No Yeriko saamiri e juuɗe Israa'iila'en
6
1 Wooɗi, dammbuɗe Yeriko fuu ommbaama. Ɓe ommbii ɗe sabo ɓe kulii Israa'iilankooɓe. Walaa naatoowo, walaa burtotooɗo du. 2 Joomiraaɗo wi'i Yoosuwa:— Ndaar, mi wattii Yeriko e kaananke muuɗum e worɓe mum semmbiɗinɓe fuu e junngo maa. 3 Aan e waawɓe konu fuu piiloɗon huɓeere ndeen nde wootere nyannde fuu faa balɗe jeegom. 4 Almaami'en njeɗɗo ada luwe jawɗi, mono fuu luwal gootal. Ɓe ardoo Keesuwal Amaana ngaal. Nyannde jeɗɗaɓerde piiltoɗon huɓeere ndeen kile jeɗɗi, almaami'en ɓeen du puufa luwe muɓɓen. 5 Si ɓe puufii luwe maɓɓe, ɓe ngaɗii olko faa ɓooyti fu, yimɓe fuu ƴeewnoo daaɗe muɓɓen e semmbe. Ndeen kokuwol huɓeere ndeen saaman. Mono fuu naatira yeeso muuɗum, hippoo nde.
6 Yoosuwa ɓii Nuun noddi almaami'en, wi'i ɗum'en:
— Ƴeptee Keesuwal Amaana ngaal. Almaami'en njeɗɗo ley mooɗon ada luwe jawɗi, mono fuu luwal gootal de ɓe ardoo keesuwal Joomiraaɗo ngaal.
7 Caggal ɗuum o wi'i yimɓe ɓeen:
— Njehee, piiloɗon huɓeere ndeen. Woɓɓe mooɗon ardoo Keesuwal Joomiraaɗo ngaal.
8 Ɗum fuu ɗum laatorii hono no Yoosuwa tindiniri yimɓe ɓeen. Almaami'en njeɗɗo fuufooɓe luwe jawɗi yeeso Joomiraaɗo ɓeen ardii ina puufa luwe muɓɓen. Almaami'en wakkiiɓe Keesuwal Amaana Joomiraaɗo ɓeen du njokki ɓe. 9 Feccere konunkooɓe ina ardii almaami'en jogiiɓe luwe ɓeen. Woɓɓe du ina njokki keesuwal Joomiraaɗo ngaal. Nde ɓe njahannoo ndeen, Almaami'en keddii ina puufa luwe muɓɓen. 10 Ammaa tawi Yoosuwa yamiriino yimɓe ɓeen du, wi'i ɗum'en:
— Taa ƴeewnee daaɗe mon, taa ngaɗee olko, taa mbi'ee fay huunde faa nyannde mbi'umi on ƴeewnoɗon.
11 Keesuwal Joomiraaɗo ngaal fiiltinaa huɓeere ndeen. Ɓe piiltini ngal nde wootere. Caggal ɗuum, ɓe ngarti hoɗorde maɓɓe, ɓe mbaali ɗoon.
12 Jaango majjum Yoosuwa ummii gilla beetee. Almaami'en du mbakkii keesuwal Joomiraaɗo ngaal.
13 Almaami'en fuufooɓe luwe jeɗɗi ɓeen ardii almaami'en wakkiiɓe Keesuwal Joomiraaɗo ngaal. Ɓe keddii iɓe puufa luwe maɓɓe. Feccere konunkooɓe ina ardii ɓe. Feccere wonde du ina jokki keesuwal Joomiraaɗo ngaal. 14 Nyalaande ɗiɗaɓerde ndeen du, ɓe piiltii huɓeere ndeen nde wootere, caggal ɗuum ɓe coƴƴii to joonnde maɓɓe. Ɓe ngaɗiri noon faa waɗi balɗe jeegom.
15 Nyalaande jeɗɗaɓerde ndeen, ɓe ummii gilla beetee. Ɓe njehi, ɓe piiltii huɓeere ndeen hono no ɓe mboowrunoo waɗude noon, ammaa nyallande ndeen kaa ɓe piiltake kile jeɗɗi. Nyannde majjum tan ɓe piiltii huɓeere ndeen faa waɗi kile jeɗɗi. 16 Nde kile jeɗɗi ɗeen kuulunoo fu, almaami'en ɓeen puufi luwe muɓɓen faa ɓooyti. Ndeen Yoosuwa wi'i yimɓe ɓeen:
— Ƴeewnee e semmbe! Sabo Joomiraaɗo hokkii on huɓeere ndeen. 17 Kalkee huɓeere ndeen e ko woni e mayre fuu, nde laatoo sakkanaande Joomiraaɗo. Walaa acceteeɗo wuura, sanaa Rahabu, debbo woykuruujo oon, kam e yimɓe wonɓe nder suudu muuɗum ɓeen tan, sabo o suuɗii nelaaɓe men, horooɓe ɓeen. 18 Ammaa ndeentee taa kooƴee kujje kalketeeɗe ɗeen. Sabo si on kooƴii ɗe, on ngaddan halkere dow joonnde Israa'iila fuu. 19 Cardi e kaŋŋe e kujje gaɗiraaɗe njamndi ɓaleeri e mboɗeeri fuu cakkante Joomiraaɗo, ɗum wattete ley keesuwal muuɗum.
20 Almaami'en puufi luwe muɓɓen. Nde yimɓe nannoo olko majje fu, ƴeewnii e semmbe, de kokuwol huɓeere ngool boɓɓii lay. Yimɓe njani e huɓeere ndeen, naati nde, mono fuu rewi yeeso muuɗum. Ɓe teeti huɓeere ndeen. 21 Ɓe mbardi ko woni nder mayre fuu kaafaaje maɓɓe. Ɓe mbari worɓe e rewɓe, sukaaɓe e mawɓe, na'i e dammucce e araaji fuu.
22 Yoosuwa wi'i worɓe ɗiɗo horoynooɓe leydi ndiin:
Naatee ley suudu debbo woykuruujo oon, mburtinee mo, kanko e sakiraaɓe makko, hono no kunoraniɗon mo.
23 Ɓe njehi, ɓe mburtini Rahabu e baaba muuɗum e inna muuɗum e sakiraaɓe muuɗum e jeydaaɓe muuɗum fuu. Ɓe njoƴƴini ɗum'en sera hoɗorde Israa'iila'en.
24 Caggal majjum ɓe mbuli huɓeere ndeen e ko woni nder mayre fuu. Ammaa ɓe ndesi cardi e kaŋŋe e kujje ngaɗiraaɗe njamndi ɓaleeri e mboɗeeri nder ko resaa ley suudu Joomiraaɗo. 25 Yoosuwa hisini yonki Rahabu, debbo woykuruujo oon, e yimɓe muuɗum e jeydaaɓe muuɗum fuu, sabo o suuɗiino horooɓe ɓe Yoosuwa nelnoo faa kora Yeriko ɓeen. Rahabu heddii hakkunde yimɓe Israa'iila faa warde hannden.
26 E wakkati oon, Yoosuwa hunii, wi'i:
— Neɗɗo fuu ummiiɗo faa nyiɓtoo huɓeere Yeriko nde, laatoo kuɗaaɗo yeeso Joomiraaɗo, afo joomum maaya e dow puɗɗam mahugol mayre, koddaajo mum du maaya e dow darnugol dammbuɗe mayre.
27 Joomiraaɗo ina wondi e Yoosuwa, kabaaru makko sankitii nokku fuu nder leydi ndiin.