Dewtere Samuwiila Ɗiɗaɓerde
No Daawda humpitiraa maayde Sawulu
1
1 Wooɗi, Sawulu maayii ley wolde Filistiyankooɓe. Tawi wakkati oon Daawda na haɓa e Amalek'en, de jaalii ɓe. Ndeen o waɗi balɗe ɗiɗi wuro Sikilak. 2 Nyannde tataɓerde ndeen gorko ƴuuri ndaaka Sawulu.a Tawi imo seeki kaddule makko, imo watti leydi dow hoore makko faa o holla mettorgal makko. Nde o yottinoo to Daawda ndeen o hippii e leydi faa o teddina ɗum. 3 Daawda ƴami mo, wi'i:— Toy ƴuuruɗaa?
Gorko oon jaabii wi'i:
— Mi hisii to ndaaka Israa'iila.
4 Daawda ƴami:
— Noy ɗum laatorii? Fillanam.
O jaabii o wi'i:
— Yimɓe Israa'iila ndoggii wolde toon, de heewɓe hakkunde maɓɓe caami maayi. Fay Sawulu e ɓiyum Yonatan du maayii.
5 Daawda wi'i jokolle gadduɗo kabaaru oon:
— Noy paamirɗaa Sawulu e ɓiyum Yonatan fuu maayii?
6 Jokolle oon jaabii, wi'i:
— Hawri wakkati oon, miɗo wonnoo dow waamnde Gilbo'a. Ndeen njiimi Sawulu na hippii dow labbo muuɗum, torkooji pucci e dorbotooɓe ɗi na ɓadii yottaade mo. 7 Nde o yeeƴinoo o yi'i kam fu, o noddi kam. De mbiimi, «Inani kam.» 8 O ƴami kam wo mi moy. Njaabiimi mbiimi wo mi Amalekeejo. 9 Ndeen o wi'i kam, «Ɓattita, mbaraa kam, sabo maayde na seɓii kam de miɗo heddii tafon.» 10 Ndelle ɓattitiimi mo de mbarumi mo, sabo mi faamii gaɗa ko o saami ɗuum o waawaa heddaade. De ittumi kufune laamu gonɗo e hoore makko e jawo wonngo e junngo makko, de ngaddumi ɗum to maaɗa, aan joomam.
11 Ndeen Daawda nanngi kaddule muuɗum seeki ɗe. Worɓe wonduɓe e muuɗum du fuu ceeki kaddule muɓɓen. 12 Ɓe cunii, ɓe mboyi, ɓe cuumii faa kiiral naange saabe Sawulu e ɓiyum Yonatan e sordaasiiɓe Joomiraaɗo e lenyol Israa'iila fuu, sabo ɓe mbardaama kaafaaje.
13 Daawda wi'i jokolle gadduɗo kabaaru oon:
— Toy njeyaɗaa?
O jaabii, o wi'i:
— Wo mi ɓii Amalekeejo janano.
14 Daawda wi'i mo:
— Ko waɗi a hulaay yowude junngo maaɗa e dow cuɓaaɗo Joomiraaɗo, (mbarɗaa ɗum)?
15 Ndeen Daawda noddi gooto hakkunde worɓe mum, wi'i:
— Yahu, fiyu mo mbaraa.
— Ƴiiƴam maaɗa wonu dow hoore maaɗa. Hunnduko maa seedanake ma nde mbiiɗaa a warii cuɓaaɗo Joomiraaɗo.
Jimol Bojji Daawda saabe Sawulu e Yonatan
17 Daawda woyri Sawulu e ɓiyum Yonatan jimol bojji. 18 O yamiri worɓe Yahuuda njannginee ngol. Ingol wi'ee «Jimol Ɓaaru». Na ngol winndaa ley Dewtere Ponnditiiɗo. Inani ngol:
19 Yaa Israa'iila, manngu maaɗa ina waalii,
ina maayi dow baamle maaɗa toowɗe.
Wayyoo! No waɗi jom'en semmbe caamii?
20 Taa ngooynon ɗum ley wuro Gaat,
Taa ngooynon ɗum ley laabi wuro Askelon,
faa taa ɓiɓɓe Filistiyankooɓe rewɓe ceyoroo ɗum,
taa ɓiɓɓe ɓe taadaaka ɓeen mantoo.
21 Onon baamle Gilbo'a,
Taa keɓon saawandere naa ƴuwoonde,
naa gese kokkooje nyaamri.
Sabo toon wawaadeejib cemtinaa,
toon wawaade Sawulu wujaaka nebbam.
22 Yeeso ƴiiƴam waraaɓe,
Ɓaaru Yonatan oon yaaraay gaɗa.
Yeeso terɗe jom'en semmbe du,
kaafaahi Sawulu wartaay ɓolum.
23 Sawulu e Yonatan wo horsuɓe, lobbuɓe.
Ley nguurndam fuu, iɓe ngondi,
ley maayde du, iɓe ngondi.
Iɓe ɓuri dute gullal,
iɓe ɓuri laddeeji cuusal.
24 Yaa! Rewɓe Israa'iila, mboyanee Sawulu,
koltinannooɗo on kaddule lobbe ciiɗe,
gattanoowo on kaŋŋe dow kaddule mooɗon.
25 Kay! Ko waɗi jom'en semmbe caamii ley wolde?
Wayyoo! Yonatan maayi,
na waalii dow nokkuuje toowɗe.
26 Wayyoo! Yonatan banndam, ɓernde am na naawa saabe maayde maa!
A horsinii kam sanne.
Njinngu maaɗa dow am na mawni,
na ɓuri njinngu ngu debbo yiɗata.
27 Wayyoo! Ko waɗi jom'en semmbe caamii?
Ko waɗi kaɓitirɗe wolde du kalkii?