No dee Lewinkeejo wariraa ley ngalluure Gibeya
19
1 Ley jamaanu mo leydi Israa'iila walaano kaananke ndeen, ina woodunoo Lewinkeejo gomma jooɗiiɗo gure gonɗe dow baamle Efrayim. O hooƴi debbo gomma ley wuro Baytilaama nder Yahuuda, oon laatanii mo nattaaɗo.2 Ammaa debbo oon naati e jeenu, de dilli suudu makko, hooti to bammum ley Baytilaama, heddii toon faa waɗi lebbi nay. 3 Ndeen goriiko yehi haaldi e makko faa ŋaaroo mo o warta. Gorko oon adi araaji ɗiɗi, yaadi e maccuɗo muuɗum.
Nde o yottinoo fu, debbo oon jaɓɓii mo, nanni mo nder ɓaade bammum. Nde baabiiwo oon du yi'unoo mo fu, seyii, jaɓɓii mo. 4 Baaba debbo oon waɗi o heddii ɗoon faa waɗi balɗe tati. Ɓe nyaami, ɓe njari, ɓe mbaali ɗoon.
5 Nyannde nayaɓerde, gorko oon ummii law faa dawa hoota, de esum oon wi'i ɗum:
— Hey, heɗa faa nyaamon tafon, ndeen oɗon mbaawi dillude.
6 Katin kamɓe ɗiɗo ɓe njooɗodii, ɓe nyaamdi, ɓe njardi. Ndeen baaba debbo oon wi'i mo:
— Accu mbaala ɗo, mbelna ɓernde maaɗa.
7 Nde o umminoo faa o hoota ndeen, esiiko oon ŋaarii mo katin, wi'i:
— Taa hootu tafon.
Wooɗi jemma oon du, o waali ɗoon.
8 Nyannde joyaɓerde du o ummii gilla beetee law faa o hoota, de baaba debbo oon wi'i mo:
— Ndoomee seeɗa faa nyaamon, accee faa naange feewa de kooton.
Ndeen ɓe keddii, ɓe nyalli ɗoon, ɓe nyaamdi kamɓe ɗiɗo.
9 Caggal ɗuum nde gorko oon e deekum e maccuɗo muuɗum umminoo faa ndilla fu, esum oon wi'i ɗum:
— Ndaaree, naange ɓadake yanude. Mbaalee ɗo. Haya, jemma waɗii. Waalu ɗo, mbeltoɗaa. Jaango fu, ndawon nanngon laawol mon, kooton.
10 Ammaa gorko oon jaɓaay waalude ɗoon katin. Ɓe ndimndi araaji maɓɓe ɗiɗi ɗiin, ɓe nanngi laawol maɓɓe, kanko e deekiiko. Ndeen ɓe ndewi ngalluure Yebus, ɗum woni Urusaliima.
11 Nde ɓe njottinoo Yebus ndeen, tawi jemma waɗii. Maccuɗo makko oon wi'i:
— Hey, en njahataa ley ngalluure nde Israa'iilanke walaa e muuɗum. En njaha Gibeya, mbaalen toon. 13 En tinnoo faa njottoɗen Gibeya naa Rama, de mbaalen toon.
14 Ndeen ɓe paltii ɗoon, ɓe ndewi laawol maɓɓe. Nde ɓe njottinoo Gibeya ley leydi Benyaminkooɓe ndeen, tawi jenngii. 15 Ɓe njehi faa ɓe mbaala ley Gibeya. Ɓe naati ley ngalluure ndeen, ɓe njooɗii to taliyaare wonnde ley mayre, ammaa walaa fuu jaɓɓiiɗo ɓe ley suudu muuɗum faa ɓe mbaala.
16 De inan, gorko nayeejo gomma ƴuwi ngesa muuɗum ley jemma oon ina hoota. O jeyaaɗo to baamle Efrayimankooɓe, ammaa ley Gibeya o jooɗii. Wooɗi yimɓe Gibeya wo Benyaminkooɓe. 17 Nde o hayninoo weerɓe ɓeen ley taliyaare wonnde hakkunde ngalluure ndeen fu, o wari to muɓɓen, o ƴami ɗum'en:
— Toy ƴuuruɗon? Toy ponndiɗon?
18 Lewinkeejo oon jaabii mo, wi'i:
— Wo Baytilaama nder Yahuuda min ƴuuri, miɗen ponndi joonin faa to toowti e ley baamle Efrayim. Wo toon du min njeyaa. Mi yehiino wuro Baytilaama, joonin miɗo yeccoo to suudu Joomiraaɗo. Ammaa walaa fuu jaɓɓiiɗo min nder suudu muuɗum faa min mbaala. 19 Si goonga miɗen ngoodi huɗo e nyaamdu ko araaji amin nyaama. Katin du miɗen ngoodi buuruuje e ndiyam amin cabijam. Miin e debbo o e jokolle o, walaa fuu ko nyaki min.
20 Gorko nayeejo oon wi'i:
— Jam wondu e mooɗon. Accee mi waɗana on huunde fuu ko kaajaɗon. Ammaa taa mbaalon ley taliyaare nde.
21 Ndeen o yaari ɓe ley suudu makko. O hokki araaji maɓɓe nyaamdu, de ɓe looti koyɗe maɓɓe, ɓe nyaami, ɓe njari.
22 Nde ɓe ngonnoo iɓe ceyoo ndeen, worɓe wuro ngoon, ngari piilii suudu nduun, piiri dammbugal suudu ngaal semmbe. Wo ɓe worɓe bonɓe laaliiɓe. Ɓe mbi'i gorko nayeejo jom wuro oon:
— Wurtin gorko garɗo to maaɗa oon faa min pukkodoo e muuɗum!
23 Ndeen jom ɓaade oon wurtii wari to maɓɓe, wi'i ɓe:
— Hey, sakiraaɓe am, taa ngaɗee ko boni! Wooɗi, neɗɗo oon wo beero am. Taa ngaɗee puuyndam hono ɗam. 24 Miɗo woodi surbaajo mo anndaa gorko. Wooɗi neɗɗo oon du ina woodi korɗo. Mi wurtinan ɓe, mi hokka on, ngaɗon ɓe ko kaajaɗon fuu. Ammaa taa ngaɗee ko boni hono ko anniyiɗon ɗuum.
25 Ammaa yimɓe ɓeen kettindanaaki mo. Ndeen Lewinkeejo oon hooƴi deekum wurtinani ɓe. Ɓe pukkodii e debbo oon, ɓe torri ɗum faa weeti. Nde fajiri warnoo fu, ɓe njoofi ɗum. 26 Fajiri law, debbo oon warti suudu to gorum woni toon, saami e dammbugal suudu nduun, waalii ɗoon faa weeti.
27 Beete oon nde goriiko umminoo omti dammbuɗe suudu, wurtii faa jokka laawol muuɗum ndeen, tawi imo waalii e dammbugal suudu nduun, juuɗe makko ina mbeertii e dammbugal. 28 Goriiwo oon wi'i mo:
— Umma ndillen.
Ammaa deekiiwo oon jaabaaki. Ndeen o hooƴi ɓanndu mum, o deki dow araawa, o nanngi laawol makko, o hooti.
29 Nde o yottinoo suudu makko fu, o hooƴi laɓi, o taƴi ɓanndu deekiiko oon, o waɗi ɗum pecce sappo e ɗiɗi, o neldi ɗe nokku fuu nder leydi Israa'iila.
30 Neɗɗo fuu ji'uɗo ɗum wi'i:
— Kaari! Abada iri ɗum yi'aaka, wooɗi waɗaay ley Israa'iila gilla mburtiɗen leydi Misira faa warde hannden! Joonin, mono fuu ndaara ɗum wooɗa, miiloo dow majjum de holla noy ɗum jeyi waɗireede.