Hakke Akan
7
1 Yimɓe Israa'iila lutti yamiroore dow kujje ɗe ɓe kaɗaa, cakkanteeɗe Joomiraaɗo ɗeen. Akan ɓii Karmi, taan Jabdi ɓii Jera, jeyaaɗo ley lenyol Yahuuda hooƴi kujje ɗeen. Saabe majjum tikkere Joomiraaɗo wari dow yimɓe Israa'iila.2 Nde ɓe ngonnoo Yeriko ndeen, Yoosuwa neli worɓe gomma ley wuro wi'eteengo Ayi, wonungo ɗakkol Bet-Awen lettugal Baytila. O wi'i ɓe:
— Njehee korowee leydi ndiin.
— Tilsaay yimɓe fuu njaha. Worɓe ujunaaje ɗiɗo maa tato njaha, konowa Ayi. Taa yaaru yimɓe fuu toon, sabo yimɓe Ayi ɗuuɗaa.
4 Worɓe ujunaaje tato njehi faa konowa Ayi, ammaa yimɓe Ayi njaalii ɓe, ɓe ndoggi yeeso muɓɓen. 5 Yimɓe Ayi mbari worɓe capanɗe tato e njeegom ley yimɓe Israa'iila. Ɓe ndiiwi ɗum'en gilla dammbugal Ayi faa ɓe njottii Sebariima, ɓe mbari woɓɓe muɓɓen to jipporde waamnde. Kulol manngol nanngi yimɓe Israa'iila'en faa hakkillooji muɓɓen awii.
6 Yoosuwa e mawɓe Israa'iila ceeki kaddule muɓɓen, kippi geese muɓɓen yeeso keesuwal Joomiraaɗo, faa kiiral naange. Ɓe paɗɗi sollaare dow ko'e maɓɓe saabe mettorgal. 7 Yoosuwa wi'i:
— Yaa Laamɗo Joomiraaɗo, ɗume saabii de peƴƴintinɗaa jamaa o fuu gooruwol Urdun? Yalla faa ngattaa min e juuɗe Amorinkooɓe, de ɓe kalka min naa? Wayyoo! Tawenoo faa joonin caggal Urdun toon min keddinoo! 8 Joomiraaɗo, ɗume mbi'ammi joonin? Sabo Israa'iila'en ndoggii yeeso wayɓe muɓɓen. 9 Si Kanaaninkooɓe e yimɓe wonɓe nder leydi ndi nanii ɗum fu, ɓe tummbiran min, ɓe mooyta inɗe amin nder leydi ndi. De noy ngaɗataa faa innde maa mawnde ndeen anndee?
10 Joomiraaɗo wi'i Yoosuwa:
— Umma! Ko waɗi aɗa hippiri nii yeeso maa e leydi? 11 Israa'iila'en ngaɗi hakke. Ɓe luttii amaana mo kaɓɓidimmi e maɓɓe dow yamiroore am. Ɓe kooƴii kujje goɗɗe hakkunde kujje ɗe karminmi ɗeen, ɓe mbujjii ɗe, ɓe ngattii ley gineeji maɓɓe, ɓe cuuɗi. 12 Saabe majjum yimɓe Israa'iila mbaawataa daraade yeeso wayɓe muɓɓen katin. Ɓe ndoggan yeeso ɓeen. Ɓe ngaddanii ko'e maɓɓe halkere. Mi wondataa e mooɗon si on ittaay ko harmi ɗum ley mooɗon. 13 Umma laaɓin jamaa oon. Wi'u yimɓe ɓeen laaɓina ko'e muɓɓen saabe jaango. Inan ko Joomiraaɗo, Laamɗo Israa'iila wi'i: «Huunde harminaande ina tawaa hakkunde mooɗon, onon Israa'iila'en. On mbaawataa daraade yeeso wayɓe mon katin, si wanaa itton hakke oon. 14 Jaango gilla beetee, ɓattitoɗon, mono fuu e lenyol muuɗum. Lenyol ngol Joomiraaɗo sappii ngool, ɓattitoo mono fuu e koreeji muuɗum. Koreeji ɗi Joomiraaɗo sappii ɗiin, ɓattitoo mono fuu e yimɓe mum. Suudu ndu Joomiraaɗo sappii nduun, worɓe mum fuu ɓattitoo, gooto gooto. 15 Cappaaɗo saabe kujje cakkanteeɗe Joomiraaɗo oon faɗɗete ley yiite, kanko e ko o jeyi fuu, sabo o luttii amaana Joomiraaɗo, o semtinii leydi Israa'iila.»
16 Jaango majjum, gilla beetee law Yoosuwa ummii. O hawrunduri Israa'iila'en mono fuu e lenyol mum, de lenyol Yahuuda sappaa. 17 O ɓattini lenyol Yahuuda, de koreeji Jera cappaa. O ɓattini koreeji Jera mono fuu e yimɓe mum, de suudu Jabdi sappaa. 18 O ɓattini worɓe jeyaaɓe e suudu Jabdi, de Akan ɓii Karmi taan Jabdi ɓii Jera nder lenyol Yahuuda sappaa. 19 Yoosuwa wi'i Akan:
— Ɓinngel am, teddin Joomiraaɗo, Laamɗo Israa'iila, haalu goonga. Hollam ko ngaɗɗaa. Taa suuɗam fay huunde. 20 Akan jaabii mo wi'i:
— Goonga, mi waɗii hakke yeeso Joomiraaɗo, Laamɗo Israa'iila. Inan ko ngaɗumi: 21 Ley jaalagol konu nji'umi nder jawdi saaya lobba ƴuuruka Baabiila, e buuɗi cardi keme ɗiɗi, e tayre kaŋŋe nde teddeefi mum waɗi feccere kilo. Eelgal (muuyo) majjum nanngi kam, de kooƴumi ɗum. On tawan ɗum fuu ley ngayka, nder hukum am, de cardi ndiin ina heedi ley majjum.
22 Yoosuwa neli worɓe to hukum Akan. Ɓe ndoggiri to hukum oon. Ɓe tawi jawdi ndiin ina uwaa nder hukum oon, cardi ndiin ina heedi ley majjum. 23 Ɓe kooƴi ɗum, ɓe ngaddi to Yoosuwa yeeso yimɓe Israa'iila fuu, ɓe mballini ɗum yeeso Joomiraaɗo. 24 Yoosuwa e yimɓe Israa'iila fuu kooƴi Akan ɓii Jera e cardi ndiin e jawdi keddiindi ndiin e tayre kaŋŋe ndeen, e ɓiɓɓe makko worɓe e rewɓe, e na'i makko e araaji makko e dammucce makko e hukum makko e ko o jeyi fuu, ɓe njaari ɗum ley naɗɗol Akor. 25 Ndeen Yoosuwa wi'i Akan:
— Ɗume saabii de ngaddanɗaa min bonanda o? Hannden Joomiraaɗo waddante bonanda.
Ndeen yimɓe Israa'iila fuu paɗɗi Akan kaaƴe faa maayi. Ɓe paɗɗi koreeji makko e ko o woodi fuu kaaƴe. Ndeen ɓe mbuldi ɓeen yiite. 26 Ɓe ndeki joorde kaaƴe mawnde dow muɓɓen. Joorde ndeen na heddii faa warde hannden. Saabe majjum ɓe inndiri nokkuure ndeen naɗɗol Akor (ɗum woni «bonanda»), noon woni innde mayre faa joonin.
Caggal ɗuum Joomiraaɗo itti tikkere muuɗum nyaaɗunde ndeen dow Israa'iila.