Haala Sawulu e debbo dabaranke
28
1 Ley balɗe ɗeen yimɓe Filistiya kawrunduri sordaasiiɓe muɓɓen faa ɓe kaɓa e Israa'iila'en. Akis wi'i Daawda:— Paamaa aan e worɓe maaɗa on njaadan e am miin e sordaasiiɓe am.
2 Daawda jaabii, wi'i:
— Wooɗi, a faaman ko miin maccuɗo maaɗa mbaawmi waɗude.
Akis jaabii, wi'i:
— Wooɗi, mi waɗan faa laatoɗaa doomoowo ɓanndu am haddi nguurndam maa fuu.
3 Ayyo, Samuwiila kaa maayii, Israa'iila'en fuu mboyi mo de uwi mo wuro makko Rama. Tawi Sawulu riiwii dabarankooɓe e noddooɓe beeli maayɓe e ley Israa'iila fuu.
4 Filistiyankooɓe kawriti de ngari ndaaki to wuro Sunem. Wakkati oon, Sawulu du hawrunduri Israa'iila'en de ndaaki to wuro Gilbo'a. 5 Nde Sawulu yi'unoo sordaasiiɓe Filistiya'en ndeen o huli, ɓernde makko na diwna kulol sanne. 6 O ƴami Joomiraaɗo, ammaa Joomiraaɗo jaabaaki mo, jaaboraaki mo koyɗi naa cumnal almaami'en naa annabaaɓe. 7 Ndeen Sawulu wi'i howruuɓe muuɗum:
— Pilanee kam debbo dabaranke, faa mi yaha mi ƴama mo.
Ɓe mbi'i mo:
— Ina woodi gooto to wuro Endoro.
8 Ndelle Sawulu wayliti alhaali mum, wayliti kaddulem de yaadi e worɓe ɗiɗo. Ɓe njottii to debbo oon jemma. Sawulu wi'i mo:
— Ngaɗanaa kam dabare de noddaa mo inndammi.
9 Ammaa debbo oon jaabii, wi'i:
— Hettina, aɗa anndi no Sawulu riiwiri dabarankooɓe e noddooɓe beeli maayɓe e ley leydi Israa'iila. Ko waɗi aɗa waɗa tuugol e nguurndam am faa mi maaya?
10 Sawulu kaa hunanii mo wi'i:
— Mi hunorake Joomiraaɗo buurɗo, a jukkataake saabe ɗum.
11 Ndeen debbo oon ƴami:
— Moy njiɗɗaa mi ummina?
Sawulu wi'i:
— Samuwiila.
12 Nde debbo oon yi'unoo Samuwiila ndeen, feekii faa toowi, wi'i:
— Ko waɗi kiiluɗaa kam? Aan woni Sawulu!
13 Kaananke jaabii, wi'i:
— Taa hulu. Ɗume nji'ataa?
Debbo oon wi'i:
— Miɗo yi'a mbeelu na ummoo e leydi.
14 Sawulu ƴami:
— Noy woni alhaali maggu?
O wi'i:
— Gorko nayeejo na ummoo, na mojii saaya tekkuka.
Ndeen Sawulu annditi wo ɗum Samuwiila, de o leeƴinii, o sujidi e leydi.
15 Samuwiila wi'i Sawulu:
— Ko waɗi de umminɗaa kam, aɗa mettinana kam?
Sawulu jaabii, wi'i:
— Miɗo wondi e torra mawɗo. Filistiyankooɓe na kaɓa e am de Laamɗo du toowtii kam. O jaabataako kam, wanaa e annabaaɓe wanaa e koyɗi. Ndelle miɗo nodde faa kollaa kam ko njeyumi waɗude.
16 Samuwiila wi'i:
— Ko waɗi aɗa ƴama kam, si Joomiraaɗo toowtii ma de laatii ganyo ma? 17 Joomiraaɗo waɗii ma ko wi'unoo e hunnduko am. Joomiraaɗo seekii laamu e ley junngo maaɗa de hokki ngu gondo maaɗa Daawda, 18 sabo a jokkaay daande Joomiraaɗo. A yowaay tikkere muuɗum mawnde dow Amalek'en. Ɗum saabii de Joomiraaɗo waɗi ma nii hannden. 19 Katin du, Joomiraaɗo wattete, aan e Israa'iila'en fuu ley juuɗe Filistiyankooɓe. Jaango du, aan e ɓiɓɓe maaɗa worɓe, on ngondan e am. Sordaasiiɓe Israa'iila du, Joomiraaɗo wattan ɓe e ley juuɗe Filistiyankooɓe. 20 Wakkati gooto Sawulu saami e leydi na foortii, kulol na heewi mo saabe haalaaji Samuwiila. Semmbe makko fuu hantake, sabo o nyaamaay fay huunde nyalooma oon e jemma oon fuu.
21 Debbo oon wari ɗakkol Sawulu de o yi'i ɗum ina diwna kulol. O wi'i mo:
— Ndaar, miin korɗo maaɗa, mi waɗi ko njamirɗaa kam. Mi farritii nguurndam am e ley ko njokkumi ko njamirɗaa kam. 22 Jonle hettindana miin korɗo maaɗa. Accaa mi hokke ko nyaametee faa keɓaa semmbe kooƴaa laawol maaɗa.
23 O salake, o wi'i:
— Mi nyaamataa.
Ammaa worɓe makko e debbo oon ndunƴi mo dow majjum, de sakitii o hettindanii ɓe. O ummii e leydi de o jooɗii dow leeso.