No Samson yomnitorii Filistiyankooɓe saabe deekum
15
1 Ko ɓooyaay caggal majjum, wakkati tayri alkamaari, Samson yehi to deekum. O yaadi e be'el faa o hokka ɗum ngel. Nde o yottinoo fu, o wi'i esiiko gorko:Miɗo yiɗi naatude suudu deekam.
Hey, miin miɗo laamnunoo a yiɗaa mo. Saabe ɗuum waɗi de kokkumi mo yigoo maa gondunooɗo e maaɗa nyannde ɓanngal oon. Ammaa joonin kaa, inan minyiiko debbo ɓurɗo mo ŋarɗude. Hooƴu ɗum loomta mo.
3 Samson wi'i ɓe:
— Joonin bone mo ngaɗanmi on fuu wo onon pilii. Mi walaa feloore dow majjum.
4 Ndeen o yehi, o nanngi baagaaji 300, o haɓɓondiri lacce majji, ɗiɗi ɗiɗi. Caggal ɗuum, o moori huɗo, o haɓɓi ko hakkunde lacce ɗeen. 5 O huɓɓi huɗo koon, ndeen o yoofi ɗi nder gese alkamaari Filistiyankooɓe. Noon o wuliri kaɓɓe alkamaari taƴaandi e ndi taƴaaka tafon, e gese cabiije e leɗɗe jaytun du fuu.
6 Nde Filistiyankooɓe nji'unoo ɗum fu, ƴami:
— Wo moy golli en ɗum?
Ɓe kumpitaa:
— Wo Samson, esoo gorko jooɗiiɗo ley Timna oon. Sabo oon hooƴi deekiiko de hokkitiri ɗum yigiiko gondunooɗo e makko ley ɓanngal oon.
Ndeen Filistiyankooɓe njehi mbuli debbo oon e baaba muuɗum fuu.
7 Caggal ɗuum, Samson wi'i ɓe:
Saabe on ngaɗii ni, miin du mi selataa waɗude on ko boni faa mi yomnitoo huunde fuu ko ngaɗuɗon kam.
8 O haɓi e maɓɓe wolde nyanngunde sanne, o halki keewal maɓɓe. Ndeen o dilli, o yehi, o jooɗowii loho tefaare Etam.
No Samson wardi Filistiyankooɓe e ƴi'al gaɓɓugal araawa
9 Filistiyankooɓe njehi, koɗi nder leydi Yahuuda. Ɓe cankitii ɗakkol nokkuure wi'eteende Lehi.
10 Yahuudiyankooɓe mbi'i ɓe:
— Ɗume saabii de ngarɗon faa konon min?
Ɓe mbi'i:
— Min ngarii faa min nannga Samson, min njomnitoo ko o waɗi min ɗuum.
11 Caggal ɗuum worɓe Yahuuda 3 000 njehi to loho tefaare Etam, to Samson woni toon. Ɓe mbi'i ɗum:
Ko waɗi ngaɗuɗaa en ni? Yalla a anndaa wo Filistiyankooɓe laamii en naa?
De Samson jaabii ɓe, wi'i:
Wo mi yomniti ɓe ko ɓe ngaɗi kam ɗuum tan.
12 Ɓe mbi'i mo:
Min ngarii faa min nannge, min kokke Filistiyankooɓe.
Ndeen o wi'i ɓe:
— Kunanee kam, on mbarataa kam onon e ko'e mon.
13 Ɓe mbi'i mo:
— A'aa, min mbarataa ma. Miɗen njiɗi haɓɓude ma faa min kokkee Filistiyankooɓe.
Ɓe adi ɓoggi ɗiɗi kesi, ɓe kaɓɓiri mo, ɓe ƴuwi to loho tefaare koon, ɓe njippodii e makko.
14 Nde ɓe njottodinoo e makko ley Lehi ndeen, Filistiyankooɓe ngari faa kawra e makko ina peekoo. Wakkati oon, Ruuhu Joomiraaɗo wari dow Samson e semmbe. Ɓoggi ɗi o haɓɓiraa ɗiin laatii hono gaaraaji bulaaɗi nii. Ɗi taƴi, ɗi ƴuwi e juuɗe makko. 15 Ndeen o yi'i ƴi'al gaɓɓugal araawa kesal. O hooƴi ngal, o fiyiri ɓe, o wari yimɓe waɗooɓe 1 000.
16 Caggal ɗuum, o wi'i:
— E ƴi'al gaɓɓugal araawa,
mi waɗii ɓe joore maayɓe.
E ƴi'al gaɓɓugal araawa,
mi warii yimɓe 1 000.
17 Nde o selunoo haalude fu, o faɗɗi ƴi'al ngaal. Nokkuure ndeen inndiraa Ramat-Lehi. (Ɗuum na fiirta tilde Ƴi'al Gaɓɓugal).
18 Ɗomka nanngi Samson sanne, o noddi Joomiraaɗo, o wi'i:
— Wo aan, Joomiraaɗo, hokki kam jaalagol manngol, miin maccuɗo maaɗa. Yalla joonin a yoppan ɗomka wara kam de mi saama e juuɗe yimɓe ɓe taadaaka ɓeen naa?
19 Ndeen Laamɗo fecci ngayka hayre wonnde ley Lehi, de ndiyam yalti e makka. Nde Samson yarnoo fu, semmbe muuɗum warti, ɓanndu muuɗum feertii. Saabe majjum, nokkuure ndeen inndiraa ildude Hakkore, (Ɗuum na fiirta ildude Ndiyam Ƴeewnotooɗo). Inde woni ley Lehi faa warde hannden.
20 Samson ardii Israa'iilankooɓe faa waɗi duuɓi 20 ley jamaanu laamu Filistiyankooɓe.