No Samson ɗoofiri gampuuje dammbuɗe ngalluure Gaaja
16
1 Nyannde gomma, Samson yehi ngalluure Gaaja. O yi'i toon debbo woykuruujo gomma. O yehi, o fukkodii e muuɗum.2 Yimɓe ngalluure ndeen kumpitaa, mbi'aa:
— Ndaaree! Samson warii ɗo.
Ndeen ɓe njehi, ɓe piilii nokkuure ndeen. Ɓe mbaali iɓe ɗappinanii mo to dammbugal ngalluure ndeen. Jemma oon fuu ɓe ngaɗaay olko. Ɓe mbi'onduri:
— Si weetii fu, en mbaran mo.
3 Samson fukkii faa hakkunde jemma. Wakkati oon, o ummii, o yehi, o nanngi gampuuje dammbugal ngalluure ɗeen, e palirɗe maggal ɗiɗi ɗeen, o ɗoofi ɗe. O hooƴi ɗe kanje e leɗɗe paliraaɗe ɗeen fuu, o wakkii, o yaari ɗe faa dow waamnde huccitinde e ngalluure Heberon.
Samson e Deliila
4 Caggal majjum, ina woodunoo debbo gomma jooɗiiɗo to naɗɗol Sorek. Innde makko wo Deliila. Samson yiɗi debbo oon.
5 Mawɓe Filistiyankooɓe ngari to Deliila, mbi'i ɗum:
— Eytu Samson faa holle to semmbe muuɗum mawɗo oon ƴuurata, e no min mbaawi jaaloraade ɗum, faa min kaɓɓa ɗum, min ndawrana ɗum. Ndeen mono e amin fuu hokkete buuɗi cardi 1 100.
6 Deliila wi'i Samson:
— Cawroɗaa, kollaa kam to semmbe maaɗa mawɗo oon ƴuurata, noy kaɓɓirteɗaa de njaaleɗaa.
7 Samson wi'i mo:
— Si mi haɓɓiraama e baaji kesi jeɗɗi ɗi njooraay tafon fu, semmbe am dillan, mi laatotoo hono yimɓe heddiiɓe.
8 Ndeen mawɓe Filistiyankooɓe ngaddani Deliila ɓoggi baggi, ɗi njooraay tafon. O adi ɗi, o haɓɓi Samson. 9 Tawi du ina woodi woɓɓe ɗappinanii mo ley suudu nduun.
Ndeen debbo oon feekii, wi'i:
— Samson! Filistiyankooɓe ngarii faa nannge!
Samson gurbutii, taƴi ɓoggi ɗiin hono no gaarawol taƴirta si ɓattinaama yiite ni. Ndelle ɓe kebaay faamude toy semmbe makko oon ƴuurata.
10 Ndeen Deliila wi'i Samson:
— Inan, a jalnorike kam! A fewanii kam! Sawra, hollam no kaɓɓirteɗaa.
11 Samson wi'i debbo oon:
— Si mi haɓɓiraama ɓoggi kesi ɗi nawtoraaka fay nde wootore fu, semmbe am dillan, mi wartan hono tagaaɓe heddiiɓe.
12 Wakkati oon Deliila hooƴi ɓoggi kesi, haɓɓi mo, de wi'i mo:
— Samson! Filistiyankooɓe ngarii faa nanngee!
Tawi ina woodi ley suudu nduun yimɓe ɗappinanii ɓe mo. Ammaa Samson taƴi ɓoggi ɗiin hono gaaraaji ni, ɗi ƴuwi e juuɗe muuɗum.
13 Deliila wi'i mo katin:
— Hey! Faa joonin a jalnorto kam tan, aɗa fenana kam! Sawra, hollam joonin no kaɓɓirteɗaa.
Samson wi'i mo:
— Si a sanyidii moori am jeɗɗi ɗiin e leggal canyirgal faa teeŋii fu, semmbe am dillan, mi wartan hono heddiiɓe ni.
14 Deliila ɗannini Samson, de sanyi moori muuɗum jeɗɗi ɗiin e leggal canyirgal. O haɓɓi ɗi, de o findini ɗum, o wi'i:
— Samson! Filistiyankooɓe ngarii faa nannge!
Wakkati oon, o fini, o ɗoofi canyirgal ngaal.
15 Deliila wi'i mo katin:
— Noy waɗi mbi'uɗaa aɗa yiɗi kam de a hoolaaki kam? Joonin woni kile tati aɗa jalnoroo kam, a hollaay kam to semmbe maaɗa ƴuurata.
16 Noon o jokkiri Samson nyannde fuu e haalaaji ɗiin faa ronki, tampii hono maayan ni.
17 Ndeen o omtani debbo oon ɓernde makko fuu, o holli ɗum huunde fuu. O wi'i:
— Ngaasa hoore am femmbaaka fay nde wootere sabo wo mi cenndanaaɗo Laamɗo gilla ley reedu inna am. Si gaasa hoore am femmaa fu, semmbe am dillan, mi laatoo hono tagaaɓe heddiiɓe ni.
18 Nde Deliila faamunoo o haalani ɗum ko woni ley ɓernde makko fuu ndeen, yamiri mawɓe Filistiyankooɓe ɓeen noddowee. O wi'i ɗum'en:
Ngaree, sabo joonin kaa o omtanii kam ɓernde makko fuu. Ɓe ngari, ɓe ngaddi ceede ɗe ɓe aadinoo hokkude mo ɗeen.
19 Deliila ɗannini Samson dow koyɗe mum, de noddi pemmboowo wari femmbi moori Samson ɗiin. Ndeen semmbe Samson dilli. O warti neɗɗo ɓolo. 20 Ndeen Deliila wi'i mo:
— Samson! Filistiyankooɓe ngarii faa nannge!
Samson fini ina miili katin daɗiran hono no arande ni. O miili o dimmboto tan, de o danna hoore makko.
Ammaa o faamaay Joomiraaɗo dillii to makko.
21 Wakkati oon Filistiyankooɓe nanngi mo, itti gite makko, njaari mo ley ngalluure Gaaja. Ɓe njaari mo toon ley suudu kasu, ɓe kaɓɓiri mo callali njamndi mboɗeeri. Nder kasu toon, ɓe ngaɗi mo niisoowo alkamaari.
22 Ammaa caggal ko o femmbaa ɗuum, gaasa makko fuɗɗi wilitinde.
Maayde Samson
23 Nyannde gomma, mawɓe Filistiyankooɓe kawriti ley suudu mawndu ɗo Daagon tooru muɓɓen woni. Ɓe kawriti ɗoon faa ɓe ngaɗana ɗum sadaka mawɗo. Ɓe mbeltii, ɓe mbi'i:
Alla meeɗen watti ganyo men Samson e juuɗe meeɗen!
24 Nde Filistiyankooɓe nji'unoo mo ndeen, manti alla muɓɓen, mbi'i:
Alla meeɗen wattii ganyo men e juuɗe meeɗen, gaɗunooɗo leydi meeɗen winnde, barɗo yimɓe heewɓe hakkunde men!
25 Nde ɓe njarnoo njaram maɓɓe faa ɓe culii, ɓe mbeltii fu, ɓe mbi'i:
Mburtinee Samson faa wamana en!
Wakkati oon ɓe noddi mo, ɓe mburtini mo ley kasu, de o wamani ɓe. Ɓe ndarni mo hakkunde bimmbeeje ɗiɗi tiigiiɗe suudu nduun.
26 Wakkiti oon, o wi'i golloowo tiigiiɗo junngo makko oon:
— Wallam mi hewta bimmbeeje tiigiiɗe suudu ɗeen faa mi tugga ɗe.
27 Tawi wakkati majjum suudu nduun ina heewi worɓe e rewɓe sanne. Kaanankooɓe Filistiyankooɓe fuu ɗoon tawaa. Suudu dowuuru nduun du ina heewi worɓe e rewɓe waɗooɓe hono ujunaaji tato warɓe faa ndaara fijo Samson.
28 Ndeen Samson ŋaarii Joomiraaɗo wi'i:
— Joomiraaɗo Toowɗo, miɗo ŋaare miccoɗaa kam katin. Yaa! Laamɗo, miɗo ŋaare cemmbinɗinaa kam nde wootere tan, faa mi yomnitoo Filistiyankooɓe gite am ɗe ɓe itti ɗeen.
29 Ndeen o nanngi bimmbeeje ɗiɗi gonɗe hakkunde, tigiiɗe suudu ɗeen. O tuggi ɗe, nde junngo nano, nde du junngo nyaamo. 30 Caggal ɗuum, o wi'i:
Haya, accu mi maayda e Filistiyankooɓe!
Ndeen o dunƴi ɗe e semmbe, de suudu nduun yirbi dow kaanankooɓe ɓeen e yimɓe wonnooɓe ɗoon fuu. Yimɓe ɓe o wari nyannde o maayunoo ina ɓurii yimɓe ɓe o warnoo ley nguurndam makko fuu.
31 Caggal ɗuum sakiraaɓe makko e yimɓe suudu baabiiko fuu ngari kooƴi mo. Ɓe koori mo wuro, ɓe uwoyi mo hakkunde wuro Sora e wuro Estayol, ley yanaande baabiiko Manoha. Samson ardake Israa'iilankooɓe faa waɗi duuɓi 20.