Konu hakkunde Benyaminkooɓe e lenyi Israa'iila keddiiɗi
20
1 Ndeen Israa'iilankooɓe fuu mburtii kawriti, laatii hono neɗɗo gooto. Wo ɓe jamaa keewɗo sanne ƴuuruɗo gilla ngalluure Dan faa wuro Beersaba e leydi Galaad. Ɓe kawriti ley Mispa yeeso Joomiraaɗo. 2 Wakkati oon ardiiɓe yimɓe Israa'iila e dow lenyi Israa'iila fuu ngari, ndarii hakkunde kawrital yimɓe Joomiraaɗo. Nyannde ndeen iɓe tawraa konunkooɓe 400 000 yahooɓe e koyɗe, tiigiiɓe kaafaaje. 3 Benyaminkooɓe kumpitaa Israa'iilankooɓe ngarii kawritii ley Mispa.Ndeen Israa'iilankooɓe ƴami ɓe, mbi'i:
— Joonin ka, kaalanee min noy war-hoore bonde ndeen waɗiri hakkunde mooɗon?
4 Lewinkeejo gorko mo deekum waraa oon wi'i:
Miin e deekam, min pantu ngalluure Gibeya nder leydi Benyamin faa min mbaala. 5 Yimɓe ngalluure ndeen ummanii kam ley jemma oon, ngari piilii suudu ndu njippiimi nduun. Wakkati oon wo miin ɓe njiɗunoo warude, de ɓe nanngi deekam, ɓe njani ɗum faa maayi. 6 Caggal ɗuum, kooƴumi ɓanndu makko, taƴumi ndu, ngaɗumi pecce, neldumi ɗe nokku fuu to lenyol Israa'iila woni, sabo ɓe ngaɗii huunde bonde harmunde ley leydi Israa'iila. 7 Joonin, onon yimɓe Israa'iilankooɓe, sanaa kawriton, on fuu, de kollon noy ɗum jeyi waɗireede.
8 Ndeen yimɓe ɓeen fuu ummii hono neɗɗo gooto, de mbi'i:
— Walaa fuu kootoowo hakkunde meeɗen. A'aa, fay gooto yeccataako suudu muuɗum.
9 Inan ko ngaɗeten joonin. En ngaɗan cumnal, cuɓoɗen woɓɓe hakkunde meeɗen, njaha kona ngalluure Gibeya. 10 Caggal ɗuum, ley lenyi Israa'iila fuu en ittan worɓe sappo ley yimɓe 100, de itten 100 ley yimɓe 1 000, wooɗi itten du 1 000 ley yimɓe 10 000, laatoo waddanooɓe konunkooɓe ɓeen nyaamdu. Wooɗi heddiiɓe ɓeen du, njaha Gibeya ley leydi Benyamin faa njomnitoo ngalluure ndeen saabe puuyndam ɗam nde waɗi ley Israa'iila ɗaam.
11 Noon Israa'iilankooɓe fuu ummorii hono neɗɗo gooto faa kaɓda e ngalluure ndeen.
12 Lenyi Israa'iila ngaɗi nelaaɓe njaha to cuuɗi Benyaminkooɓe fuu, mbi'a ɗum'en:
Ɗume woni iri bonanda gaɗuɗo hakkunde mooɗon o? 13 Joonin sanaa mburtinon Gibeyankooɓe bonɓe ɓeen, ɓe mbaree faa itten bone ley Israa'iila.
Ammaa Benyaminkooɓe njaɓaay ko sakiraaɓe muɓɓen Israa'iilankooɓe ɓeen mbi'i ɗum'en. 14 Benyaminkooɓe ƴuuri ley gure muɓɓen, ngari kawriti ley Gibeya faa kaɓda e Israa'iilankooɓe heddiiɓe ɓeen. 15 Nyannde ndeen, Benyaminkooɓe limaaɓe ley Gibeya ngaɗi konunkooɓe 700, waawɓe konu sanne. Wooɗi du limoore konunkooɓe Benyaminkooɓe (tiigiiɓe kaafaaje) ƴuuruɓe galluuje keddiiɗe ngaɗi 26 000. 16 Ley jamaa konunkooɓe ɓeen ina woodunoo du nannanooɓe 700 waawɓe konu sanne, jogiiɓe piwli. Iɓe mbaawi fiwlaade ɓe kemna fay gaasol hoore gootol, tawee ɓe mboofaay ɗum.
17 Limgal konunkooɓe Israa'iilankooɓe wo worɓe 400 000. Wo (tiigiiɓe kaafaaje) waawɓe konu. Benyaminkooɓe ngalaa e maɓɓe.
18 Israa'iilankooɓe njehi wuro Baytila, ƴami Laamɗo, mbi'i:
— Moy'en hakkunde amin artata, njaha konowa Benyaminkooɓe?
Ndeen Joomiraaɗo wi'i:
— Yahuudiyankooɓe artoo njaha.
19 Beetee majjum, Israa'iilankooɓe ummii, njehi koɗowi ɗakkol Gibeya. 20 Ndeen ɓe mburtii faa ɓe kona Benyaminkooɓe. Ɓe ndarni sordaasiiɓe maɓɓe yeeso Gibeya.
21 Benyaminkooɓe mburtii ley Gibeya mbari Israa'iilankooɓe 22 000 ley nyalaande ndeen.
22 Ammaa Israa'iilankooɓe cemmbinɗini ko'e muɓɓen. Ɓe cegilii, ɓe ndarni sordaasiiɓe maɓɓe nokku ɗo ɓe kaɓunoo nyannde arandeere ɗoon. 23 Ɓe njehi, ɓe mboyi yeeso Joomiraaɗo faa kiiral naange, ɓe ƴami ɗum, ɓe mbi'i:
— Yalla min njaha katin min kaɓda e sakiraaɓe amin Benyaminkooɓe naa?
Joomiraaɗo wi'i:
— Ayyo, njehee.
24 Ndeen ley nyalaande ɗiɗaɓerde ɓe njehi faa ɓe kaɓda e Benyaminkooɓe. 25 Benyaminkooɓe du mburtii ley Gibeya kawri e maɓɓe, mbari Israa'iilankooɓe 18 000 katin. Ɓeen fuu wo konunkooɓe waawɓe kaafaahi.
26 Ndeen Israa'iilankooɓe fuu njehi Baytila. Ɓe njooɗii, ɓe mboyi yeeso Joomiraaɗo, ɓe nyalli iɓe cuumii faa kiiral naange, ɓe cakki sadakaaji buleteeɗi e sadakaaji jeɗeteeɗi yeeso Joomiraaɗo.
27-28 Ley balɗe ɗeen Keesuwal Amaana Laamɗo ina woni ley wuro Baytila. Tawi Pinehas ɓii Eliyasar, taan Haruuna, woni almaami suudu Laamɗo.
Ndeen Israa'iilankooɓe ƴami Joomiraaɗo:
— Yalla min njahan katin min kaɓda e Benyaminkooɓe, sakiraaɓe amin ɓeen naa min cela?
Joomiraaɗo wi'i:
— Njehee, sabo jaango mi wattan ɓe e juuɗe mooɗon.
29 Ndeen Israa'iilankooɓe ngaɗi yimɓe ɗappinii, piilii huɓeere Gibeya ndeen. 30 Caggal ɗuum, ley nyalaande tataɓerde, ɓe coƴƴii faa ɓe kaɓda e Benyaminkooɓe. Ɓe njehi ɓe ndarii yeeso Gibeya hono no arande noon.
31 Nde Benyaminkooɓe mburtinoo faa kawra e maɓɓe fu, Israa'iilankooɓe ndoggi faa mboɗɗina Benyaminkooɓe e ngalluure ndeen. Benyaminkooɓe puɗɗi warude Israa'iilankooɓe katin hono no arande noon. Ɓe mbari hono konunkooɓe 30 ley yimɓe Israa'iila, dow laawol Baytila e laawol Gibeya. 32 Ndeen ɓe mbi'itii:
— En njaalake ɓe hono no arande noon.
Ammaa, dabare Israa'iilankooɓe ley doggudu nduun wonnoo mboɗɗina Benyaminkooɓe e ngalluure muɓɓen, njaara ɗum'en dow laabi. 33 Nde tayre konunkooɓe Israa'iilankooɓe yottinoo Ba'al Tamar fu, ndarii faa kona. Ɗappininooɓe ɓeen mburtii ley gese to cuuɗinoo ɗakkol ngalluure toon, naati e wolde ndeen. 34 Wo ɓe worɓe 10 000 waawɓe konu sanne, suɓaaɓe hakkunde Israa'iilankooɓe. Ɓe naatiri gorgal ngalluure Gibeya.
Joonin, hamre ndeen nyanngi sanne, ammaa Benyaminkooɓe paamaay tafon yalla halkere waranii ɗum'en. 35 Joomiraaɗo waɗi Benyaminkooɓe ɗiggi e juuɗe Israa'iilankooɓe. Nyalaande majjum, Israa'iilankooɓe mbari Benyaminkooɓe 25 100, worɓe waawɓe kaafaahi. 36 Ndeen Benyaminkooɓe paami si goonga, njaalaama.
Israa'iilankooɓe ina ndoggannoo yeeso Benyaminkooɓe sabo ina koolii worɓe muɓɓen suuɗiiɓe ɗakkol Gibeya ɓeen. 37 Ɗappiniiɓe ɓeen ummii law, naati ngalluure ndeen, de mbardi wonɓe nder mayre fuu kaafaaje.
38 Wooɗi, paamiral ina woodunoo hakkunde yimɓe ɗappininooɓe ɓeen e Israa'iilankooɓe heddiiɓe. Si ɓe naati e ngalluure ndeen fu, ɓe mbula nde, faa curki ummoo e mayre. 39 Ndeen si Israa'iilankooɓe heddiiɓe ɓeen nji'ii cuurki kiin fu, coƴƴoto, kona Benyaminkooɓe ɓeen.
Nde Benyaminkooɓe puɗɗunoo warde Israa'iilankooɓe hono yimɓe 30 fu, miilii e ko'e muɓɓen, mbi'itii:
— Hey! En njaalake ɓe wakkati gooto hono no arande noon. 40 Ammaa nde cuurki fuɗɗunoo ummaade e ngalluure maɓɓe ina foondii dow fu, Benyaminkooɓe njeeƴii, nji'i. Haya! Inan ngalluure muɓɓen fuu ina wula, cuurki ina ƴeeŋa faa dow! 41 Ndeen Israa'iilankooɓe coƴƴii e maɓɓe. Nesi maɓɓe taƴi, sabo ɓe nji'ii halkere waranii ɓe. 42 Ɓe coƴƴii, ɓe ndoggi Israa'iilankooɓe, ɓe njokki laawol dewoowol ladde ɓaleere, ammaa ɓe ndaɗaay konu nguun. Yimɓe Israa'iila suuɗinooɓe ɗakkol galluuje ɗeen, mbuli ɗe, de mburtii kawri e maɓɓe, tummbi ɓe hakkunde, kalki ɓe.
43 Israa'iilankooɓe tummbi worɓe Benyamin hakkunde. Ɓe njokki iɓe ndiiwa ɓeen faa lettugal Gibeya. Ɓe mbari ɗum'en dow laawol. 44 Ɓe mbari Benyaminkooɓe 18 000, laatiiɓe worɓe konunkooɓe semmbiɗinɓe sanne. 45 Nde Benyaminkooɓe ndoggirnoo ladde faro tefaare Rimmon fu, Israa'iilankooɓe mbari 5 000 maɓɓe dow laawol. Ɓe ndiiwi heddiiɓe ɓeen faa njottii Gidom, ɓe mbari katin Benyaminkooɓe 2 000. 46 Nyannde majjum worɓe semmbiɗinɓe waawɓe kaafaahi waraaɓe ngaɗi 25 000.
47 Ammaa worɓe 600 keɓi ndoggiri ladde, njottii tefaare Rimmon, keddii toon faa waɗi lebbi nay.
48 Israa'iilankooɓe coƴƴii ley leydi Benyaminkooɓe, mbardi huunde fuu ko tawaa ley gure ɗeen kaafaaje. Ɓe mbari daabaaji e yimɓe tawaaɓe toon fuu. Caggal ɗuum, ɓe mbuli gure ɗeen fuu.