ajeka, 36 e Saarayim e Aditayim e Gedera e Gederotayim. Limgal kuɓeeje ɗeen fuu wo sappo e nay e gure majje.
37 Katin ina woodi kuɓeeje Senan e Hadasa e Migdal-Gada, 38 e Dil'aan e Mispa e Yokteyel, 39 e Lakis e Boskat e Egilon, 40 e Kabbon e Lakmas e Kitilis, 41 e Gederot e Bayti-Daagon e Na'ama e Makeda. Ɗe fuu wo ɗe kuɓeeje sappo e jeegom e gure majje.
42 Ina woodi du kuɓeeje Libina e Eter e Asan, 43 e Yiftak e Asna e Nesib, 44 e Ke'ila e Akisib e Maresa. Ɗeen du wo kuɓeeje jeenay e gure majje.
45 Katin du ɓe keɓi huɓeere Ekoron e gure mayre e gure piiliiɗe nde. 46 Ɓe keɓi du kuɓeeje gonɗe gorgal Ekoron piiliiɗe Asdot e gure majje.
47 Katin du ina woodi Asdot e Gaaja e gure majje e gure piiliiɗe ɗe, faa yottoo maayo Misira e maayo Manngo e leydi ngonndi ɗakkol maggo.
48 Yimɓe Yahuuda keɓi katin kuɓeeje gonɗe dow baamle. Kanje ngoni Samir e Yattir e Soko, 49 e Dana e Kiriyat-Sanna (kam woni Debir), 50 e Anaba e Estemowa e Anim, 51 e Goosan e Holon e Gilo. Ɗe fuu wo ɗe kuɓeeje sappo e go'o e gure majje.
52 Katin du Araba e Duma e Esiyan, 53 e Yanum e Bayti-Tapuha e Afeka, 54 e Humta e Kiriyat-Arba (kam woni Heberon), e Si'or. Ɗe fuu wo ɗe kuɓeeje jeenay e gure majje.
55 Katin du, ɓe keɓii Mayon e Karmel e Sifa e Yuta, 56 e Yisreyel e Yokedam e Janoha, 57 e Kayiinu e Gibiya e Timna. Limgal majje wo kuɓeeje sappo e gure majje.
58 Ɓe keɓi du Halhul e Bayti-Sura e Gedor, 59 e Ma'arat e Bayti-Anot e Eltekon. Ɗe fuu wo ɗe kuɓeeje jeegom e gure majje.
60 Katin du Kiriyat-Baal (kam woni Kiriyat-Ye'arim) e Rabba, kuɓeeje ɗiɗi e gure majje.
61 Ina woodi du kuɓeeje goɗɗe gonɗe nder ladde yoornde. Kanje ngoni Bayti-Araaba e Middin e Sekaka, 62 e Nipsan e Wuro-manda e Engedi. Ɗe fuu wo ɗe kuɓeeje jeegom e gure majje.
63 Ammaa yimɓe Yahuuda mbaawaay riiwude Yebusinkooɓe jooɗiiɓe ley Urusaliima. Ɗum waɗi de Yebusinkooɓe ina keddii hakkunde yimɓe Yahuuda faa warde hannden.