No naange darorii cep
10
1 Wakkati oon, Urusaliima na woodi kaananke bi'eteeɗo Adoni-Sadik. O nani Yoosuwa jeytii huɓeere Ayi, halkii nde, wari kaananke mayre hono no waɗiri Yeriko e kaananke mum noon. O nani du no yimɓe Gibiyon ngaɗiri paamiral e Israa'iila'en e no ɓe ngaɗiri joonnde maɓɓe hakkunde muɓɓen. 2 Kabaaru majjum hulɓini yimɓe Urusaliima sanne, sabo Gibiyon wo huɓeere mawnde fotunde e kuɓeeje jogiiɗe kaanankooɓe. Inde ɓuri Ayi mawnude, worɓe mayre fuu wo semmbiɗinɓe. 3 Adoni-Sadik, kaananke Urusaliima nelani Hoham kaananke Heberon, e Piriyam kaananke Yarmut, e Yafiya kaananke Lakis, e Debir kaananke Egilon. O wi'i ɓe:4 — Ngaree kawritee e am, mballon kam mi honowa huɓeere Gibiyon, sabo nde adidii e Yoosuwa e yimɓe Israa'iila amaana paamiral.
5 Laamiiɓe Amorinkooɓe njoyo ɓeen ngoni kaananke Urusaliima e mo Heberon e mo Yarmut e mo Lakis e mo Egilon. Ɓe kawrini jamaa konunkooɓe maɓɓe fuu, ɓe piilii huɓeere Gibiyon, ɓe kaɓi e mayre.
6 Yimɓe Gibiyon nelani Yoosuwa to hoɗorde muɓɓen ley Gilgal, mbi'i ɗum:
— Taa yoppu maccuɓe maaɗa! Waru law, mballaa min, kisinaa min! Sabo laamiiɓe Amorinkooɓe jooɗiiɓe ley baamle fuu kawrii faa kona min.
7 Yoosuwa e konunkooɓe muuɗum semmbiɗinɓe e jamaa konunkooɓe keddiiɗo oon fuu ummii Gilgal. 8 Joomiraaɗo wi'i Yoosuwa:
— Taa hulu ɓe, sabo mi wattii ɓe e junngo maa. Fay gooto maɓɓe walaa darotooɗo yeeso maa.
9 Yoosuwa e yimɓe muuɗum ndilli Gilgal, mbaali ina njaha faa njottii Gibiyon. Ɓe njuhi Amorinkooɓe ɓeen, ɓe njani e muɓɓen. 10 Joomiraaɗo jiiɓi hakkillooji Amorinkooɓe yeeso Israa'iila'en. Yimɓe Israa'iila njaalii ɓe jaalagol manngol ley Gibiyon, mbari keewal maɓɓe de ndiiwi heddiiɓe ɓeen faa to laawol jipporde Bet-Horon. Ɓe koni ɓeen faa yotti Ajeka e Makeda. 11 Wakkati Amorinkooɓe ndogganno Israa'iila'en to jipporde Bet-Horon ndeen, Joomiraaɗo sankiti malmalluuje mawɗe dow maɓɓe faa ɓe njottii Ajeka, de keewal maɓɓe maayi. Ɓe malmalluuje mbari ɓeen ina ɓuri ɓe Israa'iila'en mbardi kaafaaje ɓeen heewude.
12 Nyannde Joomiraaɗo hokkunoo Israa'iila'en jaalagol dow Amorinkooɓe ndeen, Yoosuwa ŋaarii Joomiraaɗo yeeso yimɓe Israa'iila fuu, wi'i:
— Aan naange, dara dow Gibiyon! Aan lewru du, daroɗaa dow naɗɗol Ayalon!
13 Tan, naange darii, lewru du darii, faa Israa'iila'en njaalii wayɓe muɓɓen fuu. Kabaaru majjum winndaama ley dewtere inndirteeɗo Ponnditiiɗo. Naange darii hakkunde kammu faa waɗi hono nyalaande hiɓɓunde, nge yanaay. 14 Nyalaande hono mayre waɗaayno abada, waɗata katin du, nde Joomiraaɗo hettindorii haala neɗɗo hono nii. Si goonga, Joomiraaɗo honani yimɓe Israa'iila ley wolde ndeen fuu.
15 Caggal ɗuum, Yoosuwa e Israa'iila'en fuu coƴƴii to hoɗorde muɓɓen ley Gilgal.
No Yoosuwa nanngiri laamiiɓe Amorinkooɓe njoyo ɓeen
16 Laamiiɓe Amorinkooɓe njoyo ɓeen ndoggi, cuuɗii ley loho Makeda. 17 Goɗɗo tawi ɓe toon de yehi holloyi Yoosuwa to ɓe cuuɗii. 18 Ndeen Yoosuwa wi'i yimɓe muuɗum:
— Tallee kaaƴe mawɗe, uddon hunnduko loho koon, de ndarnon sordaasiiɓe ɗakkol makka faa ndooma ɓe. 19 Ammaa onon heddiiɓe kaa, taa ndaree ɗoon. Ndiiwee wayɓe mooɗon, mbaree sankitiiɓe ɓeen fuu. Taa accee ɓe naata kuɓeeje maɓɓe, sabo Laamɗo Joomiraaɗo mon wattii ɓe e juuɗe mon.
20 Yoosuwa e yimɓe Israa'iila mbari keewal maɓɓe, ammaa woɓɓe maɓɓe keɓi ndaɗi, njeccii ley kuɓeeje muɓɓen cemmbiɗinɗe, piiltinaaɗe kokuuji. 21 Ndeen yimɓe Yoosuwa fuu ngarti e jam to hoɗorde muɓɓen ley Makeda. Caggal majjum walaa fay gooto ley yimɓe leydi ndiin biiɗo goɗɗum dow Israa'iila'en.
22 De Yoosuwa wi'i:
— Omtee dammbugal loho ngaal, mburtinee kaanankooɓe njoyo ɓeen, ngaddee ɓe to am.
23 Ɓe ngaɗiri noon, ɓe mburtini laamiiɓe njoyo ɓeen ley loho koon, ɓe ngaddi ɓeen to makko. Kamɓe ngoni kaananke Urusaliima e mo Heberon e mo Yarmut e mo Lakis e mo Egilon. 24 Nde ɓe ngaddanoo to Yoosuwa fu, o noddi worɓe Israa'iila fuu. O wi'i ardiiɓe konunkooɓe yaaduɓe e makko ɓeen:
— Ɓattitee, njaaɓee dow daaɗe maɓɓe.
— Taa kulee, taa nesiiji mooɗon taƴaa, ammaa cemmbinee ko'e mon, cemmbinee ɓerɗe mon du! Hono nii Joomiraaɗo waɗirta wayɓe mooɗon ɓe kaɓoton e muɓɓen ɓeen fuu. 26 Caggal ɗuum, Yoosuwa wari ɓe, ɓili ɓalli maɓɓe dow leɗɗe joy. Toon ɗi keddii faa kiiral naange. 27 Nde naange hiirunoo fu, Yoosuwa yamiri ɓalli maɓɓe njippinee dow leɗɗe ɗeen. Ɓe paɗɗi ɗi nder loho to ɓeen cuuɗinoo toon, de ɓe uddi kaaƴe mawɗe e hunnduko loho koon. Toon ɗe keddii faa warde hannden.
No Yoosuwa jaalorii leyɗe Amorinkooɓe
28 Nyalaande majjum Yoosuwa jaalii huɓeere Makeda. O wari kaananke mayre e yimɓe wonɓe ley mayre fuu, walaa mo o accidi e yonki. O waɗi kaananke Makeda hono no o waɗiri kaananke Yeriko.
29 Caggal ɗuum Yoosuwa e Israa'iila'en fuu ndilli Makeda, njehi huɓeere Libina, de ɓe koni nde. 30 Kayre du, Joomiraaɗo watti nde e juuɗe Israa'iila'en, kayre e kaananke mayre fuu. Ɓe accaay fay gooto, ɓe mbari huunde fuu ko woni e mayre. Ɓe ngaɗi kaananke Libina hono no ɓe ngaɗiri kaananke Yeriko.
31 Ndeen Yoosuwa e Israa'iila'en fuu ndilli Libina, njehi huɓeere Lakis. Ɓe piilii nde, ɓe koni nde. 32 Nyalannde ɗiɗaɓerde ndeen Joomiraaɗo watti Lakis e juuɗe Israa'iila'en. Ɓe njaalii nde, ɓe mbari neɗɗo fuu tawaaɗo nder huɓeere ndeen, hono no ɓe ngaɗiri huɓeere Libina. 33 Laamiiɗo Horam mo Gejer du wariino faa walla Lakis. Ammaa Yoosuwa jaalii mo, kanko e konunkooɓe makko fuu, o accidaay fay gooto maɓɓe e yonki.
34 Caggal majjum Yoosuwa e yimɓe Israa'iila fuu ndilli Lakis, njehi Egilon. Ɓe piilii huɓeere ndeen, ɓe koni nde. 35 Wo nyannde ndeen du ɓe njaalii nde. Ɓe mbari neɗɗo fuu tawaaɗo e mayre hono no ɓe ngaɗiri Lakis ni.
36 Caggal ɗuum Yoosuwa e Israa'iila'en fuu ndilli Egilon, ƴeeŋi baamle Heberon. Ɓe koni nde, 37 ɓe njaalii nde. Ɓe mbari kaananke mayre e neɗɗo fuu tawaaɗo ley huɓeere ndeen e ley gure piiliiɗe nde, ɓe accidaay fay gooto e yonki. Yoosuwa halki nde lay, hono no waɗiri huɓeere Egilon.
38 Caggal ɗuum, Yoosuwa e Israa'iila'en fuu coƴƴorii ngalluure Debir, de koni nde. 39 Ɓe njaalii nde, kayre e gure mayre fuu, ɓe nanngi kaananke mayre. Ɓe mbari neɗɗo fuu tawaaɗo nder ngalluure ndeen, ɓe accidaay fay gooto e yonki. Yoosuwa waɗi Debir hono no waɗiri Heberon e Libina e kaananke majje noon.
40 Ndelle, Yoosuwa jaalii leydi ndiin fuu. O jaalii gure gonɗe dow baamle e gonɗe horɗoore, e ley baamle e nder naɗɗi fuu, kanje e kaanankooɓe majje. O accidaay fay gooto e yonki. O halki ko foofata fuu, hono no Joomiraaɗo, Laamɗo Israa'iila yamirnoo mo noon. 41 Yoosuwa waɗi konu gilla Kaades-Barneya faa yottii Gaaja, gilla leydi Goosan faa yottii Gibiyon. 42 Yoosuwa jaalii laamiiɓe ɓeen e leyɗe muɓɓen fuu, ley orngal konu gootal. Ɗuum fuu waɗii sabo Joomiraaɗo Laamɗo Israa'iila honani yimɓe muuɗum ley wolde ndeen. 43 Caggal majjum, Yoosuwa e Israa'iila'en fuu coƴƴii Gilgal to hoɗorde muɓɓen.