Samson e surbaajo Filistiyankeejo
14
1 Nyannde gomma Samson yehi ngalluure Timna. O yi'i toon surbaajo Filistiyankeejo. 2 Nde o hootunoo fu, o haalani ɗum saaraaɓe makko, o wi'i:— Mi yi'i surbaajo Filistiyankeejo ley Timna. Miɗo yiɗi ɓaŋanon kam mo.
3 Inniiko e baabiiko ƴami mo:
— Yalla surbaajo fay gooto walaa ley ɓiɓɓe jeydaaɓe maa naa ley lenyol meeɗen fuu naa? Ko saabii aɗa yiɗi adude suka debbo ley Filistiyankooɓe, yimɓe ɓe taadaaka ɓeen?
O jaabii ɓe, o wi'i:
— Ɓaŋanee kam mo, wo kanko fotani kam.
4 Saaraaɓe makko paamaay wo Joomiraaɗo waɗi ɗum faa hiitoo Filistiyankooɓe. Sabo tawi ndeen wo kamɓe laamii dow Israa'iila.
5 Samson yaadi e saaraaɓe muuɗum ley Timna. Nde ɓe njottotonoo gese cabiije ɗakkol Timna ndeen, laddeeru semmbiɗindua ummanii Samson ina feekoo. 6 Wakkati oon Ruuhu Joomiraaɗo wari dow makko e semmbe. O jogaaki fay gootum e juuɗe makko, ammaa o nanngi laddeeru nduun, o seeki ɗum ceeke ɗiɗi hono wo be'el ni. Ammaa o haalanaay ɗum saaraaɓe makko. 7 O yehi, o yeewtidowii e suka debbo oon. Surbaajo oon ina weli mo sanne.
8 Caggal balɗe seeɗa, o soƴƴii Timna faa o ɓaŋa surbaajo oon. Dow laawol makko, o seli faa o ndaara laddeeru nduun. O tawi nyaaki ina ngaɗi njuumndi nder mayru. 9 O itti njuumndi ndiin e juuɗe makko, o rewi laawol, imo nyaama. Nde o yottinoo to saaraaɓe makko fu, o hokki ɗum'en njuumndi ndiin nyaama. Ammaa o haalanaay ɗum'en wo nder rawaandu ladde nduun o itti njuumndi ndiin.
10 Wooɗi, baaba Samson oon yehi to wuro debbo oon. Samson waɗi weltaare ɓanngal hono no ɗum laatorii ley finaatawaa maɓɓe, fodde ko jokolɓe mboowi waɗude. 11 Wakkati Filistiyankooɓe nji'unoo mo ndeen, ngaddani mo jokolɓe 30 faa laatoo yaadiraaɓe makko.
12 Samson wi'i jokolɓe ɓeen:
— Accee mi waɗana on banndol. Si on mbaawii fiirtude ngol gilla balɗe weltaare jeɗɗi ɗeen timmaay fu, mi hokkan on kaddule 30 lobbe ɗaatuɗe e saayooji 30. 13 Ammaa si on mbaawaay fiirtande kam ngol fu, wo onon kokkata kam kaddule 30 ɗaatuɗe e saayooji 30 ɗiin.
Ɓe mbi'i:
— Ayyo, fillana min ngol min nana.
14 O wi'i ɓe:
— Ko nyaametee wurtake e ko nyaamata,
belɗum wurtake e ko semmbiɗi.
Ammaa ɓe ngaɗi balɗe tati ɓe mbaawaay fiirtude banndol ngool. 15 Ley nyalaande nayaɓerde,b ɓe mbi'i dee Samson oon:
— Eytu gora holle maanaa banndol ngool de ngaraa kollaa min. Si wanaa noon, min mbulete, aan e yimɓe suudu baaba maaɗa fuu. Yalla on mbaanti min faa teeton jawdi amin naa?
16 Ndeen dee Samson wari to muuɗum ina woya, wi'i ɗum:
— A yiɗaa kam fay seeɗa! A wanyu kam tan! A hokki yimɓe am banndol, ammaa a hollaay kam ko ngol fiirtata!
Samson wi'i:
— Inan, mi fiirtanaay ngol fay inna am naa baaba am de aan kaa mi fiirtane ngol naa?
17 Ammaa ley balɗe jeɗɗi ɗeen fuu debbo oon selaay woyude yeeso makko. Ley nyalaande jeɗɗaɓerde ndeen o fiirtani debbo oon maanaa banndol ngool, sabo oon tampinii mo sanne. Debbo oon du yehi fiirtanowii ngol lenyol muuɗum. 18 Ley nyalaande jeɗɗaɓerde ndeen, gilla naange yanaay, jooɗiiɓe ley ngalluure ndeen ngari mbi'i Samson:
— Ɗume ɓuri njuumndi welde? Wooɗi du, ɗume ɓuri laddeeru semmbe?
Ndeen Samson wi'i ɓe:
— Si on ndemiraayno nyale am fu, on mbaawaano fiirtude banndol am ngool!
19 Wakkati oon Ruuhu Joomiraaɗo wari dow makko e semmbe. O yehi to ngalluure Askelon, o wari yimɓe 30, o hooƴi ko ɓe ngoodi, o itti kaddule maɓɓe, o hokki ɗe fiirtuɓe banndol ɓeen. Caggal ɗuum, o soƴƴii to suudu baabiiko ɓernde makko ina wula mettorgal.
20 Deekiiko oon du, ɓe kokki ɗum yigiiko gondunooɗo e makko ley dewgal oon.