No leydi Kanaana fuu senndiraa
14
1 Inan no leydi Kanaana senndiraa hakkunde yimɓe Israa'iila. Eliyasar, Almaami oon e Yoosuwa ɓii Nuun e mawɓe lenyi Israa'iila peccani yimɓe Israa'iila leydi ndiin. 2 Lenyi jeenay e feccere lenyol wootere ndeen keɓirii ndongu muɓɓen e cumnal hono no Joomiraaɗo yamirnoo Muusaa. 3 Tawi Muusaa artiino hokkii lenyi ɗiɗi e feccere lenyol wootere keddiingol ngool ndongu muɓɓen nder leydi ngonndi caggal Urdun toon. 4 Ƴuwdi Yuusufi wo lenyi ɗiɗi: ɗiin ngoni lenyol Manasa e lenyol Efrayim. Ammaa Lewinkooɓe kaa keɓaay ndongu e leydi ndiin, sanaa gure ɗo ɓe njooɗii e nokkuuje ɗo daabaaji maɓɓe ndurata e to jawdi maɓɓe keddiindi wonata. 5 Israa'iilankooɓe ngaɗirii hono no Joomiraaɗo yamirnoo Muusaa noon. Ɓe cenndii leydi ndiin hakkunde maɓɓe.No Kaalibu heɓiri Heberon
6 Nyannde gomma yimɓe Yahuuda ngari to Yoosuwa ley Gilgal. Gooto maɓɓe wo Kaalibu ɓii Yefunne Kenijiyankeejo. Oon wi'i mo:
— Aɗa anndi ko Joomiraaɗo wi'unoo Muusaa maccuɗo muuɗum dow meeɗen, miin e maaɗa ley Kaades-Barneya. 7 Miɗo woodunoo duuɓi capanɗe nay nde Muusaa maccuɗo Joomiraaɗo nelunoo kam mi horowa leydi ndiin. Mi humpitii mo huunde fuu, walaa ko cuuɗumi mo e ɓernde am. 8 Ammaa banndiraaɓe am yaadunooɓe e am ɓeen kulɓinii ɓerɗe yimɓe sanne. De miin kaa mi jokkii Laamɗo Joomiraaɗo e hoolaare. 9 Nyalaande majjum Muusaa hunanii kam, wi'i: «Leydi ndi koyɗe maa njaaɓi dow muuɗum ndiin fuu laatoo ndongu maaɗa, aan e ƴuwdi maa faa abada. Sabo a ɗowtanake Laamɗo Joomiraaɗo am e ɓernde wootere.» 10 Joomiraaɗo accii mbuurumi duuɓi capanɗe nay e joy, gilla nde haalannoo Muusaa haala kaan faa warde hannden. Wakkati majjum tawi Israa'iila'en ina ngonnoo nder ladde yoornde. Ndaar, hannden miɗo woodi duuɓi capanɗe jeetati e joy. 11 Ammaa faa hannden miɗo woodi semmbe hono nyannde Muusaa nelnoo kam ndeen. Joonin du semmbe am ina hiɓɓi faa miɗo waawi honude hono no arande noon. 12 Ndelle, hokkam leydi ngonndi dow baamle ndi Joomiraaɗo aadinoo hokkan kam nyannde majjum ndiin. Si goonga, nde njaanoɗen ndeen, aɗa anndi no tawruɗen lenyol Anakinkeeɓe wonɓe toon, kam'en e galluuje muɓɓen cemmbiɗinɗe ɗeen. Ammaa si Joomiraaɗo jaɓii wondude e am fu, mi riiwan ɓe hono no wiirunoo noon.
13 Yoosuwa barkini Kaalibu ɓii Yefunne, de hokki ɗum Heberon. 14 Ɗum waɗi Heberon laatii ndongu Kaalibu ɓii Yefunne Kenijiyankeejo faa warde hannden, sabo o ɗowtanake Joomiraaɗo Laamɗo Israa'iila e goongalaaku. 15 Arande innde Heberon wo Kiriyat Arba. Arba wonnoo gorko ɓurɗo mawnude hakkunde Anakinkeeɓe.
Caggal ɗuum, konu timmi, leydi ndiin heɓi jam.