No Yoosuwa jaalorii kaanankooɓe soɓɓiire
11
1 Wakkati oon, kaananke ngenndi Hasor wo gorko bi'eteeɗo Yabin. Nde o nannoo kabaaru jaalagol Israa'iila'en fu, o nelani Yobap, kaananke Maduuna, e kaananke Simron e kaananke Akisaf, 2 e laamiiɓe wonɓe dow baamle gonɗe soɓɓiire e ley ladde faa horɗoore Kinarot, e ley leydi ngondi ley baamle e njaayri Dor faro gorgal, 3 to Kanaaninkooɓe wonɓe lettugal e gorgal e to Amorinkooɓe e Hitiyankooɓe e Perisinkooɓe e Yebusinkooɓe wonɓe dow waamnde, e Hiwinkooɓe wonɓe ley waamnde Hermon nder leydi Mispa. 4 Kaanankooɓe ɓeen fuu ngardi e sordaasiiɓe muɓɓen, sordaasiiɓe ɗuuɗuɓe sanne hono njaareendi daande maayo. Ɓe ngaddi du pucci e torkooji pucci ɗuuɗuɗi. 5 Laamiiɓe ɓeen fuu ndewri. Ɓe njehi, ɓe koɗi ɗakkol diyeele Meerom faa ɓe kona Israa'iila'en.6 Joomiraaɗo wi'i Yoosuwa:
— Taa hulu ɓe! Jaango hono wakkati oo ɓe fuu mi wattan ɓe e juuɗe Israa'iila'en tawee wo ɓe barminaaɓe faa iɓe nesa maayde. Taƴaa codduli pucci maɓɓe, mbulaa torkooji pucci maɓɓe.
7 Yoosuwa e yimɓe muuɗum fuu njani e maɓɓe, njuhi ɓe ɗakkol diyeele Meerom. 8 Joomiraaɗo watti sordaasiiɓe ɓeen fuu e juuɗe Israa'iila'en. De Israa'iila'en njaalii ɓe, ndiiwi ɓe faa ɓe njotti Sidon huɓeere mawnde, faa Misrefot-Mayim, wooɗi du faa lettugal naɗɗol Mispa. Ɓe koni ɓeen faa ɓe kanti ɗum'en fuu. 9 Yoosuwa waɗi ɓe hono no Joomiraaɗo wiirunoo ɗum noon: O taƴi codduli pucci maɓɓe de o wuli torkooji maɓɓe du.
No ngalluure Hasor jaaloraa
10 Caggal ɗuum, Yoosuwa soƴƴii, honi huɓeere Hasor, jaalii nde. O wardi kaananke mayre kaafaahi. Tawi le, ley jamaanu oon fuu wo Hasor wonnoo huɓeere dawranoore laamorɗe gonɗe ley leydi Kanaana fuu. 11 Ɓe mbari neɗɗo fuu tawaaɗo nder huɓeere ndeen, walaa fuu mo ɓe keddi. Ɓe mbuli huɓeere ndeen.
12 Yoosuwa jaalii laamorɗe ɗeen fuu. O nanngi kaanankooɓe majje, o wari ɗum'en hono no Muusaa maccuɗo Joomiraaɗo yamirnoo mo noon. 13 Ammaa Israa'iila'en mbulaay gure nyiɓaaɗe dow nokkuuje toowɗe ɗeen, wo Hasor tan Yoosuwa wuli. 14 Yimɓe Israa'iila kooƴani ko'e muɓɓen daabaaji e sii jawdi keddiindi fuu, ammaa ɓe mbari yimɓe jooɗiiɓe ley kuɓeeje ɗeen fuu, ɓe kalki ɗum'en. 15 Ko Joomiraaɗo yamirnoo Muusaa, maccuɗo muuɗum, Muusaa du yamiri ɗum Yoosuwa. Noon du Yoosuwa waɗiri, ɗum fuu. O heddaay huunde fuu ko Joomiraaɗo yamirnoo Muusaa.
No Yoosuwa jaalorii leyɗe keddiiɗe
16 Yoosuwa jaalii leydi ndiin fuu: kuɓeeje gonɗe dow baamle e gonɗe horɗoore e lettugal e gorgal fuu, e leydi Goosan e kuɓeeje gonɗe ley ladde, e nder naɗɗol Urdun. 17 O heɓi jaalagol gilla waamnde Halak faro Seyir faa yottii Ba'al-Gada ley naɗɗol Liban faa ley waamnde Hermon. 18 Yoosuwa honi laamiiɓe gure ɗeen fuu faa waɗi duuɓi keewɗi. O nanngi ɓe, o wari ɓe, ɓe fuu. 19 Walaa fuu huɓeere waɗidinde e Israa'iila'en potal, sanaa Hiwinkooɓe jeyaaɓe Gibiyon tan. Ɓe koni kuɓeeje keddiiɗe ɗeen fuu, ɓe njeyti ɗe, ɗe fuu. 20 Joomiraaɗo e hoorem yoorni ɓerɗe maɓɓe faa ɓe ngaɗa konu e Israa'iila, heɓa ɓe kalkee, taa ɓeen njurmoo ɓe, hono no Joomiraaɗo yamirnoo Muusaa ni.
21 Wakkati oon Yoosuwa yehi, halkowi Anakinkeeɓe wonɓe dow baamle Heberon e Debir e Anaba, e dow baamle Yahuuda e Israa'iila fuu. Yoosuwa halki ɓe, kamɓe e kuɓeeje maɓɓe fuu. 22 Walaa Anakinkeeɓe keddiiɓe nder leydi Israa'iila'en, sanaa ley Gaaja e Gaat e Asdot tan.
23 Yoosuwa jaalii leydi ndiin fuu, hono no Joomiraaɗo yamirnoo Muusaa. Yoosuwa hokki ndi Israa'iila'en ndi laatanoo ɗum'en ndongu. O fecci ndi fodde lenyi maɓɓe. Konu timmi, leydi ndiin heɓi jam.