Mika e yimɓe Dan
18
1 Wakkati oon, kaananke fuu walaa nder leydi Israa'iila. Wakkati oon du yimɓe Dan ngonnoo lenyol pilotoongol leydi ɗo jooɗoo, sabo ɓe keɓaayno leydi laatiindi ndongu maɓɓe hakkunde lenyi Israa'iila keddiiɗi ɗiin.2 Ɓe cuɓii hakkunde maɓɓe konunkooɓe njoyo, jeyaaɓe wuro Sora e wuro Estayol, faa njaha kora leydi ndiin. Ɓe mbi'i ɗum'en:
— Njehee koron leydi ndiin.
Horooɓe njoyo ɓeen njehi faa to baamle Efrayim, de naati ley ɓaade Mika, mbaali toon.
3 Wakkati ɓe ngonnoo ley suudu Mika ndeen, ɓe nani daande Lewinkeejo, ɓe annditiri mo e haala makko. Wakkati oon, ɓe ɓattiti, ɓe ƴami mo:
— Moy waddi ma ɗo? Ɗume ngaɗataa ley nokku oo? Ɗume joƴƴini ma ɗo?
4 Lewinkeejo oon jaabii ɓe, wi'i:
— Inan ko Mika waɗani kam. Imo yoɓa kam, de miɗo laatanii suudu makko almaami.
5 Ndeen horooɓe ɓeen mbi'i mo:
— Ndelle, ƴaman min Laamɗo yalla min keɓan saa'a nder jahaangal amin ngaal.
6 Almaami oon wi'i ɓe:
Njehee e jam! Joomiraaɗo ina woni yeeso mooɗon ley jahaangal mon.
7 Worɓe njoyo ɓeen ndilli, njottii ngalluure Layis. Ɓe tawi yimɓe ngalluure ndeen ina njooɗii e jam e reenaare hono no Sidoninkooɓe njooɗorii noon. Ɓe ngalaa ko nyaki ɓe, sabo leydi ndiin ina wooɗi. Iɓe mboɗɗi e Sidoninkooɓe, ɓe ngalaa du kawtal e wondiiɓe maɓɓe.
8 Nde nelaaɓe ɓeen kootunoo to sakiraaɓe muɓɓen ley Sora e Estayol fu, ɓeen ƴami ɗum'en:
— Noy tawruɗon toon?
9 Ɓe mbi'i:
— Ummee njehen, konen ɓe! Min nji'ii leydi ndiin fuu. Goonga, leydi ndiin ina wooɗi sanne. Ko saabii eɗen njooɗii ɗo faa joonin? Taa en mbonnu wakkati men. En njaha njeyten leydi ndiin. 10 Haya, si on njehii fu, on nji'an no yimɓe ɓeen njooɗorii e jam. Leydi ndiin na yaaji. Laamɗo e hoorem kam watti ndi e juuɗe meeɗen. Wo leydi ndi fay huunde nyakaay.
11 Ndeen worɓe lenyol Dan keme njeegom, jogiiɓe kaɓitirɗe, ndilli Sora e Estayol. 12 Ɓe njehi, ɓe koɗi ɗakkol ngalluure Kiriyat-Ye'arim nder leydi Yahuuda. Saabe majjum nokkuure ndeen inndiraa hoɗorde Dan faa joonin. Nokku oon ina woni gorgal ngalluure Kiriyat-Ye'arim. 13 Ɓe peƴƴiti toon, de ɓe ndewi baamle Efrayim, ɓe njottii suudu Mika.
14 Caggal ɗuum, nelaaɓe njoyo yahunooɓe kori leydi Layis ɓeen, mbi'i sakiraaɓe muɓɓen:
— Yalla oɗon anndi hakkunde cuuɗi ɗii ina woodi suudu ɗo saaya almaami'en e nate tooruuji e tooru sehaandu e tooru siiwiraandu cardi ngoni naa? Ndelle eɗen anndi faa wooɗi ko kaanɗen waɗude!
15 Ndeen ɓe ndewi ɓaade Mika, ɓe naati to Lewinkeejo oon, ɓe njowti ɗum. 16 Worɓe keme njeegom jeyaaɓe e lenyol Dan ɓeen du keddii ina ndarii to dammbugal suudu nduun, ina njogii kaɓitirɗe muɓɓen. 17 Worɓe njoyo horoynooɓe leydi ɓeen naati nder mayru, kooƴi tooru sehaandu nduun e saaya kaan e nate tooruuji ɗeen e tooru siiwiraandu cardi nduun. Almaami oon du ina tawaa to dammbugal suudu nduun, kam e sordaasiiɓe keme njeegom jogiiɓe kaɓitirɗe ɓeen.
18 Nde worɓe njoyo ɓeen naatunoo kooƴi allaaji ɗiin e saaya kaan ndeen, almaami oon ƴami ɓe:
— Ɗume woni ko ngaɗoton ɗuum?
19 Ɓe mbi'i mo:
— Deƴƴinaa! Taa haalu. War njaaden, laatanoɗaa min baabiiwo e almaami fuu. Ɗume ɓurani ma? Yalla laataade almaami dow suudu wooturu naa laataade almaami dow lenyol Israa'iila?
20 Haala kaan welii ɓernde almaami oon. O hooƴi saaya kaan e nate ɗeen e tooru sehaandu nduun, o yaadi e maɓɓe. 21 Caggal ɗuum ɓe njokki laawol maɓɓe, ɓe ardini cukaloy e daabaaji e jawdi keddiindi fuu yeeso, ɓe ndilli.
22 Nde ɓe mboɗɗinoo e suudu Mika fu, Mika e wondiiɓe muuɗum kawriti tayni ɓe, kewtii ɓe. 23 Mika'en ƴeewnii yimɓe Dan, de ɓeen njeeƴii, ƴami Mika:
— Ɗume hewtii ma de kawrinɗaa yimɓe ɓee fuu faa kaɓaa e amin?
24 O jaabii ɓe, o wi'i:
— Hey! On kooƴii tooruuje am e almaami am, on ndillidi. Ɗume heddanii kam katin? Ndelle noy ƴamirton ko hewtii kam?
25 Yimɓe Dan ɓeen njaabii mo, mbi'i:
— Si min nantii a haalii katin fu, worɓe nyaaɗuɓe njippoto, kalke, aan e yimɓe maaɗa fuu.
26 Ndeen ɓe coƴƴii, ɓe njokki laawol maɓɓe. Nde Mika yi'unoo iɓe ɓuri ɗum semmbe fu, soƴƴii hooti wuro muuɗum.
27 Yimɓe Dan ɓeen ndillidi e tooruuji Mika e almaami muuɗum. Ɓe njehi ngalluure Layis to yimɓe jooɗiiɓe e jam e reenaare ngoni. Yimɓe Dan mbardi ɓe fuu kaafaaje, mbuli ngalluure maɓɓe ndeen. 28 Ɓe keɓaay fuu dannoowo ɓe, sabo ngalluure Sidon ina woɗɗi ɓe. Katin du ɓe njigunduraay e fay gooto. Ngalluure ndeen na wonnoo ley naɗɗol Bayti-Rehoob.
Caggal ɗuum, yimɓe Dan mahitii ngalluure ndeen, njooɗii nder mayre. 29 Ɓe inndiri nde Dan, innde maamiiɓe ɓii Yaakuuba. Innde mayre arande woni Layis. 30 Ɓe ndarnani ko'e maɓɓe alla cehaaɗo oon, ɓe ngaɗi Lewinkeejo oon almaami maɓɓe. Innde makko wo Yonatan ɓii Gersom, taan Muusaa. Kanko e ɓiɓɓe makko laatanii lenyol Dan almaami'en faa nyalaande nde Israa'iilankooɓe nanngaa, njaaraa ley maccungaaku. 31 Ɓe keddii iɓe ndewa tooru ndu Mika sehunoo nduun haddi duuɓi ɗi suudu dewal Laamɗo wonnoo nder wuro Silo fuu.