No yimɓe Israa'iila taadiraa ley Gilgal
5
1 Laamiiɓe Amorinkooɓe wonɓe gorgal gooruwol Urdun, e laamiiɓe Kanaaninkooɓe wonɓe ɗakkol maayo Manngo ɓeen fuu nani no Joomiraaɗo yoorniri ndiyam Urdun yeeso Israa'iila'en faa ɓe peƴƴita. Ndeen kulol manngol nanngi ɓe faa ɓe mbemmbaa. 2 Wakkati majjum Joomiraaɗo wi'i Yoosuwa:— Adu kaaƴe, ngaɗaa ɗe laɓe, taadaa yimɓe Israa'iila ɓe taadaakano ɓeen.
3 Yoosuwa waɗi laɓe ɗeen, taadi Israa'iila'en dow waamnde wi'eteende waamnde taadagol. 4 Inan ko saabii Yoosuwa taadi yimɓe Israa'iila. Nde yimɓe Israa'iila mburtinoo Misira ndeen, worɓe waawɓe konu taadanooɓe ɓeen fuu maayii dow laawol, nder ladde yoornde. 5 Worɓe yaltuɓe Misira ɓeen taadanooma, ammaa rimaaɓe dow laawol ley ladde ɓeen kaa taadaaka. 6 Wooɗi yimɓe Israa'iila ngaɗiino duuɓi capanɗe nay ina njaha ley ladde. Wakkati majjum ɓe keɓaay taadude ɓiɓɓe maɓɓe worɓe. Waawɓe konu wurtiiɓe Misira ɓeen du fuu maayii nder ladde saabe ko ɓe ɗowtanaaki Joomiraaɗo ɗuum. Joomiraaɗo hunii, wi'i ɓe nji'ataa leydi ndi o hunaninoo maamiraaɓe maɓɓe o hokkan en, enen taaniraaɓe maɓɓe, ndi kosam e njuumndi heewi e muuɗum ndiin. 7 Ammaa ɓiɓɓe maɓɓe worɓe ɓe o darni faa loomta ɓe ɓeen Yoosuwa taadi sabo ɓe taadaakano ley jahaangal maɓɓe.
8 Nde ɓe tilinoo taadude ɓeen fu, jamaa oon heddii ɗoon faa juulnaaɓe ɓeen fuu ndaɗi. 9 Joomiraaɗo wi'i Yoosuwa katin:
— Hannden mi talliti semteende nde mburtodiɗon Misira ndeen, mi woɗɗinii on.
Saabe majjum faa warde hannden nokkuure ndeen na wi'ee Gilgal (iɗum fiirta tallitinde).
10 Nde ɓe koɗunoo ley Gilgal nder ladde Yeriko ndeen, ɓe ngaɗi weltaare iidi Faltagol Maayde. Wo nyalaande sappo e nayaɓerde lewru go'aɓurdu, wakkati kiiral naange.
11 Jaangoore majjum, nde iidi Faltagol tilinoo ndeen, ɓe puɗɗi nyaamude nyaamdu leydi Kanaana, ɗuum woni buuru mo ƴuufinaaka e gabbe ca'aaɗe. 12 Nyannde majjum nyaamdu wi'eteendu manna nduun seli toɓande yimɓe Israa'iila. Ley hitaande ndeen ɓe nyaami nyaamdu leydi Kanaana.
Yoosuwa e mawɗo konunkooɓe Laamɗo
13 Nde Yoosuwa ɓattinoo Yeriko fu, ɓanti gite muuɗum, yi'i gorko gomma ina darii yeeso muuɗum, ina jogii kaafaahi e junngo mum. O yehi to gorko oon, o ƴami ɗum:
— Aan le, wo moy ngonanɗaa? Yalla minen naa wayɓe amin?
14 Gorko oon jaabii mo, wi'i:
— A'aa, miin, wo mi mawɗo sordaasiiɓe Joomiraaɗo, garɗo joonin.
Yoosuwa hippii yeeso makko, sujidani mo, wi'i:
— Ɗume joomam wari faa haalana maccuɗo muuɗum?
15 Mawɗo konunkooɓe Joomiraaɗo oon jaabii mo, wi'i:
— Ittu paɗe maa, sabo nokkuure nde ndariɗaa e muuɗum ndeen wo seniinde.
Yoosuwa waɗi noon.