Haala Daawda hakkunde Filistiyankooɓe
27
1 Daawda wi'i e hoorem:— Nyannde gomma mi maayan ley junngo Sawulu. Ndelle ko kaanumi waɗude, mi hisina hoore am e ley leydi Filistiyankooɓe. Ndeen Sawulu yoppan filaade kam e ley leydi Israa'iila fuu de mi hisa e junngo makko.
2 Ndelle Daawda ummake, yaadi e worɓe keme njeegom to Akis ɓii Ma'ok kaananke leydi Gaat. 3 Daawda wuurdi e Akis ley Gaat, kam e worɓe muuɗum, mono fuu na wondi e koreeji mum. Daawda du na wondi e rewɓe mum ɗiɗo, Ahinowam jeyaaɗo Yesre'el e Abigayil jeyaaɗo Karmel dee Nabal-no. 4 Sawulu humpitaama Daawda doggiri wuro Gaat de o yoppi filaade mo. 5 Ndeen Daawda wi'i Akis:
— Si mi heɓii yardaa-muye e maaɗa fu, accaa kam miin maccuɗo maaɗa mi heɓa nokkuure ley wuro wooto hakkunde gure gonɗe ley ladde. Miin maccuɗo maaɗa wo mi moy faa mi wuurda e maa ley ngalluure maa, aan kaananke? 6 Ndelle nyannde ndeen Akis hokki mo Sikilak. Ɗum waɗi wuro Sikilak wo kaanankooɓe Yahuuda njeyi ɗum faa hannden. 7 Daawda wuurii ley leydi Filistiyankooɓe ndiin faa waɗi hitaande e lebbi nay.
8 Daawda ummodii e worɓe mum faa konowa Gesuri'en e Girs'en e Amalek'en, sabo illa jamaanuuji ɓeen ngonnoo jooɗiiɓe ley leydi ndiin faa yaha leydi Sur e leydi Misira fuu. 9 Nde Daawda honi nokkuure fu, accataa gorko naa debbo wuura de o hooƴa baali e na'i e araaji e geelooɗi e kaddule. De o yeccoo to Akis.
10 Nde Akis ƴami Daawda, «Toy konoyɗaa hannden» fu, Daawda jaaboto wi'a, «ley Negef leydi Yahuuda» naa «to yimɓe Yerame'el ley Negef» naa «Ley Negef Keniyankooɓe»a. 11 O accataa gorko naa debbo wuura taa ɓe njaaree wuro Gaat, imo miilii ɓe kollan ko waɗi, ɓe mbi'a «inan ko Daawda waɗi.» Nii Daawda waɗannoo haddi ko wuuri ley leydi Filistiya'en. 12 Akis hoolii Daawda, wi'i e hoorem, «Daawda waɗi hoorem ko luuɓi e yimɓe mum Israa'iila. Ndelle o laatoto maccuɗo am faa abada.»