No Daawda halkiri Amalek'en
30
1 Daawda e worɓe mum kewti wuro Sikilak nyannde tataɓerde. Tawi Amalek'en koniino leydi Negef e wuro Sikilak. Ɓe torri Sikilak, ɓe mbuli ngo, 2 ɓe nanngi rewɓe famarɓe e mawɓe ɓeen fuu, ɓe mbaraay fay gooto de ɓe adi ɓe fuu, ɓe ndillidi.3 Nde Daawda e worɓe mum ngarnoo Sikilak ndeen ɓe tawi ngo wulaama, rewɓe e ɓikkoy ngoroy e ɓikkoy ndewoy fuu kooƴaama. 4 Ndeen Daawda e worɓe mum ƴepti daaɗe muɓɓen, mboyi faa semmbe maɓɓe hantii. 5 Rewɓe Daawda ɗiɗo ɓeen du nanngaama, Ahinowam jeyaaɗo Yesre'el e Abigayil dee Nabal-no jeyaaɗo Karmel.
6 Ɓernde Daawda metti sanne, sabo yimɓe na kaala haala limnude mo kaaƴe e ley mettorgal ɓerɗe maɓɓe dow ko ɓiɓɓe maɓɓe worɓe e rewɓe nanngaa ɗuum.
Daawda kaa semmbinii ɓernde muuɗum ley innde Joomiraaɗo Laamɗo muuɗum.
7 Ndeen Daawda wi'i almaami Abiyatar ɓii Ahimelek:
— Waddanam saaya almaamaaku, ƴamen Joomiraaɗo.
— Yalla mi rewta honuɓe ɓeen naa? Yalla mi hewtan ɓe naa?
Joomiraaɗo wi'i:
— Rewtu ɓe. A hewtan ɓe, a dannan jeyaaɓe maaɗa.
9 Daawda dillidi e worɓe keme njeegom, ɓe kewti gooruwol Besor. Ɗoon woɓɓe maɓɓe keddii, 10 sabo keme ɗiɗo maɓɓe tampii sanne faa mbaawaa feƴƴitinde gooruwol ngool. De Daawda kaa e keme nayo ɓeen njehi yeeso, na ndiiwa Amalek'en ɓeen.
11 Ɓe tawi neɗɗo Misirankeejo ley ngesa, ɓe njaari mo to Daawda de ɓe kokki mo ndiyam faa o yara e nyaamdu faa o nyaama, 12 ɓe kokki mo tamre ƴibbe e tame cabiije joorɗe ɗiɗi. O nyaami de o heɓi semmbe sabo o nyaamaay o yaraay ko waɗi nyaloomaaji tati e jemmaaji tati.
13 Daawda ƴami mo wi'i:
— Ɓeye njeyi ma? Toy ƴuurataa?
O jaabii o wi'i:
— Wo mi jokolle Misirankeejo, maccuɗo Amalekeejo. Joomam yoppii kam sabo mi maasaaki faa waɗi balɗe tati. 14 Min konii leydi Negef ndi Karti'en njeyi, min konii leydi Yahuuda e leydi Negef ndi yimɓe Kalibu njeyi. De min mbulii wuro Sikilak.
15 Daawda ƴami mo, wi'i:
— Aɗa waawi ardaade min to honooɓe ɓeen naa?
O jaabii, o wi'i:
— Hunanam yeeso Laamɗo a warataa kam naa a wattataa kam ley junngo joomam, de mi arde faa to honooɓe ɓeen.
16 O ardii Daawda faa e toon, de inani Amalek'en ɓeen, iɓe cankitii dow leydi ndiin, iɓe nyaama, iɓe njara, iɓe pija saabe jawdi konaandi mawndi ndi ɓe koni e leydi Filistiya e leydi Yahuuda ndiin. 17 Daawda haɓi e maɓɓe illa kiiral naange faa e kiiral naange jaango majjum. Fay gooto maɓɓe hisaay si wanaa jokolɓe keme nayo waɗɗiiɓe geelooɗi de ndoggi. 18 Daawda hisini ko Amalek'en ɓeen nanngunoo fuu. O hisini rewɓe makko ɗiɗo ɓeen du. 19 Fay huunde nyakaay, yalla pamaro naa nayeejo, yalla suka gorko naa suka debbo, jawdi naa huunde fuu ko nannganoo. Daawda yeccinii ɗum fuu. 20 Daawda hooƴi dammucce e na'i. Yimɓe mum soggooɓe ndiiwi ɗi, ɗi keedi yeeso kulle muɓɓen konaaɗe ɗeen, ɓe mbi'i:
— Inan jawdi ndi Daawda honi.
21 Ndeen Daawda wari to worɓe keme ɗiɗo tampunooɓe faa mbaawaay jokkude Daawda heddiiɓe to gooruwol Besor. Ɓe ngari ɓe cakkitii Daawda e yimɓe wonduɓe e muuɗum. Nde Daawda e worɓe mum ɓadinoo ɓe ndeen, o salmini ɓe. 22 Ammaa bonɓe e jaasuɓe hakkunde jokkuɓe Daawda fuu mbi'i:
— Ɓe njaadaay e meeɗen, ndelle en peccidataa e maɓɓe jawdi konaandi ndi keɓuɗen ndiin. De gorko fuu ina waawi hooƴude deekum e sukaaɓem de dilla.
23 Daawda kaa jaabii, wi'i:
— A'aa wanaa noon sakiraaɓe am. On ngaɗirtaa noon e ko Joomiraaɗo hokki en. O reenii en de o watti e ley juuɗe men honooɓe waruɓe dow men. 24 Moy hettindotoo ko mbi'aton? Ngeɗu gorko keddodiiɗo e gineeji to ndaaka e jahuɗo wolde fu laatoto gootum. Ɓe peccidan e mooɗon. 25 Illa nyannde ndeen Daawda waɗi ɗum yamiroore. Ɗum laatake al'aada ley Israa'iila, na heddii faa hannden.
26 Nde Daawda wartunoo to Sikilak ndeen, nuldi feccere jawdi konaandi ndiin to mawɓe Yahuuda yigiraaɓe mum, na wi'a:
— Inan dokkal saabe mooɗon ƴuurungal e ko honaa wayɓe Joomiraaɗo.