No Israa'iila jaalorii Ayi
8
1 Joomiraaɗo wi'i Yoosuwa:— Hooƴu konunkooɓe ɓeen fuu, njaadon Ayi. Taa hulu, taa accu cuusal nyake sabo mi wattii kaananke Ayi e yimɓe muuɗum e huɓeere ndeen e leydi ndiin fuu e junngo maa. 2 Waɗu Ayi e kaananke mum hono no ngaɗirɗaa Yeriko e kaananke muuɗum noon. Ammaa kooƴanon ko'e mooɗon daabaaji maɓɓe e jawdi keddiindi. Kawriton, konon huɓeere ndeen e cuncukka. Ƴuuron caggal mayre.
3 Yoosuwa e konunkooɓe fuu ummii, njehi Ayi. Yoosuwa suɓii worɓe semmbiɗinɓe ujunaaje capanɗe tato, neli ɗum'en ley jemma. 4 O wi'i ɓe:
— Njehee, cuuɗowee caggal huɓeere ndeen. Taa mboɗɗee nde sanne. Cegilanoɗon honude nde. 5 Miin e yimɓe wonduɓe e am ɓeen, min ɓadoto nde. Si ɓe mburtake ɓe kawrii e amin fu, min ndoggan ɓe hono no arande ni. 6 Ɓe mburtotoo ɓe njokka min faa ɗo min mboɗɗini ɓe e huɓeere ndeen. Ɓe miiloto du min ndoggii ɓe hono no arande ni. 7 Ndeen ummoɗon ɗo cuuɗiɗon caggal mayre ɗoon, konon nde. Laamɗo Joomiraaɗo mon wattan nde e juuɗe mon. 8 Wakkati njaaliɗon huɓeere ndeen fu, kuɓɓon yiite, mbulon nde. Ngaɗee ko Joomiraaɗo yamiri on ɗuum. Ɗuum woni ko njamirmi on.
9 Ndeen Yoosuwa neli ɓe. Ɓe njehi nokkuure ɗo ɓe cuuɗotoo faro gorgal Ayi, hakkunde Ayi e Baytila. Ammaa jemma majjum Yoosuwa waaldi e konunkooɓe heddiiɓe ɓeen to hoɗorde maɓɓe toon.
10 Jaangoore majjum Yoosuwa ummii gilla beetee, hawrunduri yimɓe muuɗum. Kanko e mawɓe Israa'iila, ɓe ardii yimɓe ɓeen, ɓe ponndii Ayi. 11 Honooɓe wonduɓe e makko ɓeen fuu ummanii huɓeere ndeen, ɓe ɓattitii nde. Ɓe ndarii soɓɓiire Ayi, naɗɗol ina woni hakkunde maɓɓe e Ayi. 12 Yoosuwa hooƴi worɓe ujunaaje njoyo, suuɗi ɗum'en gorgal huɓeere ndeen hakkunde Ayi e Baytila. 13 Jamaa konunkooɓe mawɗo ina darnaa soɓɓiire huɓeere ndeen, woɓɓe du ina ngoni gorgal mayre. Jemma majjum Yoosuwa waali ley naɗɗol toon.
14 Beetee law, nde kaananke Ayi yi'unoo yimɓe Israa'iila fu, wurtii law, kam e worɓe Ayi fuu faa kona ɓe. Ɓe njehi to naɗɗol Urdun, nokku to ɓe kawrunoo e Israa'iilankooɓe arande ɗoon. Ammaa o anndaa ina woodi ɗappiniiɓe caggal huɓeere maɓɓe. 15 Yoosuwa e Israa'iilankooɓe fuu coƴƴii ina ndoggaa. Ɓe ponndii faro ladde, hono wo ɓe jaalaaɓe ni. 16 Yimɓe huɓeere ndeen fuu kawrinaa faa ndiiwa Israa'iila'en. Ɓe ndiiwi Yoosuwa faa ɓe mboɗɗowii e huɓeere maɓɓe. 17 Walaa fuu gorko mo ɓe njoppi ley Ayi e Baytila. Ɓe fuu ɓe ndiiwi Israa'iila'en, ɓe acci dammbuɗe huɓeere ndeen ina omtii.
18 Ndeen Joomiraaɗo wi'i Yoosuwa:
— Ɓantu labbo maa, cappoɗaa dow huɓeere Ayi, sabo mi wattii nde e junngo maa.
Yoosuwa ɓanti labbo mum dow huɓeere ndeen.
19 Yimɓe suuɗinooɓe ɓeen ummii ɗo cuuɗinoo ɗoon law, ndoggi naati huɓeere ndeen, njaalii nde, de kuɓɓi yiite, mbuli nde. 20 Yimɓe Ayi njeeƴii, nji'i cuurki na ƴuura e huɓeere muɓɓen ina ƴeeŋa faa dow kammu. Ɓe keɓaay laawol doggude, sabo Israa'iila'en doggannooɓe yeeso maɓɓe ɓeen coƴƴii ina kaɓa e maɓɓe. 21 Nde Yoosuwa e Israa'iila'en njiinoo yimɓe suuɗinooɓe ɓeen njeyti huɓeere ndeen, cuurki ina ƴeeŋa dow kammu fu, coƴƴii mbari worɓe Ayi. 22 Israa'iila'en suuɗinooɓe ɓeen mburtii huɓeere ndeen, naati konu nguun. Worɓe Ayi keddii ina tummbii hakkunde Israa'iila'en. Israa'iilankooɓe ina ngoni caggal maɓɓe e yeeso maɓɓe fuu. Israa'iila'en mbari yimɓe Ayi fuu, walaa fuu daɗɗo, walaa du kisuɗo e maɓɓe. 23 Ammaa ɓe nanngi kaananke Ayi oon wo buurɗo, ɓe njaari ɗum to Yoosuwa. 24 Israa'iila'en mbari yimɓe Ayi wonɓe ley gese e ley ladde yoornde to ɓe ndiiwunoo ɗum'en toon fuu. Ndeen ɓe coƴƴii ley Ayi, ɓe mbardi heddiiɓe toon ɓeen fuu kaafaaje. 25 Worɓe e rewɓe waraaɓe nyannde majjum wo yimɓe ujunaaje sappo e ɗiɗo, ɗum woni limgal yimɓe Ayi fuu. 26 Yoosuwa heddii ina sappii labbo muuɗum dow Ayi faa Israa'iila'en kalki Ayi fuu. 27 Ammaa dammucce e jawdi konaandi fuu, Israa'iila'en kooƴani ko'e muɓɓen, hono no Joomiraaɗo wiirunoo Yoosuwa ni. 28 Yoosuwa wuli huɓeere Ayi, waɗi ɗum winnde faa warde hannden. 29 O haɓɓi daande kaananke Ayi, o ɓili ɗum dow lekki faa kiiral naange. Nde naange hiirunoo fu, Yoosuwa yamiri ɓe njippina ɓanndu makko. Ɓe paɗɗi ndu faa to dammbugal huɓeere ndeen, ɓe ndeki dow mayru joorde kaaƴe mawnde. Joorde kaaƴe ndeen ina heddii faa warde hannden.
No Tawreeta janngiraa dow waamnde Ebal
(Fillitagol 27:1-26)
30 Caggal majjum Yoosuwa nyiɓani Joomiraaɗo, Laamɗo Israa'iila, hirsirde dow waamnde Ebal. 31 O nyiɓiri nde hono no Muusaa maccuɗo Joomiraaɗo yamirnoo yimɓe Israa'iila, fodde ko winndaa ley dewtere Tawreeta Muusaa: Hirsirde nyiɓiraande kaaƴe ɗe fay wootere muɓɓen sehaaka. Ɓe cakkani Joomiraaɗo sadakaaji buleteeɗi e jeɗeteeɗi dow hirsirde ndeen. 32 Yeeso yimɓe Israa'iila ɗoon, Yoosuwa winndi dow kaaƴe hirsirde ndeen binndi Tawreeta ɗi Muusaa winndunoo. 33 Wakkati majjum yimɓe Israa'iila fuu, mawɓe e ardiiɓe e sarotooɓe, e weerɓe wonɓe hakkunde muɓɓen fuu keddii ina ndarii seraaji keesuwal Joomiraaɗo ngaal. Ɓe ndarii yeeso almaami'en, Lewinkooɓe wakkiiɓe Keesuwal Amaana Joomiraaɗo ɓeen. Woɓɓe maɓɓe ina ndarii yeeso waamnde Gerisiima, woɓɓe maɓɓe du ina ndarii yeeso waamnde Ebal. Noon Muusaa maccuɗo Joomiraaɗo yamirnoo ɓe ngaɗira faa ɓe mbarkinee. 34 Yoosuwa janngi jamirooje Tawreeta fuu, kaalooje haala barke e kuddi fuu, hono ko winndaa ley dewtere Tawreeta.
35 Yoosuwa janngi jamirooje Muusaa fuu. Fay gootel walaa ngel o heddi. O janngi ɗe yeeso kawrital yimɓe Israa'iila fuu, kamɓe e rewɓe maɓɓe e ɓiɓɓe maɓɓe e weerɓe jooɗiiɓe hakkunde maɓɓe fuu.