No Joomiraaɗo noddiri Samuwiila
3
1 Samuwiila, suka gorko oon, na gollana Joomiraaɗo ɗakkol Eli. Konngol Joomiraaɗo ɗuuɗaa wakkatiiji ɗiin, holleede ley koyɗol heɓataake law. 2 Jemma gomma Eli na fukkii lunnde mum, jiile mum keewaa sabo gite mum ngalaa semmbe. 3 Samuwiila du ina fukkii ley suudu Joomiraaɗo to Keesuwal Laamɗo woni. Tawi fitilla Laamɗo nyifaay tafon. 4 Ndeen Joomiraaɗo noddi Samuwiila.Samuwiila jaabii, wi'i:
— Inani kam.
5 O doggiri to Eli, o wi'i:
— Inani kam. A noddii kam.
Eli jaabii, wi'i:
— Mi noddaay ma. Yecca, fukkowa.
— Inani kam, a noddii kam.
De Eli wi'i:
— Mi noddaay, suka am. Yecca, fukkowa.
7 Tawi Samuwiila anndaano Joomiraaɗo, o hollaaka konngol Joomiraaɗo tafon. 8 Ndeen Joomiraaɗo noddi Samuwiila tataɓerde. O ummii, o yehi to Eli de o wi'i:
— Inani kam, a noddii kam.
— Yahu pukkoɗaa. Si o noddii ma fu, mbi'aa, «Haalu Joomiraaɗo. Maccuɗo maaɗa ina hettindii.» Jonle Samuwiila yehi, fukkii lunnde muuɗum.
10 Joomiraaɗo wari ɗoon de noddi hono no noddirnoo arande noon:
— Samuwiila! Samuwiila!
Samuwiila wi'i:
— Haalu Joomiraaɗo, maccuɗo maaɗa ina hettindii.
11 Ndeen Joomiraaɗo wi'i Samuwiila:
— Inan, mi waɗan goɗɗum ley Israa'iila faa nowru fuu nanundu ɗum iidan kulol. 12 Nyannde ndeen mi tabintinan dow Eli ko kaalunoomi dow lenyol muuɗum ɗuum fuu, illa fuɗɗoode faa yaha timmoode. 13 Sabo mi haalanii mo mi saroto suudu makko faa abada saabe hakke mo o faamunoo oon. Ɓiɓɓe makko na ngaddanannoo ko'e muɓɓen kuddi, de o haɗaay ɓe. 14 Ɗum waɗi de kunaniimi suudu Eli, hakke suudu bammum laamnataake faro kirsamaaji naa faro sadakaaji abada.
15 Samuwiila fukkii faa weeti de omti gampuuje suudu Joomiraaɗo. O huli haalande Eli ko o hollaa ɗuum. 16 Ammaa Eli noddi Samuwiila de wi'i:
— Samuwiila, ɓiɗɗo am.
Samuwiila jaabii, wi'i:
— Inani kam.
17 Eli wi'i:
— Ɗume Joomiraaɗo haaldi e maaɗa? Taa cuuɗaa kam haala kaan. Laamɗo waɗa kiite dow ma si a suuɗii kam huunde fuu e ley ko o haalani ma.
18 Ndelle Samuwiila haalani mo fuu, suuɗaay mo fay huunde. Eli wi'i:
— Kanko woni Joomiraaɗo. O waɗa ko hawrani mo.
19 Samuwiila ina ɓeydoo manngu, Joomiraaɗo ina wondi e muuɗum, accaay haalaaji mum caama ɓolum. 20 Yimɓe Israa'iila fuu illa Dan faa yaha Beerseba annditii Samuwiila wo annabaajo Joomiraaɗo cuɓaaɗo. 21 Joomiraaɗo na heddii na holla hoore muuɗum wuro Siilo, toon o holliri Samuwiila hoore makko faro konngol makko.