No Israa'iilankooɓe peƴƴitiri gooruwol Urdun
3
1 Jaango majjum gilla beetee Yoosuwa e yimɓe Israa'iila fuu ndawi. Ɓe ndilliri Sittim, ɓe ngari to gooruwol Urdun. Ɓe koɗi ɗoon faa nyannde nde ɓe peƴƴitannoo ngol. 2 Caggal balɗe tati, ardiiɓe yimɓe ɓeen ndarii hakkunde jamaa oon, mbi'i:3 — Nde njiiɗon almaami'en, Lewinkooɓe ɓeen ina mbakkii Keesuwal Amaana Laamɗo Joomiraaɗo mon ngaal fu, onon du ummoɗon, njokkon ɓe. 4 Ammaa toowton ngal, accon hono piyanɗe ujunere ni hakkunde mooɗon e maggal. Taa ɓattitee ngal. Ndeen on annditan laawol ngool sabo on njokkaayno ngol tafon.
5 Caggal ɗuum Yoosuwa wi'i yimɓe ɓeen:
— Laaɓinee ko'e mon, sabo jaango Joomiraaɗo waɗan golleeji kaayniiɗi hakkunde mooɗon.
6 O wi'i almaami'en ɓeen du:
— Ƴeptee Keesuwal Amaana ngaal, ardoɗon yimɓe ɓeen.
Ɓe ƴepti Keesuwal ngaal, ɓe ardii jamaa oon.
7 Joomiraaɗo wi'i Yoosuwa:
— Wo hannden puɗɗammi mawninde ma yeeso yimɓe Israa'iila fuu. Ɓe paaman miɗo wondi e maaɗa hono no ngondirnoomi e Muusaa ni. 8 Yamir almaami'en wakkiiɓe Keesuwal Amaana ɓeen, mbi'aa ɗum'en: «Si on njottake gooruwol Urdun fu, naaton nder ndiyam ɗaam, ndaroɗon hakkunde majjam.»
9 Ndeen Yoosuwa wi'i Israa'iila'en:
— Ngaree, kettindee ko Laamɗo Joomiraaɗo mon wi'ata on. 10 Inan no paamirton Laamɗo buurɗo oon ina wondi e mooɗon. Kanko e hoore makko riiwata Kanaaninkooɓe e Hitiyankooɓe e Hiwinkooɓe e Perisinkooɓe e Girgasinkooɓe e Amorinkooɓe e Yebusinkooɓe yeeso mooɗon. 11 Inan Keesuwal Amaana Joomiraaɗo kaananke dow adunaaru fuu ina naata gooruwol Urdun yeeso mooɗon. 12 Wooɗi joonin, cuɓee worɓe sappo e ɗiɗo ley lenyi Israa'iila ɗiin, lenyol fuu gorko gooto. 13 Si koyɗe almaami'en wakkiiɓe Keesuwal Amaana Joomiraaɗo kaananke adunaaru fuu naati nder ndiyam Urdum ɗaam fu, ɗam feccoto, ɗam daroo hono kokuwol ni.
14 Jamaa oon dilli ɗo hoɗunoo ɗoon faa feƴƴita Urdun. Almaami'en wakkiiɓe Keesuwal Amaana ɓeen ina ngoni yeeso maɓɓe. 15 Wo ɗum wakkati tayri. Wakkati majjum gooruwol Urdun na heewa faa faltoo. Nde koyɗe maɓɓe naatunoo nder ndiyam ɗaam fu, 16 ɗam seli doggude, ɗam darii nokku gooto hono kokuwol ni, faa ɗam yottii huɓeere wi'eteende Aadama, wonnde ɗakkol Saretan. Ndiyam ndoggiroojam faro maayo Lamɗam fuu darii cep. Jamaa oon heɓi feƴƴitiri e nokkuure huccitinde e Yeriko. 17 Wakkati Israa'iila'en peƴƴitanno dow leydi njoorndi ndeen, almaami'en wakkiiɓe Keesuwal Amaana Joomiraaɗo ɓeen keddii ina ndarii dow leydi njoorndi hakkunde Urdun, faa jamaa oon fuu feƴƴitidi.