Haala Wolde to Gilbo'a e maayde Sawulu
31
1 Filistiyankooɓe na kaɓda e Israa'iila'en. Worɓe Israa'iila ndoggi yeeso Filistiyankooɓe, ɓe caami dow waamnde Gilbo'a sabo ɓe piyaama faa ɓe maayi. 2 Filistiyankooɓe ndiiwi Sawulu e ɓiɓɓe mum worɓe faa ɓattii ɓe, de ɓe mbari ɓiɓɓe ɓeen Yonatan e Abinadaf e Malkisuwa. 3 Haɓo ngo wulii dow Sawulu sanne. Fiɗooɓe kure kewtii mo de mbarmini mo barmere mawnde. 4 Ndeen Sawulu wi'i tiigiiɗo kaɓitirɗe muuɗum:— Soortu kaafaahi maaɗa de njuwaa kam, faa taa yimɓe ɓe taadaaka ɓe ngara njuwa kam, njalnoroo kam.
Ammaa tiigiiɗo kaɓitirɗe oon waɗaay ko o wi'i sabo o hulii sanne. Ndelle Sawulu hooƴi kaafaahi mum de saami dow makki. 5 Nde tiigiiɗo kaɓitirɗe oon yiinoo maayde Sawulu ndeen, kam du saami dow kaafaahi mum de maaydi e Sawulu. 6 Nii Sawulu maayri nyannde ndeen, kam e ɓiɓɓem worɓe tato e tiigiiɗo kaɓitirɗe mum e worɓe mum fuu maaydi nyannde ndeen.
7 Nde Israa'iila'en wonɓe gere ooto naɗɗol ngool e wonɓe gere ooto maayo Uurdun ngoon njiinoo sordaasiiɓe Israa'iila na ndogga, wooɗi, ko Sawulu e ɓiɓɓe mum maayi ɗuum fu, ɓe ndoggi, ɓe njoppi gure maɓɓe. Filistiyankooɓe ɓeen ngari de njooɗii ley gure ɗeen.
8 Jaango majjum Filistiyankooɓe ngari faa ɓotta gineeji maayɓe ɓeen. Ɓe tawi Sawulu e ɓiɓɓe mum worɓe na maayii dow waamnde Gilbo'a. 9 Ɓe taƴi hoore Sawulu de ɓe ɓotti kaɓitirɗe wolde mum. Ɓe nuli nulaaɓe ley leydi Filistiya'en fuu, ɓe kumpiti kabaaru majjum oon ley cuuɗi dewal tooruuji maɓɓe e hakkunde yimɓe du. 10 Ɓe ngatti kaɓitirɗe ɗeen ley suudu dewal tooru wi'eteendu Astarta. Ɓe kaɓɓi ɓanndu makko to senngo kokuwol wuro Bet-San.
11 Yimɓe Yabes Galaad nanii ko Filistiyankooɓe ngaɗi Sawulu, 12 de worɓe maɓɓe suusuɓe njehi faa haddi jemma oon fuu faa njottii wuro Bet-San. Ɓe njippini ɓanndu Sawulu e ɓalli ɓiɓɓem e senngo kokuwol Bet-San, de ɓe njaari ɗi wuro Yabes, ɓe mbuli ɗi. 13 Caggal ɗuum, ɓe kooƴi ƴi'e maɓɓe, ɓe uwi ɗe ley lekki njammi ngonki Yabes. Ndeen ɓe cuumii faa waɗi balɗe jeɗɗi.