No leydi ndiin senndiraa
Leyɗe keddiiɗe ɗe Israa'iila'en njeytaay tafon
13
1 Nde Yoosuwa naywunoo sanne ndeen, Joomiraaɗo wi'i ɗum:— A naywii joonin, duuɓi maa ina keewi, ammaa ina heddii leyɗe keewɗe ɗe on njaalaaki tafon. 2 Inan leyɗe keddiiɗe ɗeen: ɗe Filistiyankooɓe e ɗe Gesurinkooɓe, 3 gilla maayo Sihor wonngo dow keerol Misira faa yottoo keerol leydi Ekoron faro soɓɓiire. Leyɗe ɗeen fuu wo leyɗe Kanaaninkooɓe e leyɗe kaanankooɓe Filistiyankooɓe njoyo. Kamɓe ngoni mo Gaaja e Asdot e Askalon e Gaat e Ekoron. Ina woodi du leydi Awinkooɓe ngonndi horɗoore keddiindi ndi jaalaaka tafon. 4 Faro horɗoore du ina heddii leydi Kanaaninkooɓe, gilla Ara, kam woni leydi Sidoninkooɓe faa yottoo Afeka keerol Amorinkooɓe. 5 Ina heddii du leydi Gebalankooɓe e Liban fuu faro lettugal, gilla Ba'al-Gada ley Hermon faa yottoo dammbugal wuro Hamat. 6 Katin du ina woodi leydi Sidoninkooɓe jooɗiiɓe dow baamle gilla Liban faa yottoo Miserefot-Mayim. Miin e hoore am mi riiwan jama'aaje ɗeen fuu yeeso Israa'iilankooɓe. Feccu leydi ndiin hakkunde Israa'iila'en, ngaɗaa cumnal hono no njamirmaami ni. 7 Joonin kaa, peccaa ndi hakkunde lenyi jeenay ɗiin e feccere lenyol Manasa ngool faa ɗum laatoo ndongu muɓɓen.
No leydi ngonndi caggal Urdun ndiin senndiraa
8 Feccere lenyol Manasa wootere e lenyol Ruben e Gad keɓiino ndongu muɓɓen e junngo Muusaa maccuɗo Joomiraaɗo. Kanko hokki ɓe leydi ngonndi lettugal Urdun. 9 Keerol mayri fuɗɗi gilla Aro'er ɗakkol naɗɗol Arnon luggungol, e huɓeere wonde hakkunde naɗɗol ngool, e njaayri Medeba faa yottoo Dibon. 10 Ɓe kokkaama du galluuje fuu ɗe kaananke Amorinkooɓe bi'eteeɗo Sihon jeynoo. Kanko laaminoo Hesbon faa yottoo keerol leydi Amoninkooɓe. 11 Katin du ɓe kokkaa Galaad, e leydi Gesurinkooɓe e Makatinkooɓe, dow waamnde Hermon fuu e leydi Baasan fuu faa yottoo Salka. 12 Ɓe keɓi du laamorde kaananke Ogga, mo Baasan, laaminooɗo Asterot e Edirey, gooto keddiiɗo hakkunde Refayinkooɓe. Muusaa jaalakeno yimɓe ɓeen fuu, de riiwi ɓe. 13 Ammaa yimɓe Israa'iila kaa ndiiwaay Gesurinkooɓe e Makatinkooɓe. Ɓeen ina keddii hakkunde maɓɓe faa warde hannden.
14 Wooɗi lenyol Lewi woni lenyol ngol Muusaa hokkaayno ndongu nder leydi ndiin. Sabo Joomiraaɗo wi'iino Lewinkooɓe ɓeen keɓan ndongu muɓɓen e dammucce bulanteeɗe Joomiraaɗo, Laamɗo Israa'iila. Kanjum laatotoo ndongu maɓɓe.
No lenyol Ruben heɓiri ndongu muuɗum
15 Muusaa hokkiino yimɓe lenyol Ruben ndongu muɓɓen nder leydi ndiin fodde e cuuɗi muɓɓen. 16 Keerol leydi maɓɓe fuɗɗi gilla soɓɓiire Aro'er ɗakkol naɗɗol Arnon luggungol faro huɓeere wonnde hakkunde naɗɗol maayo ngoon faa e tile Medeba fuu. 17 Ɓe kokkaama du huɓeere Hesbon e gure piiliiɗe nde gonɗe dow tile. Katin du, Dibon e Bamot-Baal e Bayti-Baal-Meyon, 18 e Yahas e Kedemot e Meefa'at, 19 e Kiriyatayim e Sibama e Jeret-Sakar dow waamnde huccitinde e naɗɗol, 20 e Bayti-Peyor e jippitorɗe waamnde Pisiga e Bet-Yesimot. Ɗuum fuu yimɓe lenyol Ruben njeyi. 21 Kamɓe njeyi du gure gonɗe dow tile fuu, e laamorde Sihon fuu, kaananke Amorinkooɓe, laaminooɗo dow Hesbon. Muusaa jaalii mo, kanko e laamiiɓe Madiyan. Kamɓe ngoni Ewi e Rekem e Suuru e Huuru e Reeba, wonnooɓe ley hawju Sihon, jooɗinooɓe e leydi ndiin. 22 Wooɗi Israa'iilankooɓe mbardi Balaama ɓii Beyor, gaɗannooɗo ndaggadaaku oon du kaafaahi hono no ɓe mbardi yimɓe heewɓe noon. 23 Sera gorgal Urdun laatii keerol leydi lenyol Ruben. Kuɓeeje ɗeen e gure majje laatii ndongu ɓiɓɓe Ruben fodde e cuuɗi muɓɓen.
No lenyol Gad heɓiri ndongu muuɗum
24 Inan ndongu ngu Muusaa hokki lenyol Gad fodde cuuɗi muɓɓen. 25 Leydi Yajer e kuɓeeje Galaad fuu e feccere leydi Amoninkooɓe faa yottoo Aro'er ɗakkol Rabba. 26 Ɓe keɓi leydi ndiin gilla Hesbon faa e Ramat-Mispa e Betonim, gilla Mahanayim faa yottoo keerol Lodebar. 27 Ley naɗɗi du ɓe keɓi Bayti-Haaram e Bayti-Nimra, e Sukot, e Safuun, e ko heddii ley laamu Sihon, kaananke Hesbon, lettugal gooruwol Urdun. Keerol leydi maɓɓe du fuɗɗi gorgal gooruwol Urdun faa yottoo maayo Kinarot, soɓɓiire Urdun. 28 Kuɓeeje ɗeen e gure majje laatii ndongu ɓiɓɓe Gad fodde cuuɗi muɓɓen.
No lenyol Manasa heɓiri ndongu muuɗum
29 Muusaa hokki feccere lenyol Manasa ndongu muuɗum ley leydi ndiin fodde e cuuɗi muɓɓen. 30 Leydi maɓɓe fuɗɗiri gilla Mahanayim, hawronduri leydi Baasan, e haddi ɗo Ogga kaananke Baasan laamii fuu, e Gure Ya'ir gonɗe nder Baasan. Ɗum woni gure capanɗe jeegom. 31 Ɓe keɓi feccere Galaad, e Asterot e Edirey, kuɓeeje gonɗe nder Baasan, laamorde Ogga. Kanjum laatii feccere ndongu ƴuwdi Makir ɓii Manasa fodde e cuuɗi muɓɓen.