Konu hakkunde Galaadankooɓe e yimɓe Efrayim
12
1 Caggal majjum, nyannde gomma, Efrayimankooɓe kawriti, peƴƴiti gooruwol Urdun, ngari ngalluure Jaafon, mbi'i Yefta:Ɗume waɗi konuɗaa Amoninkooɓe de a noddaay min? Ndelle, joonin min mbulan suudu maa dow maaɗa.
2 Ndeen Yefta wi'i ɓe:
— Nde miin e sakiraaɓe am min ngonnoo nder wolde Amoninkooɓe sattunde sanne ndeen, mi ŋaarake on, de on njaɓaay warude ndannon min e juuɗe maɓɓe. 3 Ndelle nde tawnoomi on ndannataa min ndeen, parritimmi yonki am, njahumi faa mi haɓa e maɓɓe. Joomiraaɗo du watti ɓe e junngo am. Wooɗi, ko saabii ngarɗon hannden faa kaɓon e am?
4 Yimɓe Efrayim mbi'i:
— Onon yimɓe Galaad, wo on doggunooɓe, ƴuwɓe hakkunde Efrayim e Manasa.
Ndeen Yefta hawronduri worɓe Galaad fuu. Ɓe njehi, ɓe kaɓi e worɓe Efrayim, de ɓe njaalii ɗum'en.
5 Katin du yimɓe Galaad njehi paddii feƴƴitirde gooruwol Urdun to ngol ilirta yaade leydi Efrayim toon. Si neɗɗo Efrayim doggii ley wolde, warii faa feƴƴita gooruwol ngool fu, ɓe ƴama ɗum:
— Aan wo a neɗɗo Efrayim naa?
— Ndelle, wi'u «cibbolet» min nana.
Ndeen joomum wi'an «sibbolet», sabo yimɓe Efrayim mbaawaa wi'ude cibbolet.a Wakkati oon, ɓe nanngata joomum, ɓe mbara ɗum. Yimɓe Efrayimankooɓe waraaɓe ley konu nguun fuu wo 42 000.
7 Yefta ardii Israa'iilankooɓe faa waɗi duuɓi jeegom. Caggal ɗuum, o maayi, o uwaa nder ngalluure wonnde ley leydi Galaad.
Ibisaanu ardiiɗo
8 Caggal makko, gorko jeyaaɗo wuro Baytilaama bi'eteeɗo Ipsan laatii ardiiɗo dow Israa'iilankooɓe. 9 Imo woodi ɓiɓɓe worɓe 30 e ɓiɓɓe rewɓe 30. Rewɓe ɓeen, o hokkitiri ɗum'en jananɓe. O ɓaŋani ɓiɓɓe makko worɓe du surbaaɓe 30 jananɓe. O laatii ardiiɗo dow Israa'iila faa waɗi duuɓi jeɗɗi. 10 Ndeen o maayi, o uwaa nder Baytilaama.
Elon ardiiɗo
11 Caggal makko, Elon mo lenyol Jabulon laatii ardiiɗo dow Israa'iila faa waɗi duuɓi sappo. 12 Ndeen o maayi, o uwaa ley ngalluure Ayalon nder leydi Jabulon.
Abdon ardiiɗo
13 Caggal makko gorko jeyaaɗo Piraton bi'eteeɗo Abdon ɓii Hillel laatii ardiiɗo dow Israa'iila. 14 Imo woodi ɓiɓɓe worɓe capanɗe nayo e taaniraaɓe worɓe 30. Iɓe mbaɗɗoo araaji gori capanɗe jeɗɗi. O laatii ardiiɗo dow Israa'iila faa waɗi duuɓi jeetati. 15 Ndeen o maayi kanko du, o uwaa ley Piraton nder leydi Efrayim, dow baamle Amalekinkooɓe.