Allaaji ɗi Mika waɗani hoore muuɗum
17
1 Ina woodunoo gorko gomma jeyaaɗo leydi ngonndi dow baamle Efrayim, ina wi'ee Mika. 2 O wi'i inniiko:— Yeeso am kuɗuɗaa kooƴuɗo ceede cardi 1 100 majjanɗe ma ɗeen. Ceede ɗeen, inani ɗe e junngo am. Wo miin hooƴi ɗe.
Ndeen inniiko wi'i mo:
— Ɓiyam, Joomiraaɗo barkinɗine!
3 Mika hokkiti innum buuɗi cardi 1 100 ɗiin. De inniiko oon wi'i:
— Haya, mi hokkan ɗi Joomiraaɗo saabe ɓiyam. Mi waɗa ɗi ngaɗee natal allaaji e tooru siiwiraandu cardi. Wooɗi, joonin kaa mi yeccinan ɗi to ma.
4 Nde Mika hokkitinnoo innum cardi ndiin fu, oon itti buuɗi cardi 200 ley majji, yaari to bahillo faa waɗa nate allaaji e tooru siiwaandu. Caggal ɗuum ɓe ngaddi ɗi, ɓe ndesi ɗi nder suudu Mika.
5 Tawi Mika ina woodi suudu dewal muuɗum. O sanyi saaya ka mawɓe diina ɓornotoo, o waɗi tooruuji cehaaɗi, ndeen o suɓii gooto hakkunde ɓiɓɓe makko laatoo almaami ley suudu makko.
6 Ley balɗe ɗeen, Israa'iila'en ngalaano kaananke. Mono fuu ina waɗa ko weli ɗum tan.
7 Ina woodunoo jokolle Lewinkeejo gomma jeyaaɗo wuro Baytilaama nder leydi Yahuuda. Imo jooɗii hakkunde Yahuudiyankooɓe toon. 8 De o eggi Baytilaama ley leydi Yahuuda, o yehi imo filoo nokkuure ɗo hoɗa. Nder jahaangal makko ngaal, o faltorii dow baamle Efrayim faa o yottii suudu Mika.
9 Mika ƴami mo, wi'i:
— Toy ƴuuruɗaa?
O wi'i:
— Miin, mi Lewinkeejo ƴuuruɗo wuro Baytilaama nder Yahuuda. Ley jahaangal ngonumi joonin. Miɗo filoo nokku ɗo koɗanmi.
10 Ndeen Mika wi'i mo:
— Ndelle jooɗa ley ɓaade am, laatanoɗaa kam baabiiwo e almaami dow suudu am. Miin du, mi hokkete buuɗi cardi sappo ley hitaande fuu. Katin du mi hokkete nyaamdu e kolte.
11 Lewinkeejo oon jaɓi jooɗaade ley ɓaade Mika. Mika adi mo hono ɓiyum ni. 12 Mika waɗi mo almaami, imo gollana ɗum. O heddii ley ɓaade muuɗum.
13 Caggal ɗuum, Mika wi'itii:
— Joonin miɗo anndi Joomiraaɗo hollan kam moƴƴere muuɗum, sabo miɗo woodi Lewinkeejo laataniiɗo kam almaami!