Haala kaaƴe sappo e ɗiɗi miccintinooje
4
1 Nde jamaa oon fuu feƴƴitinnoo gooruwol Urdun ndeen, Joomiraaɗo wi'i Yoosuwa:2 — Cuɓee worɓe sappo e ɗiɗo ley yimɓe ɓeen, lenyol fuu gorko gooto. 3 Njamiron ɓe ɓe kooƴa kaaƴe sappo e ɗiɗi gonɗe hakkunde gooruwol Urdun, nokku ɗo almaami'en ndarii ɗoon. Ɓe njaara kaaƴe ɗeen nokku ɗo mbaaloton jemma hannden ɗoon, ɓe mballina ɗe.
4 Yoosuwa noddi worɓe sappo e ɗiɗo ɓe suɓii nder yimɓe Israa'iila, ley lenyol fuu gorko gooto. 5 O wi'i ɗum'en:
— Naatee nder Urdun yeeso Keesuwal Amaana Laamɗo Joomiraaɗo mon. Mono fuu ƴepta hayre wootere, wakkoo nde, lenyol Israa'iila fuu e hayre muuɗum. 6 Kaaƴe ɗeen laatanto on maande. Nde ɓiɓɓe mon ƴami on maanaa kaaƴe ɗeen fu, 7 njaaboɗon ɓe, mbi'on: «Ndiyam Urdun ɗaam darakeno yeeso Keesuwal Amaana Joomiraaɗo wakkati min njaari ngal de min peƴƴiti gooruwol ngool.» Kaaƴe ɗeen laatanto yimɓe Israa'iila maande (miccinoore) faa abada.
8 Worɓe Israa'iila'en ɓeen ngaɗi ko Yoosuwa yamiri ɗum'en. Ɓe mburtini kaaƴe sappo e ɗiɗi hakkunde Urdun, hono no Joomiraaɗo wiirunoo Yoosuwa, fodde limgal lenyi Israa'iila'en. Ɓe njaari kaaƴe ɗeen nokku ɗo ɓe mbaalata, ɓe ndesi ɗe. 9 Yoosuwa darni kaaƴe sappo e ɗiɗi goɗɗe hakkunde Urdun, nokku ɗo almaami'en wakkiiɓe keesuwal ngaal ndarinoo ɗoon. Toon ɗe ngoni faa warde hannden. 10 Almaami'en keddii hakkunde Urdun faa yimɓe ɓeen tilii e huunde fuu ko Joomiraaɗo yamirnoo Yoosuwa waɗa. Kanjum woni ko Muusaa yamirnoo Yoosuwa waɗa.
Yimɓe ɓeen karii peƴƴiti gooruwol ngool. 11 Nde ɓe fuu ɓe peƴƴitinnoo ndeen, almaami'en wakkiiɓe keesuwal Joomiraaɗo ɓeen du peƴƴiti, ardii jamaa oon fuu. 12 Ɓiɓɓe lenyol Ruben e Gad e feccere lenyol Manasa paltorii ori ori e kaɓitirɗe muɓɓen, ardii Israa'iila'en heddiiɓe hono no Muusaa yamirnoo ɓe noon. 13 Konunkooɓe ɓeen wo 40 000. Ɓe peƴƴiti gooruwol Urdun yeeso Joomiraaɗo, ɓe njottii ladde yoornde wonnde ɗakkol Yeriko. 14 Nyalaande majjum Joomiraaɗo teddinii Yoosuwa yeeso Israa'iila'en. Ɓe kuli mo hono no ɓe kulirnoo Muusaa ley nguurndam muuɗum ni.
15 Caggal ɗuum, Joomiraaɗo yamiri Yoosuwa, wi'i:
16 — Wi'u almaami'en wakkiiɓe Keesuwal Amaana ɓeen mburtoo gooruwol Urdun ngool.
17 Ndeen Yoosuwa yamiri almaami'en ɓeen wi'i ɗum'en:
— Njaltee e gooruwol Urdun ngool.
18 Nde ɓe mburtinoo Urdun faa koyɗe maɓɓe meemi leydi njoorndi ndeen, ndiyam gooruwol ngool fuɗɗiti doggude hono no arande ni.
19 Nyalaande sappoɓerde ley lewru go'aɓurdu, yimɓe Israa'iila peƴƴiti gooruwol Urdun. Ɓe koɗi ley Gilgal, lettugal Yeriko. 20 Yoosuwa darni kaaƴe sappo e ɗiɗi ɗe ɓe kooƴunoo hakkunde Urdun ɗeen ley Gilgal. 21 O wi'i yimɓe Israa'iila:
— Nyannde fuu ɓiɓɓe mooɗon ƴami on maanaa kaaƴe ɗe, 22 njaaboɗon ɗum'en, mbi'on: «Yimɓe Israa'iila peƴƴitiino gooruwol Urdun dow leydi njoorndi.» 23 Sabo Laamɗo Joomiraaɗo mooɗon yoornii diyeele gooruwol ngool faa peƴƴiton. O waɗanii on ɗum hono no o waɗirannoo min to maayo Maaliya, wakkati o yoornunoo ngo yeeso amin. 24 O waɗii ɗum fuu faa yimɓe adunaaru fuu annda junngo Joomiraaɗo wo semmbiɗingo, faa onon du kulon Laamɗo Joomiraaɗo mon faa abada.