Jimol Hanna
2
1 Hanna waɗi du'aare, wi'i:— Ɓernde am ina seyoroo Joomiraaɗo.
Semmbe am ɓantake saabe Joomiraaɗo.
Hunnduko am omtaama dow wayɓe kam.
Miɗo heewi seyo sabo Joomiraaɗo dannii kam.
2 Fay gooto laataaki ceniiɗo hono Joomiraaɗo.
Laatiiɗo hono maaɗa fuu walaa.
Tefaare nanndunde e Laamɗo meeɗen fuu walaa.
3 Celee haalaaji manngu becce.
Taa accon mawnitaare wurtoo e kunnduɗe mooɗon,
Sabo Joomiraaɗo wo Laamɗo annduɗo,
kam won etoowo golleeji.
4 Ɓaaruuji jaalotooɓe kelii,
de jaalaaɓe kaɓɓiraama e semmbe.
5 Haarunooɓe ngollan faa keɓa ko nyaama,
de yolbunooɓe ƴuwii e yolbere muɓɓen.
Dimaro rimii kile jeɗɗi,
de debbo jom ɓiɓɓe heewɓe laatake dimaro.
6 Joomiraaɗo na wadda maayde, na wuurna,
na yaara faa laakara, na ummintina.
7 Joomiraaɗo na nelda baasal, na nelda goodal,
na leeƴinkina, na toowna.
8 O ummina talkaaɓe e sollaare,
o wurtina waasuɓe e ley ndoondi,
faa ɓe njooɗodoo e kaanankooɓe,
ɓe ndona jooɗorgal teddeengal.
Sabo kanko jeyi joƴƴinirɗe adunaaru,
dow majje o joƴƴini adunaaru.
9 O reenan koyɗe hoolniiɓe makko,
de bonɓe majjan e ley nimre,
sabo wanaa e semmbe jaalagol heɓetee.
10 Wayɓe Joomiraaɗo kelete kelte kelte,
o rigginan kammu dow maɓɓe.
Joomiraaɗo saroto haddu adunaaru fuu.
O hokkan laamiiɗo makko semmbe,
o toownan semmbe cuɓaaɗo makko.
11 Elkaana hootii wuro Rama. Suka oon kaa heddii na gollana Joomiraaɗo ɗakkol almaami Eli.
Ɓiɓɓe Eli bonɓe
12 Ɓiɓɓe Eli na laatinoo jaasuɓe, ɓe ndewaay Joomiraaɗo. 13 Inani no almaami'en ɓeen ngaɗiranta yimɓe: si neɗɗo warii hokkii kirsamaari fu, teewu nguun wo jongete tafon. Golloowo almaami wardan e juwirgal goodungal kunduɗe tati wakkati muuɗum 14 faa yuwa teewu nguun ley fayandea naa barma. Ko juwirgal ngaal yuwi waddi fuu, almaami oon nannga. Noon almaami'en ɓeen ngaɗiranta yimɓe Israa'iila fuu waruɓe wuro Siilo. 15 Ko ɓuri ɗum bonnde du, illa ɓellere ndeen defaaka, golloowo almaami waran wi'a kokkoowo kirsamaari oon:
— Ittan almaami teewu keccu faa duppa. Si jongaama fu, o jaɓataa, keccu tan o jaɓata.
16 Si kokkoowo kirsamaaji jaabake, wi'i, «Accu ɓellere nde jongee tafon, sakitoo njaɓaa ko njiɗɗaa fuu», golloowo oon wi'an:
— A'aa! Hokku keccu joonin. Si wanaa noon fu, mi teetan.
17 Hakke jokolɓe oon mawnii sanne yeeso Joomiraaɗo, sabo ɓe kuyfinii sadakaaji Joomiraaɗo. 18 Samuwiila na golla yeeso Joomiraaɗo, wo o suka ɓornaaɗo saaya almaamaaku ŋarɗuka. 19 Hitaande fuu inniiko waɗan saaya pamara, waddana mo wakkati wardi e gorum faa ɓe ngaɗa kirsamaaji jeyɗi hokkeede hitaande fuu. 20 Eli na barkina Elkaana e deekum, ina wi'a:
— Joomiraaɗo hokku lenyol debbo o faa loomta kokkaaɗo Joomiraaɗo oon.
Sakitoo ɓe koota wuro.
21 Ndeen Joomiraaɗo hiilnii Hanna faa o rimi ɓiɓɓe worɓe tato e ɓiɓɓe rewɓe ɗiɗo. Samuwiila du ina ɓeydoo manngu yeeso Joomiraaɗo.
22 Tawi Eli naywii sanne. O nanii ko ɓiɓɓe makko ngaɗata yimɓe Israa'iila fuu e ko ɓe pukkodotoo e rewɓe gollooɓe to dammbugal hukum kawrital. 23 Jonkaa o haaldii e maɓɓe, o wi'i:
— Ko waɗi oɗon ngaɗa kulle ɗeen? Miɗo nana kabaaru mooɗon bonɗo, yimɓe fuu na kaala ɗum! 24 Celee ɓiɓɓe am! Kabaaru cankitotooɗo hakkunde yimɓe Joomiraaɗo oon welaa fey. 25 Si neɗɗo waɗii goɗɗo hakke fu, Laamɗo saroto. De si neɗɗo waɗii Laamɗo hakke, moy rewrintinta ɗum e Laamɗo?
Ammaa ɓiɓɓe Eli ɓeen kettindaaki haala baaba muɓɓen, sabo Joomiraaɗo anniyake warude ɓe. 26 Samuwiila suka oon kaa ina ɓeydoo manngu, Laamɗo e yimɓe fuu ina korsini mo.
Annabaaku e dow Koreeji Eli
27 Wooɗi, neɗɗo Laamɗo warii to Eli, wi'i:
— Inan ko Joomiraaɗo wi'i: «Wanaa mi ɓanginanii suudu bammaa hoore am nde ɓe ngonnoo ley leydi Misira to Fira'awna naa? 28 Mi suɓake bammaa hakkunde lenyi Israa'iila fuu faa laatoo almaami am, faa o sakka dow hirsirde, faa o ura ure, o ɓornee saaya almaamaaku yeeso am. Mi hokkii koreeji bammaa du ko Israa'iilankooɓe cakkata e yiite fuu. 29 Ko waɗi kuyfinɗon kirsamaaji am e sadakaaji am ɗi njamirmi ley suudu am ɗiin? Ko waɗi aɗa teddina ɓiɓɓe maaɗa faa ɓuri kam e ley ko paynoton ko'e mon e dow geɗe ɓurɗe woodde e sadakaaji fuu ɗi yimɓe am Israa'iila'en ngaɗata ɗiin?»
30 Ndelle inan ko Joomiraaɗo, Laamɗo Israa'iila wi'i: «Mi fodanekeno ma, aan e suudu bammaa nduun ngollanon kam faa abada.» De joonin kaa inan ko Joomiraaɗo wi'i: «Taa ɗum laatoo! Yimɓe teddinooɓe kam ɓeen, kam'en teddinammi, ammaa huyfinooɓe kam ɓeen, njawete. 31 Ndaar, wakkati waran mo taƴammi semmbe maaɗa, mi taƴan semmbe suudu bammaa faa nayeejo fuu waɗataa e ley lenyol maaɗa. 32 A yi'an ɓillaare ley suudu maa, fay si miɗo waɗana Israa'iila moƴƴere. Nayeejo du heɓataake e ƴuwdi maa abada. 33 Neɗɗo maaɗa mo accammi e golle hirsirde oon heddoto faa mboya bojji cattuɗi, yonki maaɗa du sunoo. Ƴuwdi maaɗa fuu maayan e ley semmbe nguurndam muɓɓen.
34 «Inan ko laatante maande: ɓiɓɓe maaɗa ɗiɗo Hofni e Pinahas maaydan nyannde wootere ɓe ɗiɗo fuu. 35 Ndeen mi umminanan hoore am almaami koolniiɗo gaɗoowo ko ɓernde am e muuyɗe am njiɗi. Mi nyiɓanan mo lenyol ngol semmbe. O yahan yeeso cuɓaaɗo am, o gollana ɗum faa abada. 36 Ndeen keddiiɗo e lenyol maaɗa fuu waran sujidana mo faa heɓa mbuuɗu cardi e tayre buuru, wi'an, ‹Kokkoraa kam golle almaamaaku faa mi heɓa ko mi nyaama.› »