Rimeede Samson
13
1 Israa'iilankooɓe puɗɗiti katin waɗude ko boni yeeso Joomiraaɗo. Ndeen o watti ɓe e juuɗe Filistiyankooɓe, njarni ɓe bone faa waɗi duuɓi 40.2 Ina woodi gorko gomma jeyaaɗo ngalluure Sora ƴuuruɗo e lenyol Dan. Imo inndiree Manoha. Deekiiko wo dimaro, ɓe ngalaa ɓiɗɗo.
3 Nyannde gomma, maleyka Joomiraaɗo ɓangani debbo oon, wi'i ɗum:
— Aan wo a dimaro, abada a rimaay. Ammaa a heɓan reedu, a riman ɓiɗɗo gorko. 4 Joonin kaa, kakkilaa, taa yaru ndiyam lamminaaɗam naa doro katin. Wooɗi du, taa nyaamu ko harminaa. 5 Sabo a heɓan reedu, a riman ɓiɗɗo gorko mo laɓirgel meemataa gaasa muuɗum, de suka oon laatotoo cenndanaaɗo Laamɗo gilla nder reedu maa. Wo kanko fuɗɗata hisinde Israa'iila e juuɗe Filistiyankooɓe.
6 Ndeen, debbo oon yehi haalani gorum, wi'i:
— Nelaaɗo Laamɗo warii to am! Imo nanndi e maleyka Laamɗo, kulɗiniiɗo sanne. Mi ƴamaay to o ƴuuri, kanko du, o hollaay innde makko. 7 Ammaa o wi'ii kam, mi heɓan reedu, mi riman ɓiɗɗo gorko. Saabe majjum mi yarataa ndiyam lamminaaɗam naa doro katin. Mi nyaamataa du ko harminaa, sabo suka oon laatoto cenaaɗo, cuɓaaɗo Laamɗo gilla nder reedu am, faa nyannde maayde makko.
8 Caggal ɗuum, Manoha ŋaarii Joomiraaɗo, wi'i:
— Joomiraaɗo, miɗo nyaage, accu neɗɗo mo nelɗaa oon wara to amin katin faa ekintina min no min njogortoo suka dimeteeɗo oon.
9 Laamɗo nani ŋaarnde Manoha. Maleyka Joomiraaɗo wari katin to dee Manoha tawi imo woni ley ngesa. Ammaa goriiko Manoha kaa tawdaaka e makko wakkati oon. 10 Ndeen o doggi law, o noddi ɗum, o wi'i:
— Inan! Neɗɗo garunooɗo to am nyannden oon ɓanganii kam katin!
11 Manoha ummii jokki deekum. Nde o yottinoo to neɗɗo oon fu, o ƴami ɗum:
— Wo aan haaldunoo e deekam naa?
Oon wi'i:
— Ayyo, wo miin.
12 Caggal ɗuum Manoha wi'i:
— Wooɗi, si haalaaji maaɗa ɗiin tabitii fu, noy min mbambirta suka oon? Ɗume woni gollal makko?
13 Maleyka oon wi'i:
— Sey deeka hakkila dow ko mbi'umi ɗum fuu. 14 Taa o nyaama fay gootum ko ƴuuri e ɓiɓɓe cabiije. Taa o yara ndiyam lamminaaɗam naa doro. Caggal ɗuum, taa o nyaama ko harminaa. Sey o jokka ko mbi'umi o ɗum fuu.
15 Ndeen Manoha wi'i maleyka Joomiraaɗo oon:
— Miɗen ŋaare, munyaa seeɗa faa min ndefane be'el.
16 Oon wi'i:
— Fay si keɗiimi, mi nyaamataa nyaamdu maaɗa, de si aɗa yiɗi fu, cakkanaa ngel Joomiraaɗo, ngel laatoo sadaka buleteeɗo.
Ammaa Manoha annditaay yalla wo ɗum maleyka Joomiraaɗo. 17 Manoha ɓeydi ƴamude maleyka Joomiraaɗo oon:
— Noy mbi'eteɗaa, faa si haalaaji maaɗa ɗiin tabitii fu, min teddine?
18 De maleyka Joomiraaɗo oon jaabii mo, wi'i:
— Ɗume waɗi de ƴamuɗaa innde am? Innde am wo hayniinde, tiiɗunde faamude.
19 Caggal ɗuum, Manoha hooƴi be'el ngeel e conndi cakketeendi, wuli ɗum fuu dow hayre, sakkani ɗum Joomiraaɗo. Manoha e deekum keddii ina ndaara. Ndeen Joomiraaɗo waɗi huunde hayɗiniinde yeeso maɓɓe. 20 Wakkati ɗemngal yiite ƴuurunoo e hirsirde ndeen, fondii dow fu, inan, maleyka Joomiraaɗo oon naati ley yiite ngeen, rewi dow. Nde Manoha e deekum njiinoo ɗum fu, kippi geese muɓɓen e leydi. 21 Maleyka Joomiraaɗo oon ɓanganaay Manoha e deekum katin. Ndeen Manoha annditi wo ɗum maleyka Joomiraaɗo.
22 O wi'i deekiiko oon:
— Sikke walaa, en maayan sabo en nji'ii Laamɗo!
23 Ndeen deekiiko oon wi'i mo:
— Si Joomiraaɗo ina yiɗunoo warude en fu, o jaɓataano kirsamaari meeɗen e sadaka men oon. Wooɗi du, o ɓanginantaano en kujje ɗeen fuu. O haalantaano en du kabaaruuji hono ɗi.