No yimɓe Gibiyon kiiliri yimɓe Israa'iila
9
1 Kabaaru jaalagol Israa'iila'en yottii laamiiɓe wonɓe gorgal Urdun fuu, to leyɗe gonɗe dow baamle, e ley baamle e leyɗe ɗakkiiɗe maayo Manngo faa yottii Liban. Ɓeen ngoni laamiiɓe Hitiyankooɓe e Amorinkooɓe e Kanaaninkooɓe e Perisinkooɓe e Hiwinkooɓe e Yebusinkooɓe fuu. Nde ɓe nannoo kabaaru majjum ndeen, 2 ɓe kawriti, ɓe ngaɗi paamiral faa ɓe kaɓda e Yoosuwa e Israa'iila'en.3 Ammaa nde yimɓe Gibiyon kaa nannoo no Yoosuwa halkiri yimɓe Yeriko e yimɓe Ayi fu, 4 ngaɗi dabare no kiilira Israa'iila'en. Ɓe kooƴi njooɓaari, ɓe ndimdi araaji maɓɓe bootooji kiiɗɗi, e sumalleeji kiiɗɗi moƴƴintinaaɗi.
5 Ɓe ɓornii du paɗe kiiɗɗe moƴƴintinaaɗe e tekke nyolɗe. Buuru njooɓaari maɓɓe fuu yoorii faa feccake. 6 Ɓe njehi to hoɗorde Israa'iila'en wonnde Gilgal, ɓe mbi'i Yoosuwa e yimɓe Israa'iila:
— Min ƴuurii leydi mboɗɗundi sanne. Miɗen njiɗi ngaɗon amaana e amin.
7 Ammaa Israa'iila'en mbi'i ɓe:
— Noy min kaɓɓidirta e mooɗon amaana sabo na waawi tawee e leydi amin ndi ngonɗon.
8 De ɓe mbi'i Yoosuwa:
— Min maccuɓe maa.
Yoosuwa ƴami ɓe:
— Moy'en laatiɗon? Toy ƴuuruɗon?
9 Ɓe njaabii mo, ɓe mbi'i:
— Minen maccuɓe maaɗa min ƴuurii leydi mboɗɗundi, sabo min nanii kabaaru innde Laamɗo Joomiraaɗo mon. Min nanii kabaaru kaayeefiiji ɗi o waɗi ley Misira, 10 e ko hewtii kaanankooɓe Amorinkooɓe ɗiɗo jooɗinooɓe caggal Urdun ɓeen. Kamɓe ngoni Sihon kaananke Hesbon e Ogga kaananke Baasan jooɗiiɗo ley Asterot. 11 Mawɓe amin e yimɓe leydi amin fuu mbi'i: «Kooƴanee ko'e mooɗon njooɓaari jahaangal. Njehee kawree e maɓɓe, mbi'on ɓe wo en maccuɓe maɓɓe, ammaa ɓe kaɓɓa amaana e meeɗen.» 12 Buuru amin oo, min kooƴii ɗum illa ina foowi nyannde min mburtinoo faa min kawra e mooɗon. Ndaaree, joonin o yoorii faa imo feccii. 13 Wakkati min kebbinnoo sumalleeji ɗi wo ɗi kesi, de joonin kaa, inan, ɗi ngaɗii ceeki ceeki. Tekke amin e paɗe amin fuu kiiɗɗi sanne saabe jahaangal amin juutungal ngaal.
14 Yimɓe Israa'iila njaɓi njooɓaari maɓɓe, ammaa ƴamaay Joomiraaɗo kabaaru maɓɓe. 15 Yoosuwa waɗi paamiral e maɓɓe, haɓɓidi e maɓɓe amaana faa acca ɓe mbuura. Mawɓe yimɓe Israa'iila ngaɗi hunayeere dow majjum.
16 Wooɗi, balɗe tati caggal ko Israa'iila'en kaɓɓidi e maɓɓe amaana, kumpitaa yimɓe ɓeen wo jooɗiiɓe hakkunde muɓɓen. 17 Yimɓe Israa'iila ummii, njehi kuɓeeje maɓɓe. Kuɓeeje maɓɓe ngoni Gibiyon e Kefiira e Biirot e Kiriyat-Ye'arim. 18 Ammaa yimɓe Israa'iila konaay ɓe, sabo ardiiɓe jamaa ɓeen kunanake ɓe e innde Joomiraaɗo, Laamɗo Israa'iila. Jamaa oon fuu feli mawɓe ɓeen. 19 Ammaa mawɓe ɓeen mbi'i:
— Min kunanake ɓe e innde Joomiraaɗo, Laamɗo Israa'iila. Saabe majjum en mbaawataa meemude ɓe katin. 20 Inan ko ngaɗeten ɓe: En accan ɓe mbuura saabe hunayeere nde min kunanii ɓe ndeen. Si en ngaɗaay noon fu, tikkere Joomiraaɗo waran dow meeɗen. 21 Accee ɓe mbuura, ɓe laatanoo jamaa oon fuu soppooɓe leɗɗe e ƴoogooɓe ndiyam.
Ɗum woni ko mawɓe ɓeen njamiri dow maɓɓe.
22 Yoosuwa noddi yimɓe Gibiyon, ƴami ɗum'en:
— Ko saabii njambiɗon min? On mbi'ii wo nokkuure woɗɗunde sanne ƴuuruɗon, jaka wo ɗakkol amin njooɗiɗon. 23 Saabe majjum kuddi Laamɗo ina dekii dow mooɗon. On ƴuwataa e soppude leɗɗe e ƴoogannde suudu Laamɗo am ndiyam faa abada.
24 Ɓe njaabii Yoosuwa, ɓe mbi'i:
— Inan ko saabii min ngaɗiri noon: Si goonga min nanii Laamɗo Joomiraaɗo maa yamirii maccuɗo muuɗum Muusaa hokka on leydi ndi fuu, halka jooɗiiɓe ley mayri fuu yeeso mooɗon. Wooɗi min kuliino on sanne, min kulaniino yonkiiji amin du. Ɗum saabii de min ngaɗiri noon. 25 Joonin kaa inani min e juuɗe maaɗa, ngaɗaa min ko fotani ma fuu.
26 Ndeen Yoosuwa waɗani ɓe moƴƴere. O hisini ɓe e juuɗe yimɓe Israa'iila, taa mbara ɓe. 27 Nyannde majjum Yoosuwa waɗi ɓe soppooɓe leɗɗe e ƴooganooɓe jamaa oon fuu ndiyam, kam'en e hirsirde Joomiraaɗo ndeen fuu, ley nokku to Joomiraaɗo suɓii faa Israa'iila'en ngona fuu. Ɗuum laatii golle maɓɓe faa warde hannden.