No Yoosuwa jaalorii laamiiɓe soɓɓiire
12
1 Yimɓe Israa'iila njaalake laamiiɓe ɗiɗo lettugal gooruwol Urdun. Ɓe teeti leyɗe ɗe ɓeen njeynoo, gilla naɗɗol Arnon faa yotti waamnde Hermon e lettugal naɗɗol Urdun. 2 Kaananke arandeejo oon wo Sihon. Kanko woni kaananke Amorinkooɓe, jooɗiiɗo ley Hesbon. Laamu makko fuɗɗii ngalluure Aro'er wonde hunnduko gooruwol Arnon. Ɗum woni hakkunde naɗɗol Arnon faa yottoo gooruwol Yabok, keerol leydi Amoninkooɓe. Ɗum woni feccere leydi Galaad. 3 Imo laaminoo du leydi ngonndi ley naɗɗol ɗakkiingol Urdun faro lettugal, wooɗi du gilla maayo Kinarot faa yottoo maayo Araba (kam woni maayo Lamɗam), ɗakkol Bet-Yesimot, e faro horɗoore ley jipporɗe waamnde Pisiga.4 Laamiiɗo ɗiɗaɓo oon wo Ogga kaananke Baasan, keddiiɗo hakkunde Refayinkooɓe (tagaako mawko mawko). Imo jooɗinoo ley Asterot e Edirey. 5 Leydi ndi o laaminoo wo waamnde Hermon e wuro Salka e leydi Baasan fuu faa yottii keerol Gesurinkooɓe e Maakatinkooɓe e feccere Galaad faa keerol laamorde Sihon, kaananke Hesbon.
6 Muusaa maccuɗo Joomiraaɗo e yimɓe Israa'iila njaalake kaanankooɓe ɗiɗo ɓeen. Muusaa maccuɗo Joomiraaɗo hokki gure maɓɓe ɗeen lenyol Ruben e Gad e feccere lenyol Manasa, ɗe laatoo ndongu muɓɓen.
Laamiiɓe ɓe Yoosuwa jaalii
7 Inan kaanankooɓe ɓe Yoosuwa e yimɓe Israa'iila njaalii gorgal gooruwol Urdun. Ɓe njaalii ɓeen gilla Ba'al-Gada, faro gorgal, nder naɗɗol Liban faa yottii waamnde Halak horɗoore Seyir (to leydi Edom). Yoosuwa hokki leydi ndiin yimɓe Israa'iila, senndi ndi fodde e lenyi maɓɓe. 8 Ɓe keɓi du leydi ngonndi dow baamle e ley naɗɗi Urdun e dow tile ɗakkol baamle e ley karaaje e ley ladde yoornde wonde horɗoore. Wo ɗum leyɗe ɗe Hitiyankooɓe e Amorinkooɓe e Kanaanankooɓe e Perisinkooɓe e Hiwinkooɓe e Yebusinkooɓe njooɗinoo ɗeen. 9 Inan laamiiɓe ɓe Israa'iila'en njaalii: Laamiiɗo Yeriko e kaananke Ayi (ɗakkol Baytila), 10 e kaananke Urusaliima, e Heberon, 11 e Yarmut, e Lakis, 12 e Egilon, e Gejer, 13 e Debir, e Geder, 14 e Horma, e Arat, 15 e Libina, e Adulam, 16 e Makeda, e Baytila, 17 e Tapuha, e Hefer, 18 e Afek, e Lasaron, 19 e Madon, e Hasor, 20 e Simeron Meeron, e Akisaf, 21 e Ta'anak, e Megiddo, 22 e Kedes. Wooɗi du kaananke Yokne'am dow waamnde Karmel, 23 e kaananke Dor (leydi ngonndi dow tile Dor), e kaananke Goyim nder Gilgal, 24 e kaananke Tirsa. Limgal kaanankooɓe leyɗe ɗeen fuu wo capanɗe tato e ngo'o.