No Akis fornyiniri Daawda
29
1 Filistiyankooɓe kawrunduri ori sordaasiiɓe muɓɓen fuu to wuro Afek. Sordaasiiɓe Israa'iila du ndaaki ɗakkol ilam ngonɗam wuro Yesre'el. 2 Hooreeɓe Filistiya'en na njaha ley ori muɓɓen keme e ujunaaje. Daawda e worɓe mum e Akis ngoni sakitiiɓe. 3 Hooreeɓe Filistiya'en ɓeen mbi'i:— Ɗume Ibraninkooɓe ɓeen ngaɗi?
Akis jaabii ɓe, wi'i:
— Ɗum wo Daawda maccuɗo Sawulu kaananke Israa'iila. O waddii e am balɗe e kitaale, de mi yiiraay o fuu feloore illa nyannde o doggi o wari to am.
4 Ammaa hooreeɓe Filistiya'en ɓeen ɓernani Akis, ɓe mbi'i:
— Nuldu gorko o faa o yeccoo nokku mo kokkuɗaa mo. Taa o yaada e men to wolde, taa o laatoo ganyo meeɗen wakkati haɓo. Noy o waawri rewrintinde hoore makko e joomiiko si wanaa e ko'e meeɗen. 5 Wanaa ɗum wo Daawda mo ɓe njimnata iɓe mbamana, iɓe mbi'a:
«Sawulu warii ujunaaje mum,
Daawda du warii ujunaaje mum capanɗe keewɗe.»
6 Ndelle Akis noddi Daawda wi'i mo:
— Mi hunorake Joomiraaɗo buurɗo, a neɗɗo ponnditiiɗo. Na weli kam si aɗa waawunoo yaadude e wardude e am ley wolde. Mi yiiraay maa fuu feloore illa nyannde ngaruɗaa to am faa e hannden. Ammaa a weldaay e hooreeɓe. 7 Jonkaa fornya, yahu e jam. Ndeen a waɗataa ko welaa hooreeɓe Filistiya'en.
8 Daawda wi'i Akis:
— Ɗume ngaɗumi? Yalla won ko njiiɗaa ko boni e am miin maccuɗo maaɗa illa nyannde nde naatumi golle maaɗa faa hannden naa? Ko waɗi de mi waawaa yahude mi haɓa e wayɓe ma, aan joomam kaananke?
9 Akis jaabii Daawda, wi'i:
— Miɗo anndi. Wo goonga, aɗa weli kam hono maleyka Laamɗo. Ammaa hooreeɓe Filistiya'en ɓeen mbi'ii taa naatidaa e amin ley wolde. 10 Ndelle ummoɗaa gilla beetee, aan e maccuɓe yaadiraaɓe maaɗa. Ummoɗon wakkati hejjere de si pooyngol feccake fu, ndillon.
11 Ndelle Daawda e worɓe mum ummii illa hejjere faa ɓe njeccoo leydi Filistiya'en, de Filistiyankooɓe ɓeen du njehi wuro Yesre'el.